ભારત અત્યારે વિશ્વ ક્રિકેટ ચલાવી રહ્યું છે : ઇમરાનનો બફાટ

ન્યુઝીલેન્ડ અને ઈંગ્લેન્ડ બન્નેએ પાકિસ્તાનમાં ક્રિકેટ મેચ રમવાનું રદ કર્યું હોય પાકના વડાપ્રધાન ઇમરાન ખાને તેની દાઝ ભારત ઉપર ઉતારી

અબતક, નવી દિલ્હી : ન્યુઝીલેન્ડ અને ઈંગ્લેન્ડ બન્નેએ પાકિસ્તાનમાં ક્રિકેટ મેચ રમવાનું રદ કર્યું હોય પૂર્વ ક્રિકેટર અને હાલના પાકિસ્તાનના વડાપ્રધાન ઇમરાન ખાને તેની દાઝ ભારત ઉપર ઉતારી છે. તેઓએ બફાટ કરતા જણાવ્યું કે ભારત અત્યારે વિશ્વ ક્રિકેટ ચલાવી રહ્યું છે. તેનું બોર્ડ ધનવાન હોય તે કહે તે જ થાય છે.

ન્યુઝીલેન્ડની ટીમે પાકિસ્તાન પ્રવાસની વચ્ચેથી ઘરે પરત ફરવાનું મન બનાવી લીધું હતું. આ ટીમ 3 વનડે અને 5 ટી 20 રમવા માટે પાકિસ્તાન આવી હતી. પરંતુ જ્યારે પહેલી વનડે રાવલપિંડીમાં રમાવાની હતી. તે જ ન્યૂઝીલેન્ડની ટીમ ડરી ગઈ અને ઘરે જવાનું નક્કી કર્યું. ન્યૂઝીલેન્ડની સ્થિતિ અને મૂડ જોઈને ઈંગ્લેન્ડને પણ પાકિસ્તાનની મુલાકાત લેવાનું મન થયું નહીં, જે તેની પુરુષ અને મહિલા બંને ટીમો સાથે પાકિસ્તાન પહોંચવાનું હતું.

હવે પાકિસ્તાન ક્રિકેટના ભૂતપૂર્વ કેપ્ટનથી દેશના વડાપ્રધાન બનેલા ઈમરાન ખાન આ સમગ્ર મામલા માટે ભારતને જવાબદાર ઠેરવતા હોય તેવું લાગે છે. તેમણે કહ્યું કે હવે ખેલાડીઓ માટે પૈસા મહત્વના થવા લાગ્યા છે, જે ભારતથી આવે છે. આઈસીસીનું મોટાભાગનું ભંડોળ બીસીસીઆઈ તરફથી આવે છે. તેની સૌથી વધુ કમાણી બીસીસીઆઈ અને ભારતીય બજારોને કારણે છે. આ જ કારણ છે કે, પાકિસ્તાન સિવાય કોઈ પણ દેશ ભારત સામે જવા માંગતો નથી.

એક ઈન્ટરવ્યુમાં ઈમરાન ખાને કહ્યું કે, મને લાગે છે કે ઈંગ્લેન્ડ તે દેશોમાંથી એક છે જે પાકિસ્તાન સાથે ક્રિકેટ રમવા માંગે છે. પરંતુ પૈસા એ મોટી વસ્તુ છે અને સૌથી મોટું કારણ જે તેને આમ કરવાથી રોકી રહ્યું છે. ” તેમણે કહ્યું, “ખેલાડીઓ અને ક્રિકેટ બોર્ડ માટે હવે પૈસા સૌથી મહત્વની વસ્તુ છે. અને, તેઓ ભારતમાંથી પૈસા મેળવે છે. સરળ શબ્દોમાં કહીએ તો, ભારત અત્યારે વિશ્વ ક્રિકેટ ચલાવી રહ્યું છે.

મારો મતલબ કે તે જે કહે છે, તે બાકી લોકો કરે છે. કોઈ પણ ભારતની વિરુદ્ધ જવાની હિંમત કરતું નથી કારણ કે, તેમની કમાણીનો ભાગ ત્યાં જોડાયેલ છે. ક્રિકેટમાં ઉભા થયેલા મોટા ભાગના નાણાં ભારતમાંથી આવે છે. થોડા દિવસો પહેલા પાકિસ્તાન ક્રિકેટ બોર્ડના નવા અધ્યક્ષ રમીઝ રાજાએ પણ એ જ વાત કહી હતી કે ભારત આઈસીસીને સૌથી વધુ ફંડ આપે છે. તે વિશ્વમાં ક્રિકેટ ચલાવી રહ્યો છે.