એકાદ મહિના બાદ કોરોનાના કેસો વધવાની શકયતા, પણ ગંભીર લક્ષણો નહિ હોય : લોકોની માત્ર થોડા દિવસોની સાવચેતી આખા ગુજરાતને સુરક્ષિત રાખશે
અબતક, નવી દિલ્હી : કોરોનાએ વિશ્વમાં હાહાકાર મચાવ્યો છે. એકાદ મહિના બાદ કોરોનાના કેસો વધવાની શકયતા સેવાઈ રહી છે. જો કે રાહતના સમાચાર એ છે કે નવા કેસોમાં ગંભીર લક્ષણો નહિ હોય. માટે જો લોકો એકાદ મહિનો તમામ તકેદારી રાખશે તો કોરોનાના કેસો વધશે નહિ.
ચીનમાં કોરોના વાયરસની નવી લહેરને કારણે વિશ્વ આખું ચિંતામાં મુકાઈ ગયું છે. સત્તાવાર સૂત્રોનું માનીએ તો ભારત માટે આગામી 30 થી 35 દિવસ ભારે બની શકે છે. કારણ કે જાન્યુઆરીમાં કોરોનાના કેસમાં વધારો થઈ શકે છે તેવું નિષ્ણાંતોએ જાહેર કર્યું છે. ભૂતકાળના વલણોને જોતા ભારતમાં ફરી એકવાર કોરોનાના કેસમાં વધારો થવાનો દાવો કરવામાં આવી રહ્યો છે.હકીકતમાં, અગાઉ પણ એવું જોવા મળ્યું છે કે કોવિડ -19 ની નવી લહેર પૂર્વ એશિયાને અસર કર્યાના 30 થી 35 દિવસ પછી જ ભારતમાં પહોંચી હતી. એટલા માટે તે એક ટ્રેન્ડ બની ગયો છે, જેના આધારે આ દાવો કરવામાં આવી રહ્યો છે.
સ્વાસ્થ્ય મંત્રાલયના એક સૂત્રએ જણાવ્યું કે ચીનમાં કોવિડ વેવનું કારણ ઓમિક્રોનનું સબ-વેરિઅન્ટ બીએફ7 છે. આ પેટા વેરિઅન્ટ ખૂબ જ ઝડપથી ચેપ ફેલાવે છે અને એક સમયે 16 લોકોને ચેપ લગાવી શકે છે. જો કે, સ્વાસ્થ્ય મંત્રાલયના સૂત્રોનું કહેવું છે કે આ વખતે કોરોના સંક્રમણ લોકો માટે બહુ ગંભીર નથી. આવી સ્થિતિમાં, જો લહેર આવે તો પણ દર્દીઓના મૃત્યુ અને હોસ્પિટલમાં દાખલ થવાની સંખ્યા ઘણી ઓછી હશે. બીજી તરફ, આરોગ્ય મંત્રાલય કોરોનાના નવા પ્રકાર બીએફ7 પર દવા અને રસી કેટલી અસરકારક છે તેનો અભ્યાસ કરી રહ્યું છે.
છેલ્લા બે-ત્રણ દિવસમાં 6 હજાર આંતરરાષ્ટ્રીય મુસાફરોની તપાસ કરવામાં આવી છે, જેમાંથી 39 આંતરરાષ્ટ્રીય મુસાફરો કોરોના પોઝિટિવ મળી આવ્યા છે. તેને જોતા આરોગ્ય મંત્રી મનસુખ માંડવિયા આજે દિલ્હી એરપોર્ટ પર પહોંચીને માહિતી મેળવશે.
દેશમાં હાલ 3468 એક્ટિવ કેસ
સ્વાસ્થ્ય વિભાગ દ્વારા જારી કરવામાં આવેલા આંકડા અનુસાર, બુધવારે ભારતમાં કોરોનાના 188 નવા કેસ જોવા મળ્યા હતા, ત્યારબાદ કોરોનાના કુલ સક્રિય કેસની સંખ્યા વધીને 3 હજાર 468 થઈ ગઈ છે. હાલમાં, ભારતમાં દૈનિક પોઝિટિવિટી દર 0.14 ટકા છે જ્યારે સાપ્તાહિક 0.18 ટકા છે.
