વિડીયોને લાઈક કરી દરરોજ હજારો રૂપિયા કમાવાની લાલચમાં અનેક લોકો છેતરપિંડીના ભોગ બન્યા
ટેક્નોલોજીની પ્રગતિ અને ઈ-કોમર્સના ઉત્ક્રાંતિએ માત્ર યુઝર્સના જીવનને સરળ બનાવવામાં મદદ કરી નથી પરંતુ સ્કેમર્સ માટે સોશિયલ એન્જિનિયરિંગ ટેકનિકનો ઉપયોગ કરીને લોકોને છેતરીને નાણાંની ચોરી કરવાની નવી રીતો પણ આપી છે. છેલ્લા કેટલાક મહિનાઓથી સાયબર અપરાધીઓ યુઝર્સ પાસેથી પૈસા પડાવવા માટે યુટ્યુબનો ઉપયોગ કરી રહ્યા છે.
આ કૌભાંડમાં છેતરપિંડી કરનારાઓ આખરે તેમના પૈસાની ચોરી કરતા પહેલા લોકોને યુ-ટ્યુબ વિડિઓઝને લાઈક કરવા અને સબ્સ્ક્રાઇબ કરવા માટે પાર્ટ-ટાઇમ જોબની તકો ઓફર કરે છે. ગૃહ મંત્રાલયની સાયબર ધમકી જાગૃતિ પહેલના ભાગ રૂપે સરકારે આવા કૌભાંડો કેવી રીતે કરવામાં આવે છે તે સમજાવવા માટે એક વિડિઓ શેર કર્યો છે. આ વિડિયો લોકોને સાયબર સ્કેમર્સની જાળમાં ફસાવાથી બચવા માટેની રીતો પણ સૂચવે છે.
યુ ટ્યુબ લાઇક અને સબ્સ્ક્રાઇબ કૌભાંડ શું છે તે વિડિયો મુજબ સાયબર અપરાધીઓ સંભવિત પીડિતોનો સંપર્ક કરવા માટે વોટ્સઅપ અને ટેલિગ્રામનો ઉપયોગ કરી રહ્યા છે અને તેમને ઘરેથી પાર્ટ-ટાઇમ જોબ ઓફર કરે છે. આવી નોકરીઓમાં સ્કેમર્સ યુઝર્સને યુટ્યુબ પર વીડિયોને લાઈક કરવા અને સબ્સ્ક્રાઇબ કરવા માટે આમંત્રિત કરે છે. અહેવાલો સૂચવે છે કે તાજેતરના મહિનાઓમાં એવી ઘણી ઘટનાઓ બની છે જેમાં પીડિતોને આ યુ ટ્યુબ જોબ સ્કેમ્સનો ઉપયોગ કરીને સ્કેમર્સ દ્વારા લાખો રૂપિયાની છેતરપિંડી કરવામાં આવી છે.
શરૂઆતમાં સ્કેમર્સ વપરાશકર્તાઓનો સંપર્ક કરશે (ટેલિગ્રામ અને વોટ્સએપ પર) કે તેઓ પાર્ટ-ટાઈમરની શોધમાં છે જે દરરોજ 5,000 રૂપિયા સુધી કમાઈ શકે છે. વપરાશકર્તાઓ ઓફર સ્વીકારે પછી તેઓને ટેલિગ્રામ ચેનલમાં ઉમેરવામાં આવે છે જેનું સંચાલન ‘ટાસ્ક મેનેજર’ દ્વારા કરવામાં આવે છે, જે તેમને ‘કાર્ય’ સોંપે છે.
પછી પીડિતોને કેટલાક યુ ટ્યુબ વિડિઓઝ પર ‘લાઇક’ બટન દબાવવા અને ‘મેનેજર’ને સ્ક્રીનશૉટ મોકલવા માટે કહેવામાં આવે છે. જેમ જેમ વપરાશકર્તાઓ યુ ટ્યુબ વિડિઓઝને લાઈક કરવાનું ચાલુ રાખે છે, સંચિત કમાણી સ્કેમરની ‘જોબ એપ્લિકેશન’ પર બતાવવામાં આવે છે.
આ કમાણી માત્ર પ્રદર્શન માટે છે અને સ્કેમર વપરાશકર્તાને કોઈ પૈસા મોકલતો નથી. તેના બદલે સાયબર અપરાધીઓ વપરાશકર્તાઓને તેમની સંચિત કમાણી મેળવવા માટે અમુક રકમ (ઉદાહરણ તરીકે, રૂ. 5,000) ‘રોકાણ’ કરવા કહેશે.
એકવાર પૈસા ટ્રાન્સફર થઈ જાય પછી સ્કેમર્સ વપરાશકર્તાઓને વોટ્સઅપ અને ટેલિગ્રામ પર બ્લોક કરે છે. છેતરાયા પછી પીડિતોને તેમના ‘ટાસ્ક મેનેજર’ અથવા પાર્ટ-ટાઇમ જોબ ઓફર કરનાર એચઆર સાથે વાતચીત કરવાનો કોઈ વિકલ્પ મળતો નથી.
કેટલાક કિસ્સાઓમાં સ્કેમર્સ વપરાશકર્તાઓને સંચિત નાણાં મેળવવા માટે તેમના બેંક ખાતાની વિગતો મોકલવાનું પણ કહે છે. જેમ જેમ વપરાશકર્તાઓ તેમની બેંક વિગતો શેર કરે છે તેમ સાયબર અપરાધીઓ તેમના ખાતામાંથી નાણાંની ચોરી કરે છે.
