પેઇનકિલર્સ, એન્ટિબાયોટિક્સ અને હૃદયરોગ સંબંધિત રોગો સહિતની દવાઓના ભાવમાં 1 એપ્રિલથી વધારો થશે
જેમ બીજી અનેક વસ્તુઓમાં ભાવ વધારો થઈ રહ્યો છે તેમ હવે એપ્રિલથી દવાઓ પણ તેમાંથી બાકાત રહેવાની નથી. એપ્રિલ મહિનાથી આવશ્યક દવાઓના ભાવમાં વધારો થવા જઈ રહ્યો છે. આમાં પેઇનકિલર્સથી લઈનેએન્ટિબાયોટિક્સનો સમાવેશ થાય છે.
પહેલાથી જ મોંઘવારીથી પરેશાન સામાન્ય માણસના ખિસ્સા પરનો બોજ વધુ વધશે. આ આવશ્યક દવાઓ વિશે વાત કરીએ તો, તેમાં પેઇનકિલર્સ, એન્ટિબાયોટિક્સ, હૃદયની દવાઓ વગેરેનો સમાવેશ થાય છે. આ તમામ દવાઓના ભાવ 1 એપ્રિલથી વધવા જઈ રહ્યા છે. સામાન્ય માણસને મોંઘવારીનો મોટો ફટકો પડશે. વાસ્તવમાં, સરકાર ફાર્માસ્યુટિકલ કંપનીઓને વાર્ષિક જથ્થાબંધ ભાવ સૂચકાંકમાં ફેરફારને અનુરૂપ વધારો કરવાની મંજૂરી આપવા માટે તૈયાર છે. ડ્રગ પ્રાઇસ રેગ્યુલેટર નેશનલ ફાર્માસ્યુટિકલ પ્રાઇસિંગ ઓથોરિટીએ સોમવારે જણાવ્યું હતું કે 2022 સુધી સરકાર દ્વારા સૂચિત જથ્થાબંધ ભાવાંકમાં વાર્ષિક ફેરફારના આધારે ભાવમાં વધારો કરવામાં આવી શકે છે. મળતી માહિતી મુજબ, વધતી મોંઘવારીને જોતા ફાર્મા ઉદ્યોગ દવાઓની કિંમતમાં વધારો કરવાની માંગ કરી રહ્યો હતો.
એક રિપોર્ટ અનુસાર દવાઓની કિંમતોમાં 12 ટકાથી વધુનો વધારો થઈ શકે છે. આ સતત બીજું વર્ષ છે જ્યારે દવાઓના ભાવમાં વધારો થશે. શેડ્યૂલ દવાઓના ભાવમાં લગભગ 10 ટકાનો વધારો થઈ શકે છે. નિયમો અનુસાર, સરકારની પરવાનગી વિના સૂચિત દવાઓના ભાવમાં વધારો કરી શકાતો નથી. ડબ્લ્યુપીઆઈમાં વાર્ષિક ફેરફારને કારણે કિંમતોમાં વધારો સાધારણ રહ્યો છે, જે વર્ષોથી 1% અને 2% ની વચ્ચે છે. સૂત્રોએ જણાવ્યું હતું કે એનપીપીએ આગામી થોડા દિવસોમાં નિર્ધારિત ફોર્મ્યુલેશનની ટોચમર્યાદા કિંમતોને સૂચિત કરશે.
જથ્થાબંધ ભાવાંકમાં 10 ટકાના ઉછાળાને કારણે દવાઓમાં ભાવવધારાની માંગ ઉઠી હતી
દેશમાં જથ્થાબંધ ભાવાંકમાં 10 ટકાનો ઉછાળો નોંધાયો હતો. જેના કારણે ફાર્મા કંપનીઓ છેલ્લા ઘણા સમયથી દવાઓના ભાવમાં વધારો કરવા ઇચ્છતી હતી. અંતે હવે આ વધારો 1 એપ્રિલથી થાય તેવી પ્રબળ શક્યતાઓ સેવાઇ રહી છે.
દવાઓની કિંમતોમાં 12 ટકા જેટલો વધારો થવાની શક્યતા
મળતી માહિતી મુજબ દવાઓના ભાવમાં વધારો કરવા ફાર્મા કંપનીઓએ સરકારની પરવાનગી લેવાની રહે છે. 1 એપ્રિલથી જે ભાવ વધારો થવાનો છે તેમાં દવાઓમાં અંદાજે 12 ટકા જેટલો ભાવ વધારો થાય તેવી શક્યતા સેવાઇ રહી છે.
ફાર્મા કંપનીઓને રાહત મળશે
દવાઓના ભાવ વધારાને કારણે આ ઉદ્યોગ સાથે જોડાયેલા લોકોને જરૂરી રાહત મળશે. કેટલાક સમયથી, ફાર્માસ્યુટિકલ માલસામાન, નૂર અને પ્લાસ્ટિક અને પેકેજિંગ માલ સહિત કાચા માલમાં વધારો થયો છે. જેના કારણે ખર્ચ પર અસર પડી છે. દવાઓના ભાવ વધારાથી તેમને રાહત મળશે.