ભારતના દિગ્જજો તો ઠીક નવાણિયા પણ કમ નહિ!!

એક ટીમ સામે સતત 12 વન-ડે સિરીઝ જીતીને ભારતે વર્લ્ડરેકોર્ડ બનાવ્યો: અક્ષર પટેલે તોફાની 64 રનની ઇનિંગ રમી મેન ઓફ ધ મેચ બન્યો

ભારતે પોર્ટ ઓફ સ્પેનમાં આયોજિત બીજી વન-ડે મેચમાં વિન્ડીઝને બે વિકેટથી હરાવી દીધું છે. આ સાથે જ ભારતે સતત 12મી સિરીઝ એક ટિમ સામે જીતીને વર્લ્ડ રેકોર્ડ પ્રસ્થાપિત કર્યો છે. ભારતની આ સિરિઝમાં બીજી હરોળના ખેલાડીઓની સંખ્યા વધુ છે ત્યારે કહી શકાય કે ભારતના દિગ્જ્જો જ નહિ પરંતુ નવાણીયાઓ પણ કમ નથી. જે કાલના મેચમાં સ્પષ્ટ સાબિત થયું.ટીમ ઈન્ડિયાના જીતના હીરો ઓલરાઉન્ડર અક્ષર પટેલ રહ્યા હતા.

અક્ષર પટેલે 64 રનની તોફાની ઈનિંગ રમીને વેસ્ટઈન્ડિઝના કબ્જામાંથી મેચને છીનવી લીધી હતી. લેફ્ટ હેન્ડના બેટર અક્ષર પટેલે 35 બોલની ઈનિંગમાં ત્રણ ચોગ્ગા અને પાંચ છગ્ગા ફટકાર્યા હતા. ખાસ વાત એ છે કે અક્ષર પટેલે મેચની છેલ્લી ઓવરના ચોથા બોલ પર છગ્ગો ફટકારીને શાનદાર અંદાજમાં મેચને પૂર્ણ કરી હતી. આ જીત સાથે જ ભારતે ત્રણ મેચોની વનડે સીરીઝમાં 2-0થી આગળ છે. ભારતીય ટીમની વેસ્ટ ઈન્ડિઝ સામેની આ સતત 12મી શ્રેણી જીત હતી.

લક્ષ્યનો પીછો કરતા ભારતની શરૂઆત સારી રહી હતી. કેપ્ટન ધવન અને શુભમન ગિલે પ્રથમ વિકેટ માટે 11 ઓવરમાં 48 રનની ભાગીદારી નોંધાવી હતી. આ દરમિયાન ગિલ સંપર્કમાં જોવા મળ્યો હતો પરંતુ ધવન એક-એક રન માટે સંઘર્ષ કરી રહ્યો હતો. 31 બોલનો સામનો કરી રહેલા ધવન માત્ર 13 રન બનાવીને રોમારિયો શેફર્ડના બોલ પર આઉટ થયો હતો. ધવનના આઉટ થયા બાદ ભારતે શુભમન ગિલ (43) અને સૂર્યકુમાર યાદવ (9)ની વિકેટ ગુમાવી દીધી હતી. બંને ખેલાડીઓ કાયલ મેયર્સ દ્વારા તેની જાળમાં ફસાઈ ગયા હતા. શ્રેયસ અય્યર અને સંજુ સેમસને 79 રનમાં ત્રણ વિકેટ ગુમાવ્યા બાદ સરસાઈ મેળવી હતી.

ખેલાડીઓએ ઝડપી બેટિંગ કરી અને વિન્ડીઝના બોલરો પર દબાણ બનાવ્યું. સંજુ અને શ્રેયસે ચોથી વિકેટ માટે 99 રનની ભાગીદારી કરી હતી. શ્રેયસ અય્યરે 71 બોલમાં 63 રન બનાવ્યા હતા, જ્યારે સેમસને તેની પ્રથમ વનડે કારકિર્દીમાં 54 રન બનાવ્યા હતા.ભારતને છેલ્લી ઓવરમાં આઠ રનની જરૂર હતી. કાયલ મેયર્સે ફેંકેલી તે ઓવરમાં બીજા બોલ પર અક્ષર અને ત્રીજા બોલ પર સિરાજે એક-એક રન લીધો હતો. હવે ત્રણ બોલમાં છ રન થવાના હતા અને બંને ટીમો મેચ જીતી શકી હોત. આવી તણાવપૂર્ણ પરિસ્થિતિમાં અક્ષરે ચોથા બોલ પર સિક્સર ફટકારીને ભારતને યાદગાર જીત અપાવી હતી. અક્ષર પટેલ પ્લેયર ઓફ ધ મેચ રહ્યો હતો.

સ્લો ઓવરરેટ કારણે ભારતીય ટીમને મેચ ફીના 20 ટકાનો દંડ ફટકાર્યો

ભારતીય ક્રિકેટ ટીમ વેસ્ટ ઈન્ડિઝના પ્રવાસ પર ત્રણ મેચની વનડે શ્રેણી રમી રહી છે. શ્રેણીની પ્રથમ મેચમાં ટીમ ઈન્ડિયાએ યજમાન ટીમ પર ત્રણ રને રોમાંચક જીત નોંધાવીને 1-0ની સરસાઈ મેળવી હતી, પરંતુ સાથે જ શિખર ધવનની આગેવાની હેઠળની આ ટીમને પણ મોટો આંચકો લાગ્યો છે.

હકીકતમાં, ભારતને પ્રથમ વન-ડેમાં ધીમી ઓવર રેટ માટે દંડ ફટકારવામાં આવ્યો છે. સ્લો ઓવર રેટ માટે ભારતીય ટીમને મેચ ફીના 20 ટકા દંડ ફટકારવામાં આવ્યો છે. મેચ રેફરી રિચી રિચર્ડસને જાણવા મળ્યું કે શિખર ધવનની આગેવાની હેઠળની ભારતીય ટીમે નિર્ધારિત સમય કરતાં ઓછી ઓવર ફેંકી, ત્યારબાદ તેમણે પેનલ્ટી લગાવી.