વર્ષની શરુઆતમાં જ ઈન્ડિયન ઓઈલનો લોકોને ફાયદો આપતો નિર્ણય
નવા વર્ષની શરુઆતમાં પેટ્રોલિયમ માર્કેટિંગ કંપની ઈન્ડિયન ઓઈલે એક ખુશ કરનારા સમાચાર આપ્યા છે. ઈન્ડિયન ઓઈલે કોમર્શિયલ એલપીજી સિલિન્ડરની કિંમતમાં 102.50 રુપિયાનો ઘટાડો કર્યો છે. 19 કિલોના કોમર્શિયલ એલપીજી સિલિન્ડરના ભાવમાં થયેલો આ ઘટાડો આજે એટલે કે પહેલી જાન્યુઆરી 2022ના રોજથી અમલમાં મૂકાશે. ન્યુઝ એજન્સી એએનઆઈના જણાવ્યા અનુસાર, રાજધાની દિલ્હીમાં 19 કિલોના આ સિલિન્ડરનો ભાવ 1998.50 રુપિયા થઈ જશે.
નવા વર્ષના પહેલા જ દિવસે આ જાહેરાત થવાને કારણે રેસ્ટોરાં, ઈટરી, ચાની કેટલી વગેરેના માલિકોને ચોક્કસપણે રાહત થશે. નોંધનીય છે કે કોમર્શિયલ એલપીજી સિલિન્ડરનો ઉપયોગ મોટાભાગે ખાણીપીણીના વ્યવસાય સાથે સંકળાયેલા લોકો કરતા હોય છે. પહેલી ડિસેમ્બર, 2021ના રોજ 19 કિલોના આ સિલિન્ડરની કિંમતમાં 100 રુપિયા વધારો કરવામાં આવ્યો હતો. આ વધારા પછી એક સિલિન્ડરની કિંમત 2101 રુપિયા થઈ ગઈ હતી. જે વર્ષ 2012-13માં થયેલા ભાવવધારા પછી સૌથી વધારે કિંમત હતી. વર્ષ 2012-13માં એક સિલિન્ડરની કિંમત 2200 રુપિયા પ્રતિ સિલિન્ડર થઈ ગઈ હતી.
ઉલ્લેખનીય છે કે ભાવમાં ઘટાડો માટે કોમર્શિયલ સિલિન્ડર માટે જ કરવામાં આવ્યો છે. 14.2 કિલો, 5 કિલો, 10 કિલોના ઘરેલુ ઉપયોગમાં લેવામાં આવતા સિલિન્ડરની કિંમતમાં કોઈ બદલાવ કરવામાં નથી આવ્યો. ગત વર્ષે ઓક્ટોબર મહિનામાં ડોમેસ્ટિક એલપીજી સિલિન્ડરના ભાવમાં વધારો કરવામાં આવ્યો હતો.
