ટેકસાસના સાન એન્ટોનિયો નજીકની ઘટના, 16 લોકો બેભાન હાલતમાં પણ મળી આવ્યા : માનવ તસ્કરી વેળાએ ગૂંગળામણથી મોત થયાની આશંકા
અમેરિકાના ટેક્સાસમાં રેઢા પડેલા ટ્રકમાંથી 46 લોકોના મૃતદેહો મળ્યા છે. આ સાથે 16 લોકો બેભાન હાલતમાં પણ મળી આવ્યા છે. હાલ પોલીસ દ્વારા મૃતકોની ઓળખ મેળવી તપાસનો ધમધમાટ ચલાવવામાં આવી રહ્યો છે. બીજી તરફ આ લોકોના માનવ તસ્કરી વેળાએ ગૂંગળામણથી મોત થયાની આશંકા સેવાઇ રહી છે.
એક ટ્રકમાંથી 46 લોકોના મૃતદેહ મળી આવતા અમેરિકામાં ખળભળાટ મચી ગયો છે. આ તમામ સ્થળાંતરિત લોકો જણાવવામાં આવી રહ્યા છે. ઘટના અમેરિકાના ટેક્સાસ શહેરની છે. પ્રાપ્ત માહિતી અનુસાર, ટ્રકની અંદરથી 46 લોકોના મૃતદેહ મળી આવ્યા હતા, જ્યારે અન્ય 16 લોકો બેભાન હાલતમાં મળી આવ્યા હતા, જેમને હોસ્પિટલમાં દાખલ કરવામાં આવ્યા છે. આ ટ્રેક્ટર-ટ્રેલર ટેક્સાસના દક્ષિણ-પશ્ચિમમાં સ્થિત સાન એન્ટોનિયોના નિર્જન રસ્તા પરથી મળી આવ્યું હતું.
આ લોકો ગુપ્ત રીતે અમેરિકામાં પ્રવેશી રહ્યા હોય તેવું લાગી રહ્યું છે. એવું માનવામાં આવે છે કે આ લોકો મેક્સિકોની બાજુથી અમેરિકામાં ઘૂસ્યા હતા. સરહદ પાર કરવાના આવા પ્રયાસોમાં હજારો લોકોએ જીવ ગુમાવ્યા છે, પરંતુ આવો કિસ્સો ક્યારેય સામે આવ્યો નથી.
ટ્રક અંગે કોઈએ પોલીસને જાણ કરી હતી. પોલીસ ઘટનાસ્થળે પહોંચી ત્યારે ટ્રકનો ગેટ થોડો ખુલ્લો હતો. હોસ્પિટલમાં દાખલ 16 લોકોમાં 12 પુખ્ત વયના અને ચાર બાળકોનો સમાવેશ થાય છે. દર્દીઓના શરીર જાણે ગરમીથી સળગી રહ્યા હતા અને તેમના શરીરમાં પાણીની કમી સ્પષ્ટ દેખાતી હતી. હાલ ત્રણ લોકોને કસ્ટડીમાં લેવામાં આવ્યા છે. હજુ સુધી એ સ્પષ્ટ થયું નથી કે આ માનવ તસ્કરીનો મામલો છે કે નહીં ?
ટેક્સાસમાં, માનવ તસ્કરી દરમિયાન લોકો પહેલાથી જ પોતાનો જીવ ગુમાવી ચૂક્યા છે. 2017માં આવી જ એક ટ્રકમાંથી 10 લોકોના મૃતદેહ મળી આવ્યા હતા. આ પહેલા 2003માં સાન એન્ટોનિયોમાં એક ટ્રકમાંથી 19 લોકોના મૃતદેહ મળી આવ્યા હતા.
આ અંગે મેક્સિકોના વિદેશ મંત્રી માર્સેલો એબ્રાર્ડે પણ નિવેદન આપ્યું છે. તેણે કહ્યું છે કે તે ઘટનાસ્થળે પહોંચી રહ્યા છે. માર્સેલો એબ્રાર્ડે કહ્યું છે કે હાલમાં માર્યા ગયેલા લોકોની નાગરિકતા ક્યાં દેશની છે, તે જાણી શકાયું નથી.
