સુપ્રીમ કોર્ટના તત્કાલીન ચીફ જસ્ટિસ એન.વી.રમણાએ તેમના અનુગામી તરીકે ન્યાયમૂર્તિ ઉદય ઉમેશ લલિતના નામની ભલામણ કરી હતી
જસ્ટિસ ઉદય ઉમેશ લલિતની ભારતના 49 મા ચીફ જસ્ટિસ ઓફ ઇન્ડિયા તરીકે નિમણૂક કરવામાં આવી છે.તાજેતરમાં સુપ્રીમ કોર્ટના તત્કાલીન ચીફ જસ્ટિસ એન. વી. રમણાએ તેમના અનુગામી તરીકે ન્યાયમૂર્તિ ઉદય ઉમેશ લલિતના નામની ભલામણ કરી હતી. શપથ લીધા બાદ જસ્ટિસ લલિત ભારતના 49મા મુખ્ય ન્યાયાધીશ બનશે. એન. વી. રમણા 26 ઓગસ્ટે તેમના પદ પરથી નિવૃત્ત થઈ રહ્યા છે.
સ્થાપિત સંમેલન મુજબ, તત્કાલિન સિજેઆઈએ તેમના અનુગામી તરીકે સર્વોચ્ચ અદાલતના સૌથી વરિષ્ઠ ન્યાયાધીશના નામની ભલામણ કરવાની હોય છે. જસ્ટિસ રમના પછી જસ્ટિસ ઉદય ઉમેશ લલિત વરિષ્ઠતાના ક્રમમાં બીજા ક્રમે આવે છે.પોતાના નમ્ર સ્વભાવ માટે જાણીતા લલિત બીજા એવા ચીફ જસ્ટિસ હશે જે સુપ્રીમ કોર્ટના જજ બનતા પહેલા હાઈકોર્ટમાં જજ ન હતા. તેઓ વકીલથી સીધા આ પદ સુધી પહોંચ્યા હતા. તેમના પહેલા 1971 માં દેશના 13મા મુખ્ય ન્યાયાધીશ એસએમ સિકરીએ આ સિદ્ધિ મેળવી હતી.
ગત વર્ષે બોમ્બે હાઇકોર્ટ દ્વારા પોકસોના કેસ મામલે એક વિવાદિત ચુકાદો આપવામાં આવ્યો હતો. જેમાં બોમ્બે હાઇકોર્ટે એવું નોંધ્યું હતું કે, સ્કિન ટુ સ્કિન સ્પર્શ થયો ન હોય તો તેને પોકસો હેઠળનો કેસ ગણી શકાય નહીં. જે મામલે દેશભરમાં વિવાદ પણ ઉભો થયો હતો. સમગ્ર મામલો સુપ્રીમ કોર્ટ સુધી પહોંચ્યો હતો અને મામલામાં યુ યુ લલીતે વિવાદાસ્પદ ચુકાદો પલટાવી નાખ્યો હતો.
10 જાન્યુઆરી 2019 ના રોજ, જસ્ટિસ યુયુ લલિતે અયોધ્યા કેસની સુનાવણી કરતી 5 જજની બેન્ચમાંથી પોતાને અલગ કરી લીધા. તેણે દલીલ કરી હતી કે લગભગ 20 વર્ષ પહેલા તે અયોધ્યા વિવાદ સંબંધિત ફોજદારી કેસમાં યુપીના પૂર્વ સીએમ કલ્યાણ સિંહના વકીલ હતા. જો જસ્ટિસ યુયુ લલિતને આગામી સીજેઆઈ તરીકે નિયુક્ત કરવામાં આવે છે, તો તેમનો કાર્યકાળ ત્રણ મહિનાથી ઓછો રહેશે અને તેઓ 8 નવેમ્બરે નિવૃત્ત થશે.
હાલમાં જસ્ટિસ નાથલપતિ વેંકટ રમના ભારતના 48મા મુખ્ય ન્યાયાધીશ છે. તેમની ભલામણ પૂર્વ ન્યાયાધીશ જસ્ટિસ એસએ બોબડેએ કરી હતી.
