જગદીશન લિસ્ટ એમાં સૌથી ઝડપી બેવડી સદી ફટકારનાર બીજો બેટ્સમેન બન્યો:
તામિલનાડુનો વિકેટકીપર બેટર ભારતની ટોચની વન-ડે ટુર્નામેન્ટમાં બેવડી સદી નોંધાવનાર છઠ્ઠો બેટર બન્યો
તામિલનાડુના બેટર નારાયણ જગદીશને સોમવારે વિજય હઝારે ટ્રોફીમાં અરૂણાચલ પ્રદેશ વિરુદ્ધ 141 બોલમાં 277 રનની તોફાની ઈનિંગ્સ રમીને નવો વર્લ્ડ રેકોર્ડ નોંધાવી દીધો છે. આ દરમિયાન તેણે 25 ચોગ્ગા અને 15 સિક્સર ફટકારી હતી. જગદીશને લિસ્ટ-એ ક્રિકેટમાં સૌથી વધારે વ્યક્તિગત સ્કોર નોંધાવવાનો રેકોર્ડ પોતાના નામે કરી લીધો છે. 26 વર્ષીય જગદીશને 2002માં ગ્લેમોર્ગન વિરુદ્ધ સરેના એલિસ્ટર બ્રાઉને 268 રનનો સર્વોચ્ચ સ્કોર નોંધાવ્યો હતો તેને તોડી નાંખ્યો હતો. એલિસ્ટર બ્રાઉનનો આ સ્કોર લિસ્ટ-એ ક્રિકેટમાં સર્વોચ્ચ વ્યક્તિગતનો સ્કોર નોંધાવ્યો હતો. જે હવે ભારતીય બેટરના નામે થઈ ગયો છે. આ સાથે જગદીશને લિસ્ટ-એ ક્રિકેટમાં સૌથી વધુ રન નોંધાવનારા ભારતીય બેટર રોહિત શર્માના રેકોર્ડને પણ તોડી નાંખ્યો હતો.
રોહિત શર્માએ શ્રીલંકા વિરુદ્ધ રમાયેલી આંતરરાષ્ટ્રીય વન-ડે મેચમાં 264 રનની ધમાકેદાર ઈનિંગ્સ રમી હતી. આ મેચમાં તામિલનાડુએ બે વિકેટના નુકસાને 506 રનનો સ્કોર નોંધાવ્યો હતો જે મેન્સ લિસ્ટ-એ ક્રિકેટમાં સૌથી મોટો ટીમ સ્કોર છે. આ રેકોર્ડ અગાઉ ઈંગ્લેન્ડના નામે હતો. ઈંગ્લેન્ડે આ વર્ષની શરૂઆતમાં નેધરલેન્ડ્સ વિરુદ્ધ ચાર વિકેટે 498 રનનો સ્કોર નોંધાવ્યો હતો. લિસ્ટ-એ ક્રિકેટમાં ભારત તરફથી સૌથી મોટો સ્કોર મુંબઈના નામે હતો. મુંબઈએ 2021માં જયપુરમાં પુડુચેરી વિરુદ્ધ ચાર વિકેટે 457 રનનો સ્કોર નોંધાવ્યો હતો. જગદીશને ફક્ત 114 બોલમાં 200 રન નોંધાવી દીધા હતા. આ સાથે જ તે લિસ્ટ-એ ક્રિકેટના ઈતિહાસમાં સૌથી ઝડપી બેવડી સદી નોંધાવનારો બેટર બની ગયો હતો.
આ સાથે જગદીશને લિસ્ટ-એ ક્રિકેટમાં સળંગ પાંચમી સદી ફટકારી હતી જે નવો રેકોર્ડ છે. વિજય હઝારે ટ્રોફીમાં સૌથી વધુ વ્યક્તિગ સ્કોર પૃથ્વી શોના નામે હતો. તેણે પુડુચેરી સામે 227 રનની ઈનિંગ્સ રમી હતી. જગદીશને આ રેકોર્ડ તોડી નાંખ્યો હતો. તામિલનાડુનો આ વિકેટકીપર બેટર ભારતની ટોચની વન-ડે ટુર્નામમેન્ટમાં બેવડી સદી નોંધાવનારો છઠ્ઠો બેટર બન્યો હતો. જગદીશને બી સાઈ સુદર્શન સાથે પ્રથમ વિકેટ માટે 416 રનનો સ્કોર નોંધાવ્યો હતો જે લિસ્ટ એ ક્રિકેટમાં કોઈ પણ વિકેટ માટે નોંધાયેલી સૌથી મોટી ભાગીદારીનો રેકોર્ડ છે.
લિસ્ટ-એ ક્રિકેટમાં સળંગ સૌથી વધુ સદીનો રેકોર્ડ
સુદર્શને 102 બોલમાં 19 ચોગ્ગા અને બે સિક્સરની મદદથી 154 રન ફટકાર્યા હતા. જગદીશને શનિવારે સતત ચોથી સદી ફટકારીને લિસ્ટ-એ ક્રિકેટમાં સળંગ સૌથી વધુ સદી ફટકારવાના મામલે કુમાર સંગાકરા, અલ્વીરો પીટરસન અને દેવદત્ત પડિક્કલની બરાબરી કરી હતી. જ્યારે સોમવારે બેવડી સદી ફટકારીને તેણે આ ત્રણેયનો રેકોર્ડ તોડી નાંખ્યો હતો. જગદીશને વર્તમાન વિજય હઝારે ટુર્નામેન્ટમાં સોમવારે અરૂણાચલ વિરુદ્ધ 277 રનની ઈનિંગ્સ રમી તે પહેલા હરિયાણા, છત્તીસગઢ, આંધ્રપ્રદેશ અને ગોવા વિરુદ્ધ પણ સદી ફટકારી હતી.
