ઘંટેશ્વર વિસ્તારના રહેણાંકમાં થયેલી રૂ.1.80 લાખની ચોરીનો ભેદ ઉકેલતી ગાંધીગ્રામ પોલીસ : ભરત સોલંકી અને મહંમદ ચૌહાણની ધરપકડ
ગાંધીગ્રામ પોલીસ મથકના હેડ કોન્સ્ટેબલ મશરીભાઈ ભેટારીયા, કોન્સ્ટેબલ મુકેશ સબાડ, અને પ્રદિપ ડાંગર સહિતની ટીમે તમામ મુદ્દામાલ રિકવર કર્યો

ગાંધીગ્રામ પોલીસ મથકે અરજી કરવા ગયેલા મહિલાના ઘંટેશ્વર 25 વારિયામાં આવેલ બંધ મકાનમાંથી રૂા. 1.80 લાખની ચોરી થયાની ગાંધીગ્રામ પોલીસ મથકમાં ફરિયાદ નોંધાઈ હતી. જેના આધારે પોલીસે તપાસ આગળ ધપાવી ચોરી કરનાર બે તસ્કરોને ઝડપી લીધા હતા. ઉલ્લેખનીય છે કે, અગાઉ થયેલા ઝગડાનો ખાર રાખી પાડોશીઓએ જ ચોરીને અંજામ આપ્યો હતો. બનાવ અંગે, ઘંટેશ્વર 25 વારિયામાં રહેતા સુમિત્રાબા દિલીપસિંહ રાઠોડ (ઉ.વ.41)એ નોંધાવેલી ફરિયાદમાં જણાવ્યું છે કે, ગઈ તા. 14 માર્ચનાં રોજ પાડોશમાં રહેતા સંજય સોલંકી સાથે મારામારીનો બનાવ બનતાં મકાનને તાળુ મારી પરિવારજનો સાથે સિવિલ હોસ્પિટલમાં સારવાર માટે આવ્યાં હતાં. સારવાર પૂર્ણ થયા બાદ ગાંધીગ્રામ પોલીસ મથકે અરજી આપવા ગયા હતા. જ્યાંથી સાંજે ઘરે જઈને જોયું તો મકાનના મુખ્ય દરવાજાનો નકૂચો તૂટેલો હતો. સામાન બધો અસ્તવ્યસ્ત પડ્યો હતો. રૂમમાં કબાટનો દરવાજો ખુલ્લો જોવા મળ્યો હતો. તેમાં રહેલા તિજોરીમાંથી સોનાની કાનસર, સોનાનો દાણો, ચાંદીના સાંકળા, ચાંદીનો ઝૂડો, ચાંદીની લક્કી, સોનાની વીંટી, સોનાની બુટી સહિતના દાગીના ગાયબ હતા.મંદિરમાંથી રૂા.2200નું ચિલ્લર મળી કુલ રૂા. 1.80 લાખની મત્તાની ચોરી થઈ ગઈ હતી.

બનાવ અંગે ગાંધીગ્રામ પોલીસ મથકના પીએસઆઇ એસ.બી.જાડેજાની રાહબરીમાં પીએસઆઈ એસ.બી.જાડેજા અને ટીમે હેડ કોન્સ્ટેબલ મશરીભાઈ ભેટારીયા, કોન્સ્ટેબલ મુકેશભાઈ સબાડ, અને પ્રદિપભાઈ ડાંગરે ઘણાં સીસીટીવી કેમેરા જોઈ અને બાતમીદારોને કામે લગાડી ચોરીનો ભેદ ઉકેલી લઈ બે આરોપી ભરત મનજી સોલંકી (ઉ.વ.45) અને મહંમદ ઉર્ફે લાલો સતાર ચૌહાણ (ઉ.વ.25) (રહે. બંને ઘટેશ્વર 25 વારીયા કવાર્ટર, જામનગર રોડ)ને ઝડપી લીધા હતા.

પોલીસે વધુમાં જણાવ્યું હતું કે, બંને આરોપીઓ ફરિયાદીના પાડોશી થતાં હોય જેથી મહિલા સિવિલ હોસ્પિટલે ગઈ હોય તેવી માહિતી મળતાં જ બંનેએ ચોરીને અંજામ આપ્યો હતો. આરોપી પાસેથી મોટાભાગનો મુદ્દામાલ અને ચોરીમાં ઉપયોગમાં લીધેલ પકડ, ડિસમીશ અને હથોડી કબજે કર્યા હતા. આરોપી ભરત વર્ષ 2019 માં મહિલા પોલીસમાં પોકસો અને દૂષ્કર્મના કેસમાં પકડાઈ ચુકયો છે. બીજો આરોપી મહંમદ મારામારી, દારૂ સહિતના 8 ગુનામાં પકડાઈ ચુકયો છે.