- અમદાવાદ એરપોર્ટ પરથી વધુ એકવાર ડ્રગ્સ ઝડપાયું
- પેસેન્જરની બેગમાંથી 4.645 કિલોગ્રામ વજનના 10 પેકેટ પકડી લેતું કસ્ટમ વિભાગ: મુસાફરની આકરી પૂછપરછ
અમદાવાદના ઇન્ટરનેશનલ એરપોર્ટ ઉપરથી વધુ એકવાર ડ્રગ્સ ઝડપાયું છે. બેંગકોકથી આવેલી ફ્લાઈટમાં એક પેસેન્જર પાસેથી 4.645 કિલોગ્રામ હાઈડ્રોફોનિક વીડ મળી આવ્યું છે. જેની ઇન્ટરનેશનલ માર્કેટમાં કિંમત 7 કરોડથી પણ વધારે થવા જાય છે. ચાર દિવસમાં આ બીજો કેસ પકડાયો છે. આ પહેલા બેંગકોકથી અમદાવાદ આવેલી એક મહિલા પાસેથી 2349 ગ્રામ હાઈડ્રોફોનિક વીડ મળી આવ્યું હતું, જે ગાંજા કરતા પણ હાઈ ક્વોલીટીનું માનવામાં આવે છે. આ મહિલાની એનડીપીએસ એક્ટ હેઠળ ધરપકડ કરવામાં આવી હતી.
ડ્રગ્સ અંગે મળતી માહિતી મુજબ ગઈકાલે સવારે બેંગકોકથી અમદાવાદ આવેલા પેસેન્જર પાસેથી આ જ પ્રકારનું હાઇડ્રોફોનિક વીડ મળી આવતા તેની ધરપકડ કરવામાં આવી છે. આ પેસેન્જર બેગની અંદર 10 પેકેટ વેક્યુમ પેકિંગ કરીને લઈને આવ્યો હતો. જેની અંદર આ પ્રકારનો પ્રતિબંધિત ડ્રગ્સ છુપાવવામાં આવ્યું હતું. પણ કસ્ટમ વિભાગના અધિકારીઓએ તપાસ કરતા પેસેન્જર પકડાઈ ગયો હતો અને તેણે કોઈ સંતોષકારક જવાબ આપ્યો ન હોવાથી તેની ધરપકડ કરી લેવામાં આવી છે.
અમદાવાદના ઇન્ટરનેશનલ એરપોર્ટ ઉપર બેંગકોકની ફ્લાઈટમાંથી આવતા પેસેન્જર ડ્રગ્સ લઈને આવતા હોવાની માહિતીના આધારે કસ્ટમરના અધિકારીઓ પેસેન્જરની તપાસ કરી રહ્યા છે. એટલું જ નહીં કેરિયર અને પેસેન્જરોની પ્રોફાઈલના આધારે કસ્ટમર અધિકારીઓ તપાસ કરી રહ્યા છે. આ હાઇડ્રોફોનિક વીડ અમદાવાદમાં કોને આપવાનું હતું? અને પેસેન્જરને કેટલું કમિશન મળ્યું? તેની કસ્ટમ વિભાગના અધિકારીઓ તપાસ કરી રહ્યા છે. હવે આ પ્રકારનું ડ્રગ્સ અમદાવાદમાં વારંવાર આવી રહ્યું છે અને તેની પાછળ માત્ર અમદાવાદના જ નહીં ગુજરાતના ડ્રગ્સ માફીઆઓ કરોડો રૂપિયા ખર્ચ કરીને કેરિયરને વિદેશથી બોલાવી રહ્યા છે. ઉલ્લેખનીય છે કે, ચાર દિવસ પહેલા અમદાવાદના ઇન્ટરનેશનલ એરપોર્ટ ઉપર થાય એરલાઇન્સની ફ્લાઈટમાં બેંગકોકથી અમદાવાદ આવેલી થાઈલેન્ડની રહેવાસી પીમાલા સંપાને કસ્ટમરના અધિકારીઓએ 2349 ગ્રામના હાઇડ્રોફોનિક વીડ સાથે ઝડપી લઈને ધરપકડ કરી હતી. કસ્ટમના એર ઇન્ટેલિજન્સ યુનિટના મહિલા અધિકારી શીતલ પરમારે ધરપકડ કરી હતી. ત્યારબાદ મંગળવારના રોજ મોડીરાત્રે થાય એરલાઇન્સની બેંગકોકથી અમદાવાદ આવેલી ફ્લાઈટમાં મુસ્તાક અહેમદ ઉંમરભાઈ ભટ્ટી આ જ પ્રકારનું ડ્રગ્સ લઈને આવતા તેની કસ્ટમ વિભાગે ધરપકડ કરી છે. હવે અમદાવાદ એરપોર્ટ ઉપર પ્રતિબંધિત ડ્રગ્સની હેરાફેરી શરૂ થઈ ગઈ છે, જેના કારણે કસ્ટમ વિભાગ તમામ પેસેન્જર ઉપર નજર રાખી રહ્યું છે.