ભારતીયો પાસે વધુ રોગપ્રતિકારક શક્તિ તે મોટો ફાયદો
કેલિફોર્નિયા સ્થિત સ્ક્રિપ્સ રિસર્ચ ઇન્સ્ટિટ્યૂટના જણાવ્યા અનુસાર, બીએફ 7 વેરિઅન્ટ કે જેણે ચીનમાં અફરાતફરી મચાવી છે, ફેબ્રુઆરી 2021 થી 90 દેશોમાં આવા આનુવંશિકતા સાથેનો પ્રકાર દેખાયો છે. તે ઓમિક્રોનના બીએ 5 સબ વેરિઅન્ટ ગ્રૂપનો એક ભાગ છે. નિષ્ણાતોનું માનવું છે કે ભારત પર તેની વધુ અસર નહીં થાય. તેની પાછળનું સૌથી મોટું કારણ એ છે કે ભારતની મોટાભાગની વસ્તી ડબલ રોગપ્રતિકારક શક્તિ ધરાવે છે, ડબલ એટલે કે એક કુદરતી રોગપ્રતિકારક શક્તિ અને એક જે રસી પછી લોકોના શરીરમાં રોગપ્રતિકારક શક્તિ બની ગઈ છે.
વિશ્વના અનેક દેશોમાં ચીની લોકોએ ચેપ ફેલાવ્યો
ચીનથી ઈટાલી જતી ફ્લાઈટના અડધા મુસાફરો કોરોનાથી સંક્રમિત હોવાનું બહાર આવ્યા બાદ હંગામો મચી ગયો હતો. આ કારણે ચીનથી અન્ય દેશોમાં કોરોના ફેલાવવાનું જોખમ વધુ વધી ગયું છે. આ કારણોસર, ભારત અને અમેરિકા સહિત સાત દેશોએ ચીનથી આવનારા મુસાફરો માટે પ્લેનમાં ચડતા પહેલા કોવિડ નેગેટિવ રિપોર્ટ રજૂ કરવાનું ફરજિયાત બનાવ્યું છે.
ચીનથી મિલાન જતી બે ફ્લાઇટમાં મુસાફરો કોરોના પોઝિટિવ મળ્યા છે. એક ફ્લાઈટના 92 પેસેન્જર્સમાંથી 35 એટલે કે 38 ટકા અને બીજી ફ્લાઈટના 120 પેસેન્જર્સમાંથી 62 એટલે કે 52 ટકા પેસેન્જરો કોવિડ પોઝિટિવ હોવાનું જાણવા મળ્યું છે. બીજી તરફ, દેશમાં મોટી સંખ્યામાં કોરોના દર્દીઓની હાજરી હોવા છતાં ચીન પ્રતિબંધોને હળવા કરી રહ્યું છે.
બુસ્ટર ડોઝ આજે નહિ તો ક્યારે ?
એક તરફ નિષ્ણાંતો એક મહિનામાં કેસ વધવાની ચેતવણી આપી રહ્યા છે. તો બીજી તરફ લોકો પાસે કોરોના સામે લડવા માટે રસી એ મહત્વનું હથિયાર છે પણ સરકાર પાસે હજુ રસીનો જથ્થો ઉપલબ્ધ નથી. પૂરતા પ્રમાણમાં રસી જિલ્લાઓને ફાળવવામાં આવતી નથી. આગામી એક મહિનો કોરોના સામે મહત્વનો માનવામાં આવે છે. તો આ એક મહિનામાં રસી નહિ અપાઈ તો પછી રસી આપવાનો કોઈ મતલબ નહિ રહે.
