બીબીસીની ઓફિસે સતત ૨૪ કલાકથી આઇટીનું સર્ચ જારી

ટેક્સમાં ગોટાળાને લઈ આવકવેરા વિભાગે સર્વે હાથ ધર્યો

ગુજરાત હિંસા દસ્તાવેજી પર ચાલી રહેલા વિવાદ વચ્ચે આવકવેરા વિભાગે મંગળવારે દિલ્હી અને મુંબઈમાં બ્રિટિશ બ્રોડકાસ્ટિંગ કોર્પોરેશન (બીબીસી)ની ઓફિસો પર દરોડા પાડ્યા હતા. અહીં આવકવેરાની ટીમ છેલ્લા ૨૧ કલાકથી સર્વે કરી રહી છે. આ દરોડો મંગળવારે બપોરે ૧૨ વાગ્યે શરૂ થયો હતો. જણાવવામાં આવી રહ્યું છે કે, ઈન્ટરનેશનલ ટેક્સમાં ગેરરીતિઓને લઈને તપાસ માટે આઈટી ટીમ બીબીસી ઓફિસ પહોંચી છે. એટલું જ નહીં તપાસ માટે પહોંચેલી ઈન્કમટેક્સની ટીમે ઓફિસમાં હાજર કર્મચારીઓના ફોન પણ જપ્ત કરી લીધા હતા અને કર્મચારીઓને ઓફિસ છોડીને ઘરે જવાનું કહેવામાં આવ્યું હતું.

બીબીસી ઓફિસ પર ઈન્કમ ટેક્સની આ કાર્યવાહીને ઈન્ટરનેશનલ ટેક્સ સંબંધિત મામલો કહેવામાં આવી રહ્યો છે. જેમાં ટેક્સની ગેરરીતિઓને લઈને બીબીસી ઓફિસમાં ૨૧ કલાકથી આઈટીની આ સર્ચ ચાલી રહી છે. એવું માનવામાં આવે છે કે આવકવેરા ટીમ આજે પણ તેની તપાસ ચાલુ રાખી શકે છે. બીબીસી દ્વારા જારી કરવામાં આવેલા આવા નિવેદનમાં કહેવામાં આવ્યું છે કે અમે અમારા કર્મચારીઓ સાથે છીએ, અને આ તપાસમાં આઈટી ટીમને મદદ કરી રહ્યા છીએ. અમને આશા છે કે પરિસ્થિતિ જલ્દી સામાન્ય થઈ જશે.

જારી કરાયેલા નિવેદનમાં વધુમાં કહેવામાં આવ્યું છે કે અમારું આઉટપુટ અને પત્રકારત્વ સાથે સંબંધિત કાર્ય રાબેતા મુજબ ચાલુ રહેશે. અમે અમારા વાચકોની સેવા કરવા માટે પ્રતિબદ્ધ છીએ. જ્યારે યુકે સરકાર કથિત રીતે પરિસ્થિતિ પર નજીકથી નજર રાખી રહી છે, ત્યારે બીબીસીએ જણાવ્યું છે કે તેના કેટલાક કર્મચારીઓને ચાલી રહેલી આવકવેરાની પૂછપરછમાં સહકાર આપવા માટે તેમની દિલ્હી અને મુંબઈ ઓફિસમાં રહેવા માટે કહેવામાં આવ્યું છે.

અગાઉ બીબીસી કાર્યાલય સાથે સંકળાયેલા સૂત્રોએ માહિતી આપી હતી કે જ્યારે આવકવેરા અધિકારીઓએ અહીં દિલ્હીની ઓફિસ પર દરોડા પાડ્યા હતા ત્યારે બીબીસી દિલ્હીના સંપાદકો અને તપાસ માટે પહોંચેલા આવકવેરા અધિકારીઓ વચ્ચે ઘર્ષણ થયું હતું.  આ દરોડા અંગે આઈટી અધિકારીઓ સાથે ઉગ્ર દલીલ એ હકીકત પર થઈ હતી કે તેઓ બીબીસી દિલ્હી ઓફિસમાં તમામ સિસ્ટમ તપાસશે.

