- વિમેન્સ ટીમે નેપાળને 78-40ના મોટા માર્જિનથી હરાવ્યું જયારે મેન્સ ટીમે પણ નેપાળને જ હરાવ્યું, પરંતુ માર્જિન 54-36 રહ્યુ
ભારતીય મેન્સ અને વિમેન્સ ટીમે પ્રથમ ખો-ખો વર્લ્ડ કપ જીતી લીધો છે. રવિવારે નવી દિલ્હીના ઇન્દિરા ગાંધી ઇન્ડોર સ્ટેડિયમ ખાતે બંને કેટેગરીની ફાઇનલ રમાઈ હતી. વિમેન્સ ટીમે નેપાળને 78-40ના મોટા માર્જિનથી હરાવ્યું. મેન્સ ટીમે પણ નેપાળને હરાવ્યું, પરંતુ માર્જિન 54-36 હતું. ખો-ખો વર્લ્ડ કપ 13થી 19 જાન્યુઆરી દરમિયાન નવી દિલ્હીમાં રમાયો હતો. બંને ભારતીય ટીમો ટુર્નામેન્ટમાં અપરાજિત રહી. જ્યારે નેપાળની બંને ટીમોને ભારત સામે હારનો સામનો કરવો પડ્યો હતો. ચેમ્પિયન બન્યા પછી બંને ભારતીય ટીમોએ તિરંગા સાથે વિજયી રાઉન્ડ લગાવ્યો. મેન્સની ફાઇનલમાં, નેપાળે ટોસ જીતીને ડિફેન્સ પસંદ કર્યું. પ્રથમ ઇનિંગમાં ભારતે 26 પોઈન્ટ મેળવ્યા હતા જ્યારે નેપાળને એક પણ પોઈન્ટ મળ્યો ન હતો. ટીમ ઈન્ડિયા પણ એક વખત નેપાળને ઓલઆઉટ કરવામાં સફળ રહી હતી. ભારતે પ્રથમ ઇનિંગમાં 26-0ની લીડ મેળવી હતી. નેપાળે બીજા દાવમાં ચેઝ કર્યો અને ટીમે 18 પોઈન્ટ મેળવ્યા. હાફ ટાઇમ પછી સ્કોર 26-18 ભારતની તરફેણમાં હતો. ભારતે ત્રીજી ઇનિંગમાં 28 પોઇન્ટ મેળવ્યા. નેપાળની ટીમ 4 મિનિટમાં જ ઓલઆઉટ થઈ ગઈ, ટીમ એક પણ ડ્રીમ રન બનાવી શકી નહીં. ત્રીજા ટર્ન પછી ભારતે 54-18થી પોતાની લીડ જાળવી રાખી. ચોથા ટર્નમાં પણ નેપાળની ટીમ ફક્ત 18 પોઇન્ટ જ મેળવી શકી અને ભારતે 54-36ના માર્જિનથી વર્લ્ડ કપ જીત્યો. વિમેન્સ ખો-ખો વર્લ્ડ કપની ફાઇનલ શરૂ થઈ. નેપાળે ટોસ જીતીને ડિફેન્સ કરવાનો નિર્ણય લીધો. ભારતે પહેલી ઇનિંગમાં એકતરફી વર્ચસ્વ બતાવ્યું અને 34 પોઇન્ટ મેળવ્યા. નેપાળે બીજા દાવમાં ચેઝ કરીને 24 પોઈન્ટ મેળવ્યા, આ બદલામાં ભારતને પણ એક પોઈન્ટ મળ્યો. હાફ ટાઇમ પછી, ભારતે 35-24 ની લીડ જાળવી રાખી.
મેન્સ-વિમેન્સ ટિમ ટુર્નામેન્ટની એકપણ મેચ હારી નહીં
વિમેન્સ ગ્રુપમાં 19 ટીમોએ ભાગ લીધો હતો. ભારતીય વિમેન્સ ગ્રુપ એમાં ઈરાન, મલેશિયા અને દક્ષિણ કોરિયા સાથે હતી. ટીમે દક્ષિણ કોરિયાને 176-18, ઈરાનને 100-16 અને મલેશિયાને 100-20થી હરાવ્યું હતું. ટીમે ગ્રુપ સ્ટેજમાં ટોપ પર રહીને ક્વાર્ટર ફાઇનલમાં જગ્યા બનાવી હતી.ક્વાર્ટર ફાઇનલમાં ભારતે બાંગ્લાદેશને 109-16ના માર્જિનથી હરાવ્યું હતું. સેમિફાઇનલમાં તેણે દક્ષિણ આફ્રિકા સામેની મેચ 66-16થી જીતી લીધી હતી. ફાઈનલમાં પણ ભારતીય વિમેન્સનો દબદબો જોવા મળ્યો હતો અને ટીમે 78-40ના માર્જીનથી મેચ જીતી લીધી હતી. સમગ્ર ટુર્નામેન્ટમાં નેપાળ એકમાત્ર એવી ટીમ હતી જેની ભારત સામે હારનું માર્જીન 50 પોઈન્ટથી ઓછું હતું. મેન્સોની સ્પર્ધામાં 20 ટીમોએ ભાગ લીધો હતો. ભારતના ગ્રુપમાં પેરુ, બ્રાઝિલ, ભૂટાન અને નેપાળનો સમાવેશ થતો હતો. ટીમે નેપાળને 42-37, બ્રાઝિલને 66-34, પેરુને 70-38 અને ભૂટાનને 71-34થી હરાવ્યું. ક્વાર્ટર ફાઇનલમાં ભારતે શ્રીલંકા સામે 100-40ના માર્જિનથી જીત મેળવી. ટીમે સેમિફાઇનલમાં દક્ષિણ આફ્રિકાને 62-42થી હરાવ્યું.