ન્યાયતંત્ર કોર્ટરૂમમાં સુધી સીમિત રહી શકે નહીં: કાયદા મંત્રી
ગુરુવારે કેન્દ્રીય કાયદા મંત્રીએ એક સૂચક નિવેદન આપતા કહ્યું છે કે, ન્યાયાધીશોએ ફિલ્ડમાં જવું જોઈએ અને લોકોને ઘર આંગણે ન્યાય આપવો જોઇએ. કાયદા મંત્રીનું આ નિવેદન ખૂબ જ સૂચક છે. આગામી દિવસોમાં હવે લોકોએ ન્યાય માટે કોર્ટ સુધીના ધક્કા નહીં ખાવા પડે અને તેમને ઘર આંગણે જ ન્યાય મળી રહેશે તેવી વ્યવસ્થા ગોઠવવા તરફ કેન્દ્રએ ધ્યાન કેન્દ્રિત કર્યું હોય તેવું લાગી રહ્યું છે.
રિજિજુએ કહ્યું, મેં ચીફ જસ્ટિસ ઓફ ઇન્ડિયાને કહ્યું છે કે, માત્ર કોર્ટરૂમમાંથી જ ચુકાદો આપવો જરૂરી નથી, પરંતુ ન્યાયાધીશો મેદાનમાં જઈને લોકોના ઘરઆંગણે ન્યાય આપી શકે છે. તેમણે ઉમેર્યું હતું કે, ન્યાયતંત્રનો વ્યાપ વધારવો જોઈએ અને ન્યાય કોર્ટરૂમમાં બંધાયેલો નથી.
રિજિજુએ કહ્યું કે, દેશની વિશાળતા અને તેની વિવિધતાનો ઉલ્લેખ કરતી વખતે આપણા કમ્ફર્ટ ઝોનમાંથી બહાર નીકળવાનો અને સીમાઓ દ્વારા મર્યાદિત ન રહેવાનો સમય આવી ગયો છે. આપણે આટલો મોટો દેશ છીએ, આપણે જેમાંથી પસાર થયા છીએ, આપણે જે મુશ્કેલીઓનો સામનો કરીએ છીએ અને લોકો સુધી પહોંચવામાં સમસ્યાઓનો અનુભવ કોઈએ કર્યો નથી. અમારી સરકાર તમામ પ્રકારના સૂચનો માટે ખુલ્લી છે તેવું તેમણે ઉમેર્યું હતું.
કાયદા મંત્રાલયે નાલસર યુનિવર્સિટી, હૈદરાબાદના સહયોગથી બંધારણ પર પ્રમાણપત્ર અભ્યાસક્રમ શરૂ કર્યો છે. રિજિજુએ કહ્યું કે સરકાર ઘણા કાર્યક્રમો પર કામ કરી રહી છે જેમાં કાયદા પ્રધાન અને ભારતના મુખ્ય ન્યાયાધીશ અને સુપ્રીમ કોર્ટના ન્યાયાધીશો સામેલ થશે.
