- ઇઝરાયલી વડાપ્રધાન બેન્જામિન નેતન્યાહૂએ હમાસ માટે ચેતવણી જારી કરી: શનિવારે બપોર સુઘીનું અલ્ટીમેટમ આપ્યું
ઇઝરાયલી વડા પ્રધાન બેન્જામિન નેતન્યાહૂએ મંગળવારે કહ્યું હતું કે જો 15 ફેબ્રુઆરી, શનિવાર બપોર સુધીમાં બંધકોને મુક્ત કરવામાં નહીં આવે તો ગાઝામાં યુદ્ધવિરામ કરાર સમાપ્ત થઈ જશે. નેતન્યાહૂએ આ ચેતવણી એવા દિવસના જવાબમાં આપી હતી જ્યારે હમાસે જાહેરાત કરી હતી કે તે યુદ્ધવિરામ કરારના “ઇઝરાયલી ઉલ્લંઘન” બદલ ઇઝરાયલી બંધકોને મુક્ત કરવાનું બંધ કરશે.
નેતન્યાહૂએ એક વીડિયો જાહેર કરીને કહ્યું, ’હમાસનો પરાજય ન થાય ત્યાં સુધી સેના તેની લડાઈ ચાલુ રાખશે’. હમાસે સોમવારે ઇઝરાયલ પર યુદ્ધવિરામ કરારનું ઉલ્લંઘન કરવાનો આરોપ લગાવ્યો હતો અને કહ્યું હતું કે ગાઝાએ ઇઝરાયલી બંધકોની મુક્તિને આગામી સૂચના સુધી અવરોધિત કરી છે. હમાસના આ નિર્ણય બાદ બંને વચ્ચે ફરી સંઘર્ષ શરૂ થવાનો ભય વધી ગયો છે.
હમાસ લશ્કરી પાંખના પ્રવક્તા અબુ ઉબૈદાએ જણાવ્યું હતું કે શનિવારે થનારી આગામી બંધક મુક્તિ ત્યાં સુધી મુલતવી રાખવામાં આવશે જ્યાં સુધી ઇઝરાયલ યુદ્ધવિરામ કરારનું પાલન ન કરે અને પાછલા અઠવાડિયાની ભરપાઈ ન કરે.
અબુ ઉબૈદાએ ઇઝરાયલ પર પેલેસ્ટિનિયનો પર ગોળીબાર કરવાનો, ઉત્તરી ગાઝામાં લોકોના પાછા ફરવામાં વિલંબ કરવાનો અને માનવતાવાદી સહાયને પટ્ટી સુધી પહોંચતા અટકાવવાનો આરોપ મૂક્યો. તેમણે કહ્યું કે શનિવારે ઇઝરાયલી અને પેલેસ્ટિનિયન બંધકોની અદલાબદલીનું આયોજન કરવામાં આવ્યું હતું, જેમાં સેંકડો પેલેસ્ટિનિયન કેદીઓના બદલામાં વધુ ત્રણ ઇઝરાયલી બંધકોને મુક્ત કરવામાં આવશે.
હમાસના પ્રવક્તાએ એમ પણ કહ્યું કે 19 જાન્યુઆરીથી શરૂ થયેલ યુદ્ધવિરામ મોટાભાગે અકબંધ છે. જોકે, એવી કેટલીક ઘટનાઓ બની છે જેમાં ઇઝરાયલી સેના દ્વારા પેલેસ્ટિનિયનોની હત્યા કરવામાં આવી છે અને હમાસે તે જે બંધકોને મુક્ત કરવા માંગતો હતો તેમના નામ જાહેર કરવામાં વિલંબ કર્યો છે. સહાય એજન્સીઓનું કહેવું છે કે યુદ્ધવિરામ પછી ગાઝામાં પહોંચતી માનવતાવાદી સહાયની માત્રામાં વધારો થયો છે.
