કાર્યક્રમમાં ખુરશીઓ ઉડી : ટિકૈતે ઘટના માટે સરકારને જવાબદાર ઠેરવી
કર્ણાટકના બેંગલુરુમાં ભારતીય ખેડૂત સંઘના નેતા રાકેશ ટિકૈત સાથે દુર્ઘટના સર્જાઈ છે. આજે બેંગ્લોર પ્રેસ ક્લબના ગાંધી ભવન ખાતે રાકેશ ટિકૈત પર કાળી શાહી ફેંકવામાં આવી હતી. ઘટના બાદ સ્થળ પર ઉગ્ર બોલાચાલી થઈ હતી. આ દરમિયાન કેટલાક લોકોએ એકબીજા પર ખુરશીઓ પણ ફેંકી હતી. એવું કહેવામાં આવ્યું છે કે શાહી ફેંકવામાં સ્થાનિક ખેડૂત નેતા કોડિહાલીસ ચંદ્રશેખરનો હાથ છે. ચંદ્રશેખરના સમર્થકોએ જ રાકેશ ટિકૈત પર કાળી શાહી ફેંકી છે. બીજી તરફ રાકેશ ટિકૈતે આ ઘટના માટે કર્ણાટકની ભાજપ સરકારને જવાબદાર ગણાવી છે.
વાસ્તવમાં સોમવારે ભારતીય ખેડૂત સંઘના નેતા રાકેશ ટિકૈત બેંગલુરુ પ્રેસ ક્લબના ગાંધી ભવનમાં એક કાર્યક્રમમાં હાજરી આપવા પહોંચ્યા હતા. આ દરમિયાન અચાનક તેમના પર શાહી ફેંકવામાં આવી હતી. ભારતીય ખેડૂત સંઘના નેતા રાકેશ ટિકૈતે શાહી ફેંકવા બદલ કર્ણાટકની ભાજપ સરકાર પર પ્રહારો કર્યા છે. રાકેશ ટિકૈતે કહ્યું કે અહીં સ્થાનિક પોલીસ દ્વારા કોઈ સુરક્ષા આપવામાં આવી નથી. આ સરકારની મિલીભગતથી કરવામાં આવ્યું છે.
એક વર્ષ પૂર્વે રાજસ્થાનમાં પણ ટિકૈત ઉપર શાહી ફેંકાઈ હતી
એક વર્ષ પહેલા એપ્રિલમાં રાજસ્થાનના અલવર જિલ્લાના તતારપુર ચોકમાં ખેડૂત નેતા રાકેશ ટિકૈતના કાફલા પર હુમલો થયો હતો. આ દરમિયાન કેટલાક લોકોએ રાકેશ ટિકૈતનું સ્વાગત કરવાના બહાને તેની કાર રોકી હતી. જે બાદ તેના પર હુમલો કરવામાં આવ્યો હતો. આ દરમિયાન ટિકૈત પર શાહી પણ ફેંકવામાં આવી હતી. આ સાથે તેમની કારની બારીના કાચ પણ તૂટી ગયા હતા. હુમલા બાદ રાકેશ ટિકૈતે ભાજપ પર આરોપ લગાવ્યા હતા.