જે બાદ આઈટી અધિકારીઓને ઓફિસ સ્ટાફના કોમ્પ્યુટરમાં ‘શેલ કંપની’, ‘ફંડ ટ્રાન્સફર’, ‘ફોરેન ટ્રાન્સફર’ સહિતની સિસ્ટમ પર ચાર કીવર્ડ મળ્યા હતા.  બીબીસીના સંપાદકોએ આઈટી અધિકારીઓને કહ્યું હતું કે તેઓ તેમની સિસ્ટમ પર કોઈપણ સંપાદકીય સામગ્રીની ઍક્સેસ આપશે નહીં. દરમિયાન, યુએસ સ્ટેટ ડિપાર્ટમેન્ટના પ્રવક્તા નેડ પ્રાઈસે ભારતમાં બીબીસીની ઓફિસમાં આઇટી દરોડા અંગે નિવેદન આપ્યું છે.  નેડ પ્રાઈસે કહ્યું, ભારતીય ટેક્સ સત્તાવાળાઓ દ્વારા દિલ્હીમાં બીબીસીની ઓફિસની શોધ અંગે અમે વાકેફ છીએ. હું વધુ વ્યાપકપણે કહીશ કે અમે વિશ્વભરમાં મુક્ત પ્રેસના મહત્વને સમર્થન આપીએ છીએ.

એડિટર્સ ગિલ્ડ ઓફ ઈન્ડિયાએ ચિંતા વ્યક્ત કરી

એડિટર્સ ગિલ્ડ ઓફ ઈન્ડિયાએ એક નિવેદન જારી કરીને ઈન્કમ ટેક્સ વિભાગ દ્વારા પાડવામાં આવેલા દરોડા અંગે ઊંડી ચિંતા વ્યક્ત કરી છે અને કહ્યું છે કે સરકારની ટીકા કરનારાઓ નિશાના પર છે. જારી નિવેદનમાં કહેવામાં આવ્યું છે કે એડિટર્સ ગિલ્ડ ઓફ ઈન્ડિયા નવી દિલ્હી અને મુંબઈમાં બીબીસીની ઓફિસો પર સર્વે માટે પાડવામાં આવેલા દરોડાથી ચિંતિત છે. એડિટર્સ ગિલ્ડે સપ્ટેમ્બર 2021માં ન્યૂઝ ક્લિક અને ન્યૂઝ લોન્ડ્રીની ઓફિસમાં પણ આવી જ કાર્યવાહીનો ઉલ્લેખ કર્યો છે.

એડિટર્સ ગિલ્ડે કહ્યું છે કે આવકવેરા વિભાગે દૈનિક ભાસ્કર અને ભારત સમાચાર સામે પણ સર્વેની કાર્યવાહી કરી હતી.  ફેબ્રુઆરી 2021માં એન્ફોર્સમેન્ટ ડિરેક્ટોરેટ (ઇડી) એ ન્યૂઝ ક્લિકની ઓફિસ પર દરોડા પાડ્યા હતા.  આ દરેક કેસમાં, સરકાર વિરુદ્ધ સમાચાર સંસ્થાઓના વિવેચનાત્મક કવરેજના સંદર્ભમાં દરોડા અને સર્વે હાથ ધરવામાં આવ્યા હતા.

બીબીસીની ડોક્યુમેન્ટરીમાં શું છે મામલો?

તાજેતરમાં બીબીસીની એક ડોક્યુમેન્ટરી આવી.  આ ડોક્યુમેન્ટરી 2002ના ગુજરાત રમખાણો પર હતી.  કેન્દ્ર સરકારે આ ડોક્યુમેન્ટ્રીને પ્રચાર ગણાવીને સ્ક્રીનીંગ પર પ્રતિબંધ મુકી દીધો હતો.  ડોક્યુમેન્ટરીના સ્ક્રીનિંગને લઈને ઘણી યુનિવર્સિટીઓમાં હોબાળો થયો હતો.  આ અંગે સુપ્રીમ કોર્ટમાં પિટિશન પણ દાખલ કરવામાં આવી છે.  આવી સ્થિતિમાં, વિપક્ષ આવકવેરા વિભાગના દરોડાને બીબીસીની ડોક્યુમેન્ટ્રી સાથે જોડીને કેન્દ્ર પર નિશાન સાધી રહ્યું છે.