સવારથી વાદળછાયા વાતાવરણ વચ્ચે અચાનક વાતાવરણમાં પલટો
દ.ગુજરાતમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની કરાઈ આગાહી
સુરત, નવસારી, ડાંગ, વલસાડ, સહીતના જિલ્લામાં હવામાન વિભાગ દ્વારા વરસાદની આગાહી
સુરત: હવામાન વિભાગે રાજ્યના વિવિધ વિસ્તારોમાં આગામી 4 દિવસ માટે ગાજવીજ સાથે કમોસમી વરસાદની આગાહી કરી છે. દક્ષિણ ગુજરાત અને સુરત જિલ્લામાં વહેલી સવારથી વાતાવરણમાં પલટો આવ્યો છે., રાજ્યના વાતાવરણમાં અચાનક પલટો આવી ગયો છે. હવામાન વિભાગની આગાહી અનુસાર, રાજ્યમાં કેટલાક ભાગોમાં વરસાદી ઝાપટાં શરૂ થયા છે. સૌરાષ્ટ્ર-ઉત્તર અને મધ્ય ગુજરાત બાદ દક્ષિણ ગુજરાતમાં વરસાદની આગાહી કરવામાં આવી હતી. જે પછી સુરતના દરિયાઇ કાઠા વિસ્તારોમાં ઝરમર વરસાદ શરૂ થયો છે. અચાનક માવઠું થતાં ચોમાસા જેવો માહોલ બન્યો છે.
રાજ્યમાં વરસાદી વાતાવરણ સર્જાયુ છે. હવામાન વિભાગની આગાહી પ્રમાણે, આગામી ત્રણ દિવસ ગુજરાતમાં ઠેકઠેકાણે માવઠું થવાની પુરેપુરી શક્યતા છે. આગાહીના પગલે આજે દક્ષિણ ગુજરાતના કેટલાક ભાગોમાં વરસાદો માહોલ છવાયો છે. સુરત જિલ્લામાં વાતાવરણ પલટો આવતા ઓલપાડ તાલુકાના કાંઠા વિસ્તારમાં વરસાદી ઝાંપટા શરૂ થયા છે. ખાસ કરીને સુરતમાં દરિયાઇ કાંઠાના વિસ્તારોમાં આવેલા ગામોમાં ઝરમર ઝરમર વરસાદ શરૂ થયો છે. જેમાં મોર, ભગવા જીણોદ સહિતમાં ગામોમાં માવઠુ થતાં ફરી એકવાર ખેડૂતો ચિંતામાં મુકાયા છે.
સુરત જિલ્લા સહિત દક્ષિણ ગુજરાતમાં છૂટાછવાયા સ્થળોએ હળવાથી મધ્યમ વરસાદની શક્યતા છે. સુરત જિલ્લાના ઓલપાડ, કામરેજ, માંડવી, બારડોલી, મહુવા અને માંગરોળ તાલુકામાં વાતાવરણમાં પલટો જોવા મળી રહ્યો છે. જોકે, ઓલપાડ તાલુકાના કાઠા વિસ્તારના બે-ચાર ગામડાં સિવાય હજુ સુધી કોઈ વિસ્તારમાં વરસાદ નોંધાયો નથી.
માવઠાની આગાહી વચ્ચે વાતાવરણમાં પલટો આવ્યો છે. સુરત ઉપરાંત નવસારી, વલસાડ, મહીસાગરમાં વાતાવરણ વાદળછાયું બન્યુ છે. વાદળછાયું વાતાવરણના કારણે કેરીના પાકને નુકસાનની ભીતી સેવાઇ રહી છે. જો માવઠું થશે તો કેરીના પાકને નુકસાન થઇ શકે છે. આજે અને આવતીકાલ ઉપરાંત બુધવારે ઉત્તર ગુજરાત અને મધ્ય ગુજરાતમાં માવઠુ થવાની પુરેપુરી શક્યતા હવામાન વિભાગે વ્યક્ત કરી છે, સાથે જ આ સમયે 30 થી 40 કિલોમીટરની ઝડપે પવનો પણ ફૂંકાશે.
આ કમોસમી વરસાદને કારણે ખેડૂતો ચિંતામાં મુકાયા છે. વિશેષ કરીને કેરી અને ચીકુના પાકને મોટું નુકસાન થવાની આશંકા છે. જો માવઠું થશે તો ખેડૂતોને મોટું આર્થિક નુકસાન સહન કરવું પડશે. હાલ સમગ્ર વિસ્તારમાં વાદળછાયું વાતાવરણ છવાયેલું છે.
અહેવાલ: ભાવેશ ઉપાધ્યાય
