- રૂરલ એસઓજી ટીમે અલગ અલગ દવા, ઇન્જેક્શન સહિત રૂ. 32 હજારની મેડિકલ સામગ્રી સાથે રાજેશ મારડિયા અને રાજુ ચૌહાણને દબોચી લીધો
રાજકોટ રૂરલ એસઓજી ટીમે અલગ અલગ બે મુન્નાભાઈ એમબીબીએસને ઝડપી લઇ દવા સહીતની રૂ. 32 હજારની મેડિકલ સામગ્રી કબ્જે કરી છે. રાજકોટ જિલ્લાના ઢોલરા ગામેથી રાજેશ મારડિયા અને સડકપીપળીયા ગામેથી રાજુ ચૌહાણની ધરપકડ કરવામાં આવી છે.
પ્રાપ્ત વિગત અનુસાર રાજકોટ રૂરલ એસઓજીના પીઆઈ એફ એ પારગી, પીએસઆઈ બી સી મિયાત્રાના માર્ગદર્શન હેઠળ એસઓજી ટીમ પેટ્રોલિંગમાં હતી. દરમિયાન બાતમીના આધારે પોલીસે શાપર પોલીસ મથકની હદમાં આવતા ઢોલરા ગામે તબીબી પ્રેક્ટિસ કરતા રાજેશ ભીખાભાઈ મારડીયા(ઉ.વ.37 રહે. આર કે એમ્પાયરની પાછળ જલારામ સોસાયટી, મવડી ચોકડી, રાજકોટ)ની અલગ અલગ એલોપેથીક દવા, ઇન્જેક્શન, બાટલા સહીત રૂ. 4790ના મુદ્દામાલ સાથે ઝડપી લેવામાં આવ્યો હતો. ઉલ્લેખનીય છે કે, મુન્નાભાઈ એમબીબીએસએ રાજસ્થાનના ગંગાનગરથી બીએચએમએસની ડિગ્રી મેળવી હતી પરંતુ તે એલોપેથીક દવા, ઇન્જેક્શન, બાટલા સહીતની સામગ્રી રાખી એલોપેથીક પ્રેક્ટિસ કરતો હોય એસઓજીએ ધરપકડ કરી હતી.
બીજા દરોડામાં એસઓજી ટીમે ગોંડલ તાલુકા પોલીસ મથક હેઠળ આવતા સડક પીપળીયા ગામે ફાલકન રોડ ઉપર શ્રીજી ક્લિનિક ખોલી મેડિકલની પ્રેક્ટિસ કરતા રાજુ રાણાભાઇ ચૌહાણ(ઉ.વ.29 રહે. ભરૂડી ગામ)ની ધરપકડ કરી ઇન્જેક્શન, બાટલા સહીતની રૂ. 27,543ની મેડિકલ સામગ્રી કબ્જે કરી હતી. ઝડપાયેલ ઘોડા તબીબ ફક્ત ધોરણ 10 સુધી જ ભણેલ હોય અને અગાઉ ખાનગી હોસ્પિટલમાં કંપાઉન્ડર તરીકે નોકરી કરી ચુક્યો હોવાનું એસઓજીની તપાસમાં સામે આવ્યું છે.
આ કામગીરીમાં રૂરલ એસઓજી ટીમના પીઆઈ એફ એ પારગી, પીએસઆઈ બી સી મિયાત્રા, એએસઆઈ જયવીરસિંહ રાણા, અમિતભાઈ કનેરીયા, ઇન્દ્રસિંહ જાડેજા, સંજયભાઈ નિરંજની, અતુલભાઈ ડાભી, હેડ કોન્સ્ટેબલ હિતેશભાઈ અગ્રાવત, પ્રહલાદસિંહ રાઠોડ, અરવિંદભાઈ દાફડા, શિવરાજભાઈ ખાચર, કોન્સ્ટેબલ વિજયગીરી ગોસ્વામી, રઘુભાઇ ઘેડ, ચિરાગભાઈ કોઠીવાર રોકાયા હતા.