- રાજ્ય સરકાર દ્વારા આ કેસને ફાસ્ટ ટ્રેક કોર્ટમાં ચલાવવામાં આવશે: ગૃહ રાજયમંત્રી હર્ષ સંઘવી
રાજકોટની ખાનગી મેટરનીટી હોમમાં મહિલા દર્દીઓની સારવારના સી.સી.ટી.વી. વિડીયો વાયરલ થવાની ઘટના સંદર્ભે જાહેર અગત્યની બાબત પર જવાબ આપતા ગૃહ રાજ્ય મંત્રી હર્ષ સંઘવીએ જણાવ્યુ કે, આ સમગ્ર ઘટનામાં જે પ્રારંભિક બાબત સામે આવી હતી તે મુજબ હોસ્પિટલના સંચાલકો અને બે-ચાર કર્મચારીઓની સામે ગુનો દાખલ કરીને તેમની ધરપકડ કરી પોલીસ સરળતાથી ફાઇલ ક્લોઝ કરી શકતી હતી. પરંતુ મુખ્યમંત્રી ભૂપેન્દ્ર પટેલના માર્ગદર્શનમાં આપણી ગુજરાત પોલીસ ક્યારેય નિર્દોષને પકડીને ફાઇલ ક્લોઝ કરતી નથી, પોલીસે આ બાબતને ખુબ જ ગંભીરતાથી લઇને બારીકાઇથી તપાસ શરૂ કરી ત્યારે બહાર આવ્યુ કે, આ તો ખુબ મોટુ નેટવર્ક છે. ઈન્ટરનેટની મદદથી સુરક્ષા અને સર્વેલન્સના આ યુગમાં લાખો સી.સી.ટી.વી. લાગેલા હોય છે ત્યારે આ હેકર્સ દેશના હજારો કેમેરાઓ હેક કરીને એક દેશ વ્યાપી ષડયંત્ર કરે તે પહેલા જ આપણી ગુજરાત પોલીસે આ રેકેટના મુળ સુધી પહોંચીને મુખ્ય સુત્રધારોને પકડીને આ ષડયંત્રનો પર્દાફાશ કર્યો છે.
ટેક્નોલોજીના આ યુગમાં સામાન્ય બેદરકારી પણ બહુ મોટુ નુક્શાન કરી શકે છે ત્યારે સીસીટીવી કેમેરા સાથે જોડેલા વાઇફાઇનો ઓપન કે વીક પાસવર્ડ તથા નબળા સિક્યુરીટી સેટીંગ હેકર્સ માટે વિડીયો હેક કરવા આસાન કરી દે છે. ટેક્નોલોજીની કેટલીક એરરનો આવા તત્વો લાભ લેતા હોય છે. ગુજરાત પોલીસ દ્વારા આ બાબતે સતત અવેરનેસ ફેલાવવામાં આવતી હોય છે, પ્રજાના સૌ પ્રતિનિધિઓને પણ આ અવેરનેસ કાર્યમાં જોડાવવા મંત્રીશ્રીએ અપીલ કરી હતી.
મંત્રી હર્ષ સંઘવીએ ઘટનાક્રમની વિગતો આપતા કહ્યુ કે, 17મી ફેબ્રુઆરીના રોજ સાંજે ટેલિગ્રામ ગ્રુપમાં કોઇ હોસ્પીટલ, રૂમના સ્ત્રી દર્દીના ઇંજેકશન અને એકઝામીનેશનને લગતા વિડીયો અપલોડ થયાની બાબત ધ્યાને આવતા મહિલાઓની સુરક્ષાની ગંભીરતા લઇને તાત્કાલિક અમદાવાદ શહેર સાયબર ક્રાઇમ પોલીસ સ્ટેશનમાં સામેથી પોલીસે ફરીયાદી બનીને એફ આઇ આર દાખલ કરી હતી. તપાસમાં રાજકોટનો બનાવ હોવાની બાબત ધ્યાને આવતા ટીમ મોકલીને તાત્કાલીક એનાલીસીસ કરાવી લેવાયુ.
પોલીસે કરેલી બારીક તપાસ અંગે મંત્રીએ ઉમેર્યુ કે, ગુજરાત પોલીસે આ ઘટનાની ઉંડાણપૂર્વક તપાસ શરૂ કરીને પોતે એક ગ્રાહકની માફક ટેલિગ્રામ ગ્રુપના સભ્ય બનીને તે ગ્રુપમાં જોડાઈને એકત્ર કરેલી માહિતીને આધારે મુખ્ય સુત્રધારો સુધી પહોંચી પોલીસે મહારાષ્ટ્રના સાંગલી, લાતુર અને યુ.પીના પ્રયાગરાજ અલગ-અલગ ટીમો મોકલીને 3 હજાર કિ.મી દૂરથી આરોપીઓને 48 કલાકમાં દબોચી લીધા. એટલુ જ નહિ, સીસીટીવી લીકેજ કેસોમાં સૌ પ્રથમ વખત સાયબર ટેરરીઝમની કલમ ઉમેરનાર ગુજરાત સૌ પ્રથમ રાજ્ય છે. રાજ્ય સરકાર દ્વારા આ કેસમાં સ્પે.પબ્લિક પ્રોસિક્યુટરની નિમણૂંક કરી ડે ટૂ ડે કેસ ચાલે તે માટે ફાસ્ટ ટ્રેક કોર્ટમાં કેસ ચલાવવા પણ કાર્યવાહી શરૂ કરી દેવામાં આવી છે.
