- ઈલેક્ટ્રીક પાર્ટ બનાવવાનો ધંધો કરતા એક વેપારી સહિત છ શખ્સો ગંજીપાના વડે જુગાર રમતાં પકડાયા
જામનગર નજીક દરેડ જી.આઇ.ડી.સી. વિસ્તારમાં ગોલ્ડન પોઇન્ટ બિલ્ડીંગ ના ત્રીજા માળે આવેલી એક ઓફિસમાં ચાલી રહેલા જુગાર ધામ પર પોલીસે દરોડો પાડયો હતો, અને દુકાનદાર સહિત છ પત્તાપ્રેમીઓને ગંજીપાના વડે જુગાર રમતાં પકડી પાડ્યા છે, અને તેઓ પાસેથી રૂપિયા ૧ લાખ ૮ હજારની રોકડ અને જુગારનું સાહિત્ય કબજે કર્યું છે.
જામનગરના પંચકોશી બી. ડિવિઝન ના પી.આઈ. વી. જે. રાઠોડ અને તેમની ટીમને ચોક્કસ બાતમી મળી હતી, કે જામનગર નજીક દરેડ જી.આઈ.ડી.સી
ફેઈઝ -૩માં શિવ ઓમ સર્કલ પાસે ગોલ્ડન પોઇન્ટ નામના બિલ્ડીંગના ત્રીજા માળે ૨૦૫ નંબરની ઓફિસ કે જેના સંચાલક નીતિન કાંતિભાઈ વાલંભિયા દ્વારા ઇલેક્ટ્રીક પાર્ટ્સ બનાવવાનું કામ કરવામાં આવે છે, પરંતુ ત્યાં કેટલાક શખ્સો એકત્ર થઈને ગંજી પાના વડે જુગાર રમી રહ્યા છે. જે બાતમી ના આધારે ગઈકાલે મોડી સાંજે પંચકોશી બી. ડિવિઝન ની પોલીસ ટુકડીએ દરોડો પાડયો હતો.
જે દરોડા દરમિયાન દુકાનદાર સહિતનાઓ ગંજીપાના વડે જુગાર રમી રહેલા મળી આવ્યા હતા. આથી પોલીસે નીતિન કાંતિલાલ વાલંભીયા ઉપરાંત કિરણ કાંતિલાલ ચૌહાણ, નિલેશ ભીખાભાઈ અકબરી, અનિરુદ્ધ ગોરધનભાઈ ચોવટીયા, ભાવેશ ધીરજભાઈ પાંભર અને મનીષ અશોકભાઈ સહિત છ પતાપ્રેમીઓ ની અટકાયત કરી લઈ, તેઓ પાસેથી રૂપિયા ૧ લાખ ૮ હજારની રોકડ રકમ અને જુગારનું સાહિત્ય કબજે કર્યું છે.
અહેવાલ: સાગર સંઘાણી
