આઈએફએફઆઈમાં પસંદગી પામનારી ગુજરાતી ભાષાની ત્રીજી ફિલ્મ “21મું ટિફિન” ડિસેમ્બર 2021માં દર્શકો સુધી પહોંચશે
1952થી ઇન્ટરનેશનલ ફિલ્મ ફેસ્ટિવલ ઓફ ઇન્ડિયા (IFFI) કાર્યરત છે. વિશ્ર્વની શ્રેષ્ઠ ફિલ્મો પસંદ કરવામાં આવે છે અને ગોવા ખાતે એનું સ્પેશ્યલ સ્ક્રીનીંગ અને એવોર્ડ સેરેમની યોજાય છે. અહીં ઈન્ડિયન પેનોરમા સેક્શન અંતર્ગત ભારતની દરેક ભાષામાંથી જે તે વર્ષની શ્રેષ્ઠ ફિલ્મોની પસંદગી કરીને આ ફેસ્ટિવલમાં વિશ્ર્વની શ્રેષ્ઠ ફિલ્મો સાથે રીપ્રેઝન્ટ કરવામાં આવે છે.
ગુજરાતી ફિલ્મોનો IFFI સાથે બહુ જૂનો નાતો છે. અગાઉ 1980માં ફિલ્મ ‘ભવની ભવાઈ’ અને 1992માં ‘હું હુંશી હુંશીલાલ’ ઈન્ડિયન પેનોરમા સેક્શન અંતર્ગત IFFI માં સિલેક્ટ થઈ ચૂકી છે. એ પછી 2021માં ગુજરાતી ફિલ્મ ‘21મું ટિફિન’ સિલેક્ટ થઈ છે. વિજયગીરી ફિલ્મોસ પ્રોડક્શન હાઉસની ફિલ્મ ‘21મું ટિફિન’ આ વર્ષે IFFI માં સિલેક્ટ થનારી એક માત્ર ગુજરાતી ફિલ્મ છે.
અત્રે ઉલ્લેખનીય છે કે વર્ષ 2020 માં નેશનલ એવોર્ડ વિજેતા ગુજરાતી ફિલ્મ હેલ્લારોનું શો કેઝ તરીકે ઓપનીંગ સેરેમનીમાં ખાસ સ્ક્રીનીંગ ગોઠવાયું હતું.
નેશનલ એવોર્ડ વિજેતા લેખક રામ મોરીની ટુંકી વાર્તા પરથી બનેલી ફિલ્મ ‘21મું ટિફિન’ અગાઉ WRPN WOMEN’S INTERNATIONAL FILM FESTIVAL માં આઉટસ્ટેન્ડિંગ એક્સેલન્સ કેટેગરીમાં વિજેતા થઈ છે. આ ઉપરાંત TORONTO INTERNATIONAL WOMEN FILM FESTIVAL માં પસંદગી પામી અને સફળતાપૂર્વક સ્ક્રીનીંગ થયું છે. પ્રોડ્યુસર વિંકલ બાવા નિર્મિત આ ફિલ્મમાં નીલમ પંચાલ,નેત્રી ત્રિવેદી અને રોનક કામદાર મુખ્ય ભૂમિકા નિભાવી રહ્યા છે. ફિલ્મમાં મેહુલ સુરતીનું સંગીત છે અને પાર્થ તારપરા લિખિત ગીતને સ્વર આપ્યો છે ભારતીય સિનેમાના જાણીતા પ્લેબેક સિંગર મહાલક્ષ્મી ઐયરે.
ટિફિન સર્વિસનો બિઝનેસ ચલાવતી એક મહિલા તેના 21મા ગ્રાહકને મળે છે, જે બધું બદલી નાખે છે. તેના સંઘર્ષો છતાં, સ્ત્રી તેના અવરોધો પર વિજય મેળવે છે. તમામ જરૂરી પ્રોટોકોલને અનુસરીને દિગ્દર્શક અને નિર્માતા વિજયગીરી બાવા રોગચાળાની મુશ્કેલ પરિસ્થિતિ દરમિયાન માત્ર સાત દિવસમાં ફિલ્મ બનાવવામાં સફળ થયા છે. ડિરેક્ટર વિજયગીરી બાવાની ફિલ્મ ‘21નું ટિફિન’ ડિસેમ્બર 2021 માં દર્શકો સુધી પહોંચશે.