સટ્ટા બજારમાં પણ ભાજપને 135થી 137 બેઠકો મળવાનું અનુમાન

બીજા તબક્કાના મતદાન બાદ સટ્ટા બજાર ગરમ : ભાજપને 120થી ઓછી સીટ તો નહીં જ મળે તેવો અંદાજ

બે તબક્કામાં મતદાન પૂર્ણ થયા બાદ એક્ઝિટ પોલના આંકડા સામે આવી ગયા છે. એક્ઝિટ પોલમાં ગુજરાતમાં જંગી બહુમતી સાથે ભાજપની સરકાર બનતી હોવાનું કહેવામાં આવી રહ્યું છે. બીજી તરફ ભાજપ પણ આ આંકડા જોઈને ઘણો ખુશ છે આવામાં કોંગ્રેસ એક્ઝિટ પોલના આંકડા પર વિશ્વાસ કરવાના બદલે પોતાના મતદારો પર વિશ્વાસ રાખી રહી છે અને જરુર કોંગ્રેસ બીજા તબક્કામાં 50-55 જેટલી બેઠકો જીતશે તેવી શક્યતા વ્યક્ત કરવામાં આવી રહી છે. આ તરફ એક્ઝિટ પોલની જેમ સટ્ટા બજાર પર પણ પરિણામની સંભાવનાઓને લઈને ગરમ થઈ ગયું છે

શું આ વખતે ભાજપ પોતાનો વર્ષ 2002નો રેકોર્ડ તોડી શકશે કે નહીં તે અંગે પણ અટકળો લગાવવામાં આવી રહી છે કારણ કે એ વખતની ચૂંટણીમાં ભાજપને 127 બેઠકો મળી હતી. સટ્ટા બજારમાં પ્રથમ તબક્કાના મતદાન બાદ જ ભાજપને 135-137 બેઠકો મળવાનું અનુમાન લગાવવામાં આવી રહ્યું હતું. સટ્ટા બજારના જે પ્રકારેના આંકડા ચર્ચાઈ રહ્યા છે તે જોતા માનવામાં આવે છે કે ભાજપની બેઠકો 120થી નીચે તો નહીં જ જાય.

સૂત્રો જણાવે છે કે, ભાજપને 137 બેઠકો મળે તો સટ્ટો લગાવનારાની રકમ બમણી થઈ શકે છે, જો ભાજપની બેઠકો 135ની નીચે રહી તો તમામ રકમ ગુમાવી દેશે. એટલે કે ભાજપને 136 બેઠકો મળે તેવી શક્યતાઓ રહેલી છે.

ભાજપની 120 બેઠકો માટે 27થી 22 પૈસાનો ભાવ બોલાઈ રહ્યો છે, એટલે કે જો ભાજપની 120 બેઠક માટે કોઈ 1 રૂપિયો લગાવે તો તેને 1.22થી 1.27 રૂપિયા મળી શકે છે. આજનો ભાજપની બેઠક 140ને પાર થાય તો સટ્ટા બજાર વધુ ગરમ થશે અને ભાવ 3- 2.25 સુધી પહોંચી શકે છે. જોકે આટલી બેઠકો મળવાની સંભાવના એક્ઝિટ પોલમાં પણ વ્યક્ત કરવામાં આવી નથી.

આ તરફ આમ આદમી પાર્ટી કે જેણે ગુજરાતમાં જે રીતે પ્રચાર કર્યો છે તે જોતા માંડ 8 જેટલી બેઠકો જીતવાની સંભાવના વ્યક્ત કરાઈ રહી છે તેના માટે 80 પૈસાથી 1.20 રૂપિયા ભાવ 8 બેઠકો માટે બોલાઈ રહ્યો છે.સૂત્રો જણાવે છે, ગુજરાત વિધાનસભાની ચૂંટણીના પરિણામો પર હજારો કરોડનો સટ્ટો રમાઈ શકે છે.