- વ્યારા-સોનગઢ ખાતે માનસ 953મી રામકથા સંપન્ન: હજારો રામભકતોએ પૂ.મોરારિબાપુની રામકથા શ્રવણનો લીધો લાભ મોરારિબાપુ
મોરારિબાપુ તાપી જિલ્લાના સોનગઢ ખાતે પુ. મોરારિબાપુના વ્યાસાસને તારીખ 8 માર્ચથી “માનસ રામકથા”નો પ્રારંભ થયો હતો.આ કથા એ રીતે એક નવા પગરણ પાડી રહી હતી કે જ્યાં વૈશ્વિક સનાતન હિંદુ ધર્મ તરફની શ્રદ્ધા વધુ બળવત્તર બનાવવાની જરૂરિયાત હોય. અગાઉ બાપુએ આજ અનાદિવાસી ભાઈ- બહેનોની વચ્ચે અનેક વખત કથાનું ગાન કર્યું છે. તેમાં વ્યારાની, શબરીધામ અને ખાડાની કથા પણ એ જ ક્રમમાં મુકી શકાય.આ સિવાય પણ બાપુ આ જ પ્રદેશમાં અનેક વખત વ્યાસપીઠ લઈને આવ્યા છે.આ કથાના મનોરથી એવા શ્રી મહેશભાઈ પટેલે કથાના પ્રારંભે સૌનો આભાર વ્યક્ત કર્યો હતો. પોતે ભલે અમેરિકામાં રહે છે પણ આ પ્રદેશ સાથે તેઓનું કોઈ સંધાન, કોઈ જોડાણ છે તેવું તેવું તેમણે જણાવ્યું હતું.
પુ. મોરારિબાપુ એ પોતાની વાણીને પવિત્ર કરતા આજની કથામાં કથાનો ક્રમ ખૂબ ઝડપથી લઈને આગળ વધ્યા હતા. ભગવાન રામનું વિશ્વામિત્ર સાથે મિલન અને રામ લક્ષ્મણનું સીતા સ્વયંવર માટે જનકપુરમાં આગમન અને પછી જાનકીજીના વિવાહનો પ્રસંગ, અયોધ્યામાં ઉત્સવનો માહોલ અને પછી રામ વનવાસ, દશરથજીનું નિર્વાણ અને પછી હનુમાનજીનું લંકા દહન વગેરેના પ્રસંગો સાથે સંક્ષિપ્તિકરણ કરીને રાવણ નિર્વાણની કથા કરીને ફરી અયોધ્યામાં રામરાજ્યના સ્થાપન સુધી કથાને લઈ જઈને વિરામ અપાયો હતો. પરંતુ બાપુએ સમગ્ર કથાના સાર ગર્ભમાં જઈને કેટલીક સૂત્રાત્મક વાતો કરી હતી. બાપુએ કહ્યું કે આ કથા રખેને કોઈ ના વિરોધની વાત આવી જતી હોય તો જરા સમજવા કોશિશ કરજો. હું કોઈનો વિરોધ લઈને નહીં પરંતુ ગુરુ મહારાજનો બોધ લઈને આવ્યો છું. વિવાદ લઈને નહીં હંમેશા સંવાદ લઈને આવ્યો છું. કોઈનો અપવાદ કે કોઈનો દુર્વાદ નહીં પરંતુ ઉત્તમ શ્લોક ગુણાનુવાદ એટલે ગુણાનુંવાદ લઈને આવ્યો છું.કોઈનો અસ્વીકાર નહીં પણ સૌનો સ્વીકાર, કોઈ લાભ લેવા નહીં પરંતુ આપ સૌના શુભ માટે આવ્યો છું.બાપુએ જે રીતે સનાતન હિંદુ ધર્મના વૈશ્વિક પરિપ્રેક્ષ્યમા જે વાતો રજૂ કરે તે માત્ર સૌને જ્યાં છે મહુવા કૈલાશ ગુરુકુળના સંવાહક જયદેવભાઈ માંકડ જણાવે છે કે બાપુએ અગાઉ જ્યારે બ્રાઝિલમાં એમેઝોનમાં કથાનું ગાન કરેલું તે દરમિયાન ત્યાં હોટલમાં સ્થિત સેવકો કર્મચારીઓ કે જે બધા જ ખ્રિસ્તી ધર્મી ભાઈ- બહેનો હતા. તેમણે પોતાનું નામ બદલવા માટે બાપુને વિનંતી કરી અને બાપુએ સાદર તે વાતનો અસ્વીકાર કરીને આપ જે નામધારી છો અને જે ઈષ્ટને માનો છો તે જ શ્રેય સમજો. તેનું જ પાલન કરો. હું કોઈ ધર્મ પરિવર્તનનો હિમાયતી નથી તેવું તેઓએ સાદર જણાવ્યું હતું. કથા દરમિયાન અનાદિવાસી ભાઈ બહેનોને ભજન, ભોજન અને જરૂરિયાતમંદને જ્યાં પણ ઉપયોગી થઈ શકાય તેવી સેવાઓ મનોરથી પરિવારે ખૂબ ઉત્તમ રીતે કરી હતી. એ રીતે આજે તારીખ 16 માર્ચ 2025ના રોજ 953મી કથાનું સમાપન થયું હતું.બાપુના વ્યાસાસને 954 મી કથા હવે દક્ષિણ અમેરિકા ખંડના આર્જેન્ટિના દેશમાં તા 29 માર્ચથી પ્રારંભાશે.
મહુવા, અંજાર અને અન્યત્ર અકસ્માતનો ભોગ બનેલના પરિવારને સહાય અર્પણ
ગત દિવસોમાં અનેક સ્થળે અકસ્માતોની ઘટનાઓ નોંધાઈ છે. મહુવા ના એક યુવક ધર્મેશભાઈ નું દાતરડી નજીક અકસ્માતમાં મોત થયું હતું. પૂજ્ય મોરારીબાપુએ મૃતકને શ્રદ્ધાંજલિ પાઠવી છે અને તેના પરિવારજનોને રૂપિયા 15,000ની સહાયતા રાશિ અર્પણ કરી છે. કચ્છના અંજાર ખાતે પાણીમાં બાળકો ડૂબી જતા ચાર બાળકોના મૃતદેહો મળ્યા છે અને એકની શોધ ચાલે છે. આ બાળકોના પરિવારજનોને 75,000 ની સહાયતા પાઠવી છે. એ સિવાય વડોદરામાં હિટ એન્ડ રનની ઘટનામાં એક મહિલાનું મોત નીપજ્યું છે. તેના પરિવારને પણ 15,000 ની સહાયતા અર્પણ કરી છે. રાણીગામ જેસરના એક યુવાન પત્રકાર વિક્રમભાઈનું અકાળે અવસાન થતાં તેના પરિવારજનોને 15,000 ની સહાયતા આપેલ છે.પૂજ્ય બાપુએ તમામ મૃતકોના નિર્વાણ માટે પ્રાર્થના કરી છે. આ વિતીય સેવા સોનગઢ રામકથાના મનોરથી જગુભાઈ દ્વારા કરવામાં આવશે.
