અબતક, ચંદીગઢ
પંજાબના પઠાણકોટ શહેરમાં શુક્રવારની રાત્રે આકાશમાં જોવા મળેલી રહસ્યમય રોશનીથી નાગરિકોને આશ્ચર્યચકિત કરી દીધા હતા. આ પ્રકાશ સાંજે 7 વાગ્યાની આસપાસ દેખાયો હતો. કેટલાક લોકોએ આ ઘટનાને કેમેરામાં કેદ કરીને સોશિયલ મીડિયા પર પોસ્ટ પણ કરી હતી. એક પોસ્ટમાં કહેવામાં આવ્યું છે કે જમ્મુ-પઠાણકોટમાં આકાશમાં એક રહસ્યમય પ્રકાશ જોવા મળ્યો છે.
એક સ્થાનિક રહેવાસીએ કહ્યું હતું કે, અમે આકાશમાં એક તેજસ્વી વસ્તુને તેજ ગતિએ ફરતી જોઈ હતી. તે એકદમ ટ્રેનના આકાર જેવી લાંબી હતી. તે આકાશમાં દોડતી ટ્રેન જેવો દેખાતી હતી. તેમાંથી આવતો પ્રકાશ ખૂબ જ તેજસ્વી હતો. આપણે આપણા જીવનમાં પહેલીવાર આવું કંઈક જોયું છે. અમે લગભગ પાંચ મિનિટ સુધી તેને જોતા રહ્યા અને તે પછી તે અચાનક ગાયબ થઈ ગયો. આ ખૂબ જ આશ્ચર્યજનક ઘટના છે.
ભેદી પ્રકાશની ઘટનાનો વીડિયો સોશિયલ મીડિયામાં ઝડપથી થઈ રહ્યો છે વાયરલ
આ ઘટનાનો વીડિયો અને તસવીરો સોશિયલ મીડિયા પર વાયરલ થઈ રહી છે. લોકો આ રહસ્યમય પ્રકાશને લઈને અનેક અટકળો લગાવી રહ્યા છે.
જોકે આ પ્રકાશ કોઈ વસ્તુનો હતો કે કેમ તે સ્પષ્ટપણે જાણી શકાયું નથી. આ વર્ષની શરૂઆતમાં ગુજરાતના જૂનાગઢ અને તેની આસપાસના વિસ્તારોમાં સમાન રહસ્યમય પ્રકાશ જોવા મળ્યો હતો. ત્યારે નિષ્ણાતોએ અનુમાન લગાવ્યું હતું કે તે ઉપગ્રહનો પ્રકાશ હોઈ શકે છે.
