ગહેલોતની સોનિયા ગાંધી સાથે મુલાકાત, રાજસ્થાનની પરિસ્થિતિ બદલ માંગી માફી
રાજસ્થાનના વર્તમાન મુખ્યમંત્રી અશોક ગેહલોત કોંગ્રેસ અધ્યક્ષની રેસમાંથી બહાર થઈ ગયા છે. સોનિયા ગાંધીને મળ્યા બાદ ગેહલોતે ચૂંટણી નહીં લડવાની જાહેરાત કરી હતી. સોનિયા ગાંધીને 10 જનપથ પર દોઢ કલાક સુધી મળ્યા બાદ અશોક ગેહલોતે બે બાબતો જણાવી. ગેહલોતે કહ્યું કે તેઓ સોનિયા ગાંધીની માફી માંગે છે. ગેહલોતે કહ્યું કે મને એ વાતનો અફસોસ છે કે તેઓ સીએમ રહીને ઠરાવ પસાર ન કરાવી શક્યા.
આ સિવાય ગેહલોતે મુખ્યમંત્રી પદને લઈને મોટું નિવેદન આપ્યું છે. અશોક ગેહલોતે કહ્યું કે સોનિયા ગાંધી સીએમ નક્કી કરશે. ગેહલોતનું આ નિવેદન ઘણું મહત્વનું છે કારણ કે થોડા સમય પછી પાયલોટ સોનિયાને મળવાના હતા.
કોંગ્રેસ અધ્યક્ષ પદ માટે ચૂંટણી રસપ્રદ બની રહી છે. કોંગ્રેસના વરિષ્ઠ નેતા દિગ્વિજય સિંહે કહ્યું છે કે તેઓ આજે પોતાનું નામાંકન દાખલ કરી શકે છે. તેમણે આજે 10 ફોર્મ લીધા છે. જો કે રાજસ્થાનના સીએમ અશોક ગેહલોત પણ કોંગ્રેસ અધ્યક્ષ પદની રેસમાં હતા. તેઓ દિલ્હીમાં કોંગ્રેસ અધ્યક્ષ સોનિયા ગાંધીને મળ્યા છે.
શશિ થરૂર આજે સવારે 11 વાગ્યે ઉમેદવારી પત્ર ભરશે. કોંગ્રેસ અધ્યક્ષની ચૂંટણી માટે જાહેર કરાયેલા કાર્યક્રમ અનુસાર, ઉમેદવારી પત્ર ભરવાની પ્રક્રિયા 24મી સપ્ટેમ્બરથી શરૂ થઈ હતી અને 30મી સપ્ટેમ્બર સુધી ચાલશે. નામાંકન પરત ખેંચવાની છેલ્લી તારીખ 8 ઓક્ટોબર છે. તે જ સમયે, 17 ઓક્ટોબરે મતદાન થશે અને 19 ઓક્ટોબરે પરિણામ જાહેર કરવામાં આવશે.
આગામી 2થી 3 દિવસમાં હાઈ કમાન્ડ સીએમ જાહેર કરશે!!
રાજસ્થાનમાં ચાલી રહેલા રાજકીય સંકટ વચ્ચે સચિન પાયલટને સીએમ પદ મળે તેવી સંભાવના પણ વ્યક્ત કરવામાં આવી રહી છે. ત્યારે સચિન પાયલટે સોનિયા ગાંધીને મળ્યા પછી કહ્યું કે તેમણે તેમની લાગણીઓ અને પ્રતિસાદ તેમને પહોંચાડ્યો છે. સાથે જ તેમણે આશા વ્યક્ત કરી હતી કે પાર્ટી અધ્યક્ષ રાજ્યને લઈને સકારાત્મક નિર્ણય લેશે. તેમણે સોનિયા ગાંધીના નિવાસસ્થાનની બહાર પત્રકારોને કહ્યું, કોંગ્રેસ અધ્યક્ષે અમારી વાત સાંભળી. રાજસ્થાનના વિકાસ અંગે ચર્ચા કરવામાં આવી હતી.
અમે માત્ર સખત મહેનત કરવા અને 2023ની વિધાનસભા ચૂંટણી જીતવા ઈચ્છીએ છીએ. આ માટે આપણે સાથે મળીને કામ કરવું પડશે. રાજસ્થાનની રાજકીય સ્થિતિને લઈને પૂછવામાં આવેલા એક પ્રશ્ન પર તેમણે કહ્યું કે, રાજસ્થાનના સંદર્ભમાં જે પણ સકારાત્મક નિર્ણય લેવામાં આવશે, તે સોનિયા ગાંધી દ્વારા લેવામાં આવશે.બીજી તરફ કોંગ્રેસના મહાસચિવ કેસી વેણુગોપાલે કહ્યું કે પાર્ટી અધ્યક્ષ સોનિયા ગાંધી રાજસ્થાનના મુખ્યમંત્રી અંગે આગામી એક-બે દિવસમાં નિર્ણય કરશે.
