- અંજારના ધમડકા નજીક તળાવમાં ડૂબી જતાં પાંચ બાળકનાં મો*ત
- બાળક ડૂબ્યાં હોવાના અહેવાલ મળતાંની સાથે વહીવટી તંત્રમાં દોડધામ
- બનાવની જાણ થતા ભચાઉ નગરપાલિકાની ફાયર ફાઈટરની ટીમ પહોચી ઘટના સ્થળે
- ભારે શોધખોળ બાદ તમામ બાળકોને દુધઈ સામૂહિક આરોગ્ય કેન્દ્ર ખાતે ખસેડાયાં
અંજાર તાલુકાના ધમડકા નજીક આવેલાં તળાવમાં એક સાથે પાંચ બાળક ડૂબ્યાં હતા. બાળકો ડૂબ્યા હોવાના અહેવાલ મળતાંની સાથે વહીવટી તંત્રમાં દોડધામ મચી હતી. આ બનાવમાં હિંગોરજાવાંઢમાં રહેતા ઇસ્માલ સાલેમામદ હિંગોરજા (ઉ.વ. 8), ઉંમર અદ્રેમાન ઉર્ફે અબ્દુલ રહેમાન (ઉ.વ. 11), મુસ્તાક જુસબ હિંગોરજા (ઉ.વ. 14) તથા અલ્ફાઝ અરમિયા હિંગોરજા (ઉ.વ. 9)નું મૃત્યુ થયું હતું, જ્યારે મોડી રાત્રિના પાણીમાં ગરકાવ થયેલાં અન્ય બાળક તાહીર અદ્રેમાન હિંગોરજા (ઉ.વ. 11) શોધખોળ દરમિયાન મળી આવ્યો હોવાની વિગતો સપાટી ઉપર આવી હતી.
દુધઈથી અંદાજિત 4 કિલોમીટરનાં અંતરે ધમડકા-ભવાનીપુરની બાજુમાં આવેલાં તળાવમાં ગત બપોરના અરસામાં આ કરુણાંતિકા સર્જાઈ હતી. બનાવ સ્થળે થતી ચર્ચામાંથી બહાર આવેલી વિગતો અનુસાર માલધારી પરિવારનાં બાળકો બપોરના અરસામાં તળાવ પાસે આવ્યા હતા. તે સમયે ભેંસ બહાર કાઢવા માટે બાળકોએ પ્રયાસ શરૂ કર્યો હતો. ત્યારે અચાનક એક બાળક કોઈ પ્રકારે પાણીમાં ગરકાવ થયું હતું. ત્યારબાદ જોતજોતાંમાં પાંચ બાળક પાણીમાં ડૂબવા લાગ્યાં હતાં. બાળકોના મૃતદેહ પાણીમાં તરતા નજરે પડતાં સમગ્ર ઘટના બહાર આવી હતી. તળાવમાં બાળકો ડૂબ્યા હોવાના અહેવાલ મળતાંની સાથે ભચાઉ નગરપાલિકાની ફાયર ફાઈટરની ટીમ બનાવ સ્થળે ધસી ગઈ હતી. આ ટીમે તળાવમાંથી બાળકોને બહાર કાઢવાની કામગીરી આરંભી હતી. ભારે શોધખોળ બાદ 4 બાળકને દુધઈ સામૂહિક આરોગ્ય કેન્દ્ર ખાતે ખસેડાયાં હતાં.
અહીં ફરજ પરના તબીબે આ બાળકોને મૃ*ત જાહેર કરતાંની સાથે જ પરિવાર ઉપર આભ ફાટયું હોય તેવી કરુણાંતિકા સર્જાઈ હતી. સરકારી આરોગ્ય કેન્દ્રમાં પરિવારજનોના રુદન સાથે વાતાવરણમાં ગમગીની પ્રસરી હતી.પવિત્ર રમજાન મહિનામાં ગરીબ માલધારી પરિવાર ઉપર કુદરતના ઘાતથી કોણ કોને સાંત્વના આપે તેવી સ્થિતિ પરિવારમાં સર્જાઈ હતી. પાણીમાં ગરકાવ થયેલ તાહીર અદ્રેમાન હિંગોરજા (ઉ.વ. 11)ને શોધવા માટે વહીવટી તંત્રની ટીમે કવાયત હાથ ધરી હતી.દરમ્યાન અંજાર મતવિસ્તારના ધારાસભ્ય ત્રિકમભાઈ છાંગાએ સમગ્ર બનાવની સમીક્ષા કરી વહીવટીતંત્રને જરૂરી સૂચના આપી હતી. તળવામાં બાળકો ડૂબી ગયા હોવાના સમાચાર દુધઈ પંથકમાં વહેતાં થવાની સાથે આજુબાજુના ગ્રામ્ય વિસ્તારના લોકો બચાવ કામગીરી માટે બનાવ સ્થળે ધસી ગયા હતા.અને 1 બાળકની શોધખોળ મોડી રાત સુધી હાથ ધરવામાં આવેલ હતી.
બાળક ન મળતા ભુજ ફાયર વિભાગની ટીમ પણ ઘટના સ્થળે રવાના થઈ હતી. રેસ્ક્યુ કેમેરા, સિલિંગ હુક, બોટની મદદથી શોધખોળ હાથ ધરવામાં આવેલ હતી. ભારે જહેમત બાદ ભુજ ફાયર વિભાગ, ભચાઉ ફાયર વિભાગ તથા સ્થાનિક તરવૈયાની મદદથી બાળકને મોડી રાત્રે શોધી કાઢી, બાળક જીવે છે કે કેમ તે જાણવા માટે મોડી રાત્રે બાળકને દુધઈ સામુહિક આરોગ્ય કેન્દ્રમાં લઈ જવાની તજવીજ હાથ ધરવામાં આવી હતી. ફરજ ઉપરના તબીબે આ બાળકને પણ મૃત જાહેર કર્યો છે. દુધઈ પી.આઈ. આર.આર. વસાવાએ તમામ કાર્યવાહી આરંભી છે.
અહેવાલ : ભારતી માખીજાણી
