- અમેરિકામાં 800 ડોલર સુધીના દાગીના મોકલવા ડ્યુટી ફ્રી: 2025માં યુએસ જ્વેલરી ઈકોમર્સ માર્કેટ 6608 મિલિયન ડોલર સુધી પહોંચવાનો અંદાજ
ટ્રમ્પે 2 એપ્રિલથી ટેરીફ લાદવાની ધમકી આપી છે. તેથી ભારતીય જ્વેલરી નિકાસકારો યુએસમાં સંભવિત ખરીદદારોમાં ઓનલાઈન વેચાણ વધારવા માટે ડિજિટલ માર્કેટિંગનો ઉપયોગ કરી રહ્યા છે. અમેરિકા 800 ડોલર સુધીના દાગીનાને દેશમાં ડ્યુટી ફ્રી અને ન્યૂનતમ કસ્ટમ નિરીક્ષણ અને પ્રક્રિયા સાથે પ્રવેશવાની મંજૂરી આપે છે.
પોસ્ટલ અને એક્સપ્રેસ ડિલિવરી સેવાઓ દ્વારા મોકલવામાં આવતી આ મોટાભાગની આયાતો ઓનલાઈન ખરીદેલી રિટેલ પ્રોડક્ટ્સ છે. “મિનિમિસ મુક્તિ તરીકે ઓળખાતા, અમેરિકાએ ચીનને પહેલેથી જ જણાવી દીધું છે કે તે આ સુવિધા આપવાનું બંધ કરશે. જોકે, ભારતને આવા કોઈ સંકેત મળ્યા નથી,” જેમ્સ એન્ડ જ્વેલરી એક્સપોર્ટ પ્રમોશન કાઉન્સિલના એક્ઝિક્યુટિવ ડિરેક્ટર સબ્યસાચી રેએ જણાવ્યું હતું. “અમે વ્યવસાયોને આ માર્ગનો ઉપયોગ કરવા માટે જાગૃત કરી રહ્યા છીએ જેથી તેઓ સીધા ગ્રાહકો સુધી ઓનલાઈન પહોંચી શકે.”
ફેબ્રુઆરીની શરૂઆતમાં, ટ્રમ્પ વહીવટીતંત્રે જાહેરાત કરી હતી કે તે ચીનથી આવતા ઓછા મૂલ્યના શિપમેન્ટ માટે “મિનિમિસ મુક્તિ” તાત્કાલિક સમાપ્ત કરશે. આ જાહેરાતને કારણે યુએસ પ્રવેશ બંદરો પર પેકેજોનો બેકલોગ થયો. જ્યારે કસ્ટમ્સ અને બોર્ડર પ્રોટેક્શનને ખ્યાલ આવ્યો કે તે આટલા મોટા પેકેજોનો સામનો કરવા માટે તૈયાર નથી, ત્યારે ટ્રમ્પ વહીવટીતંત્રે પીછેહઠ કરી અને જાહેરાત કરી કે તે આખરે ચીન માટે મુક્તિ સમાપ્ત કરવા માટે એક પ્રક્રિયા બનાવશે.
જીજેઇપીસીની આગાહી મુજબ, 2025 માં યુએસ જ્વેલરી ઈકોમર્સ માર્કેટ 6,608.1 મિલિયન ડોલર સુધી પહોંચવાની ધારણા છે. આગામી ચાર વર્ષ માટે અપેક્ષિત ચક્રવૃદ્ધિ વાર્ષિક વૃદ્ધિ દર (2025-2029 માટે સીએજીઆર) 3.9% છે, જેના પરિણામે 2029 સુધીમાં અંદાજિત બજાર વોલ્યુમ 7,714.9 મિલિયન ડોલર થશે.
જીજેઇપીસીના ચેરમેન કિરીટ ભણસાલીએ જણાવ્યું હતું કે કાઉન્સિલ, અમેરિકન જ્વેલરી રિટેલર્સ સાથે મળીને અમેરિકામાં ભારતીય જ્વેલરીનો પ્રચાર કરી રહી છે, જે ઈ-કોમર્સ દ્વારા ખરીદી શકાય છે.”વૈશ્વિક વેપાર બહુપક્ષીયથી દ્વિપક્ષીય માળખા તરફ આગળ વધી રહ્યો છે, ત્યારે ડી મિનિમિસ સિદ્ધાંત – નાના-મૂલ્ય, ડાયરેક્ટ-ટુ-ક્ધઝ્યુમર પાર્સલ માટે ડ્યુટી-મુક્ત પ્રવેશની મંજૂરી આપે છે – ભારતીય નિકાસકારો, ખાસ કરીને રત્નો અને ઝવેરાત નિકાસકારોને નોંધપાત્ર ફાયદો આપે છે,” ભણસાલીએ જણાવ્યું હતું. “આ સરળ પ્રક્રિયા વિશ્વભરના ગ્રાહકોને કોઈપણ ફી વિના સીધી ઍક્સેસ પ્રદાન કરે છે. એવો અંદાજ છે કે 70-80% ઈ-કોમર્સ નિકાસ 200 ડોલર કરતા ઓછી હોય છે, જે રત્નો અને ઝવેરાતને તેમના ઓછા વજનને કારણે આદર્શ બનાવે છે, જે લોજિસ્ટિક્સ ખર્ચ ઘટાડે છે.” વેપાર સૂત્રોએ જણાવ્યું હતું કે ઘણા મધ્યમ અને નાના કદના ભારતીય જ્વેલરી રિટેલર્સ વિવિધ ઈ-કોમર્સ સાઇટ્સ દ્વારા અમેરિકામાં તેમના ઉત્પાદનો વેચી રહ્યા છે.