મંત્રીએ ઉમેર્યુ કે, સીસીટીવી હેક કરનાર આ આરોપીઓ યુરોપીયન દેશો એટલાન્ટા, રોમાનીયા, જ્યોર્જીયા, જાપાન જેવા દેશોના વી.પી.એન. નો ઉપયોગ કરીને પોતાની ઓળખ છુપાવતા હતા. ટેલીગ્રામ ગૃપમા આ લોકો 22 અલગ અલગ ચેનલ ચલાવતા હતા અને અશ્લીલ વીડીયોના મેનુ કાર્ડ ગૃપમા રાખતા હતા.
બે મુખ્ય હેકર્સે આશરે 50 હજાર કરતા વધારે સીસીટીવી છેલ્લા આઠ મહીનામાં હેક કર્યા છે, આ વિડીયોઝ ભારતના તમામ રાજ્યના હતા. જેમા કોર્પોરેટ ઓફીસ, સ્કુલ, કોલજ, મૂવી થીયેટર તથા ઘરના અંગત વિડીયોઝ આ લોકોએ હેક કર્યા છે. પોલીસે તમામ આરોપીના બેન્ક એકાઉન્ટ ફ્રીઝ કર્યા છે, ટેલીગ્રામ ચેનલ કે જેમા તમામ ગેરકાયદેસર પ્રવૃતિ ચાલે છે તેને પણ નોટીસ આપી છે. તમામ સોશ્યલ મીડીયા ચેનલને આવા વિડીયો ન મૂકવા અને મૂક્યા હોય તો દૂર કરવા નોટીસ આપી છે.
હોસ્પિટલમાં કેમેરા લગાવવા માટેના નિયમો આરોગ્ય વિભાગ ટૂંક સમયમાં જાહેર કરશે
તાજેતરમાં પાયલ હોસ્પિટલના સીસીટીવી હેક થયાં બાદ સરકારી હરકતમાં આવી છે. જયારે પાયલ હોસ્પિટલના સીસીટીવી હેક થયાં ત્યારે એક મુદ્દો એવો પણ ઉઠ્યો હતો કે, મહિલા દર્દીઓની તપાસ થતી હોય ત્યાં સીસીટીવી કેમેરા લગાવી શકાય નહિ ત્યારે હવે સરકાર હોસ્પિટલમાં સીસીટીવી લગાવવા અંગે ટૂંક સમયમાં જ નિયમો જાહેર કરી શકે તેવી પ્રબળ શક્યતા છે. રાજ્યના આરોગ્ય વિભાગે હોસ્પિટલો અને અન્ય ક્લિનિકલ સંસ્થાઓમાં સીસીટીવી કેમેરા લગાવવા માટે સ્ટાન્ડર્ડ ઓપરેટિંગ પ્રોસિજર (એસઓપી) બનાવવાનું શરૂ કર્યું છે. સોમવારે આ જાહેરાત કરતી વખતે રાજ્ય સરકારે એમ પણ કહ્યું હતું કે, રાજકોટના પાયલ મેટરનિટી હોમમાં તપાસ કરવામાં આવતી મહિલાના સીસીટીવી ફૂટેજ અને દેશના 20 રાજ્યોમાંથી આવી લગભગ 50,000 ક્લિપ્સને વર્ચ્યુઅલ પ્રાઇવેટ નેટવર્ક (વીપીએન) નો ઉપયોગ કરીને આંતરરાષ્ટ્રીય ગેંગ દ્વારા હેક કરવામાં આવી હતી.
અગાઉ કોંગ્રેસના ધારાસભ્યોના પ્રશ્નોના જવાબમાં રાજ્યના આરોગ્ય પ્રધાન રૂષિકેશ પટેલે સ્પષ્ટતા કરી હતી કે હોસ્પિટલોમાં સીસીટીવી કેમેરા લગાવવા માટે કોઈ માર્ગદર્શિકા નથી પરંતુ રાજ્યના આરોગ્ય વિભાગે આ વર્ષે 17 ફેબ્રુઆરીએ એક પરિપત્ર બહાર પાડીને તમામ એકમોને ખાતરી કરવા જણાવ્યું હતું કે દર્દીઓની શારીરિક તપાસ કરવામાં આવતી જગ્યાઓ પર સીસીટીવી કેમેરા લગાવવામાં ન આવે.
