અબતક, નવી દિલ્હી :
દાયકાઓ સુધી કોંગ્રેસનું પ્રતિનિધિત્વ કરનાર ગુલામ નબી આઝાદે કાશ્મીરમાં રાજ કરવા તરફ દોટ મૂકી છે. તેઓએ કોંગ્રેસને સાઈડ લાઇન કરી લગાતાર જમ્મુ કાશ્મીરમાં જન સંપર્ક કર્યો છે. ત્યારે મમતા જે સમાન વિચારધારા વાળા પ્રાદેશિક પક્ષોને એક કરવાના મિશન ઉપર છે. તેના તરફ ગુલામ નબી આકર્ષાયા છે કે શું તેવો સો મણનો સવાલ ઉઠ્યો છે.
જોકે, આઝાદે દાવો કર્યો છે કે કોંગ્રેસ નેતૃત્વ સાથે અસંમત હોવા છતાં, તેમની પાસે અલગ રાજકીય પક્ષ બનાવવાની કોઈ તાત્કાલિક યોજના નથી. કેન્દ્રશાસિત પ્રદેશમાં તેમની નજીકના પક્ષના નેતાઓએ તેમને જમ્મુ અને કાશ્મીરના “આગામી અને શ્રેષ્ઠ મુખ્યમંત્રી” તરીકે સ્થાપિત કર્યા. આઝાદ દિલ્હી પરત ફર્યા છે, જ્યાં તેઓ પાર્ટીના નેતૃત્વને મળે તેવી શક્યતા છે.
કિશ્તવાડના પૂર્વ મંત્રી અને કોંગ્રેસના વરિષ્ઠ નેતા ગુલામ અહેમદ સરોરીએ કહ્યું, “જ્યારે તમામ સમુદાયના લોકો જમ્મુમાં રાહુલ ગાંધીને મળ્યા, ત્યારે તેઓએ સ્પષ્ટપણે તેમને જમ્મુ અને કાશ્મીરમાં પાર્ટીના આગામી મુખ્યમંત્રી પદના ઉમેદવાર તરીકે જોયા. સરોરી એ જમ્મુમાં કોંગ્રેસના 20 નેતાઓમાંનો એક છે જેમણે આઝાદને સમર્થન વ્યક્ત કરવા માટે આ વર્ષની શરૂઆતમાં પાર્ટીના હોદ્દા પરથી રાજીનામું આપ્યું હતું. જમ્મુ અને કાશ્મીરમાંથી રાજીનામું આપ્યા બાદ તરત જ કોંગ્રેસ નેતૃત્વએ આઝાદને પાર્ટીની શિસ્ત સમિતિમાંથી હટાવી દીધા હતા. સરોરીએ કહ્યું, “અમે દિલથી કોંગ્રેસી છીએ અને હંમેશા આવા જ રહીશું. આઝાદ સાહેબ એક કોંગ્રેસી તરીકે દરેક જગ્યાએ ગયા અને તેઓ જમ્મુ-કાશ્મીરના આગામી મુખ્યમંત્રી છે.
ઉલ્લેખનીય છે કે જમ્મુ કાશ્મીરમાં ત્રણ તબક્કામાં રેલીઓ યોજી આઝાદે રાજ્યમાં મહત્વનાં સ્થળોએ રેલી યોજીને કોંગ્રેસને સીધો પડકાર ફેંક્યો છે. પહેલો રાઉન્ડ તેમણે 16 નવેમ્બરે જમ્મુનાં બનિહાલમાં યોજ્યો હતો. આ પછી 4 ડિસેમ્બરે રામબનમાં પણ રેલી યોજી હતી. જમ્મુ કાશ્મીરનાં મતદારો પર તેમની મજબૂત પકડ છે. તેમનાં 20 ટેકેદારોએ હમણા પાર્ટીમાંથી રાજીનામાં આપતા આઝાદ હવે શું કરશે તેની પર સૌની નજર મંડાઈ છે. જમ્મુ કાશ્મીરનાં ઉપ રાજ્યપાલ મનોજ સિંહાની વહીવટી કુશળતાનાં તેમણે હમણા વખાણ કર્યા હતા. આમ કરીને તેમણે કોંગ્રેસનાં નેતૃત્વ સામે સીધો પડકાર ફેંક્યો હતો.
