DGPના આદેશ બાદ ગુજરાત પોલીસે 7612 ગુનેગારોની યાદી કરી તૈયાર
તમામ આરોપીઓની ગેરકાયદે મિલકતો અને આર્થિક વ્યવહારની થશે તપાસ
59 લોકો સામે પાસા હેઠળ કરાઈ કાર્યવાહી, 724 ઈસમો સામે લેવાયા અટકાયતી પગલાં
16ના ગેરકાયદે મકાનો પર ફર્યું બુલડોઝર

ગાંધીનગરઃ રાજ્યના DGP વિકાસ સહાયે તાજેતરમાં ગુજરાતના તમામ જિલ્લા પોલીસ વડાને તેમના જિલ્લામાં ગુનાહિત કામ કરતા અસામાજિક તત્વોનું લિસ્ટ તૈયાર 100 કલાકનો સમય આપ્યો હતો. ત્યારે આ પ્રકારના ગુનાહિત પ્રવૃતિઓ કરતા શખ્સોની યાદી તૈયાર કરી છે. SMC (સ્ટેટ મોનિટરિંગ સેલ) દ્વારા આવા 16 ગેરકાયદે મકાનો પર બુલડોઝર ફરી વળ્યું છે.

ગુજરાત પોલીસે કુલ 7612 અસામાજિક તત્વોની યાદી તૈયાર કરી છે. તેમાં 3,264 બુટલેગરો, 516 જુગારી, 2,149 શરીર સંબંધી ગુના કરનારા લોકો, 958 મિલકત સંબંધી ગુનાહિત પ્રવૃતિ ધરાવતા શખ્સોની યાદી તૈયાર કરી છે. આ ઉપરાંત 179 માઈની અને 545 અન્ય અસામાજિક પ્રવૃતિ કરતા શખ્સોની યાદી બનાવવામાં આવી છે. પોલીસે અસમાજિક તત્વો સામે નજર રાખી ગેરકાયદેસર દબાણો, વીજ જોડાણ અને અનઅધિકૃત નાણાંકીય વ્યવહારની તપાસ કરાશે.

અમદાવાદમાં 25, ગાંધીનગરમાં 6, બરોડમાં 2, સુરતમાં 7, મોરબીમાં 12 એમ કુલ 59 લોકો સામે પાસા હેઠળ ગુનો નોંધવામાં આવ્યો છે. આ ઉપરાંત 724 ઈસમો વિરુદ્ધ અટકાયતી પગલાં લીધા છે. તેમજ 16 ગેરકાયદેસર મકાનોમાં ડિમોલેશન કરવામાં આવ્યું છે.

આ ઉપરાંત 81 વીજ ચોરી કનેક્શન કાપી નાંખવામાં આવ્યા છે. તેમજ આગામી સમયમાં આશરે 100 પાસા અને 120 હદપારી, 265 અટકાયતી પગલાં, 200 જેટલા ડિમોલેશન, 225 ગેરકાયદેસર વીજ જોડાણ દૂર કરવામાં આવશે. તેમજ કોમ્બિંગ, નાઈટ પેટ્રોલિંગ, રેઈડ, વાહન ચેકિંગ, ગુનેગાર જમીન શરતભંગ હોય તેવાં કિસ્સામાં જામીન રદ કરવામાં આવશે.