ફિફા વર્લ્ડકપમાં સળંગ બીજા દિવસે અપસેટ: જાપાને જર્મનીને 2-1થી હરાવ્યું

ફિફા વર્લ્ડ કપ ગ્રુપ-ઈમાં જર્મની સામે જાપાનોનો આ ઐતિહાસિક વિજય છે

કતારમાં રમાઈ રહેલા ફૂટબોલ વર્લ્ડ કપમાં સળંગ બીજા દિવસે મોટો અપસેટ સર્જાયો છે. બુધવારે રમાયેલા મુકાબલામાં જાપાને વર્લ્ડ કપની દાવેદાર ગણાતી જર્મની ટીમને 2-1થી પરાજય આપીને મોટો અપસેટ સર્જ્યો છે. ચાર વખત ચેમ્પિયન રહેલી જર્મની ટીમ પ્રથમ હાફમાં એક ગોલની સરસાઈ સાથે રમી રહી હતી. જોકે, બીજા હાફની અંતિમ મિનિટોમાં જાપાને ધમાકેદાર અંદાજમાં વળતો પ્રહાર કર્યો હતો અને આખી બાજી પલટી દીધી હતી. જાપાન માટે મેચની 75મી મિનિટે રિત્સુ દોઆન અને 83મી મિનિટે તકુમા અસાનોએ ગોલ નોંધાવીને જર્મનીને મોટો ફટકો આપ્યો છે. ફિફા વર્લ્ડ કપ ગ્રુપ-ઈમાં જર્મની સામે જાપાનોનો આ ઐતિહાસિક વિજય છે.

મેચમાં જર્મનીએ પ્રથમ હાફમાં શાનદાર શરૂઆત કરી હતી. જર્મની સતત જાપાનના ગોલ પોસ્ટમાં આક્રમણ કરતું રહ્યું હતું. 33મી મિનિટમાં અલ્કાઈ ગુંડોઅને પેનલ્ટી પર ટીમ માટે પ્રથમ ગોલ નોંધાવ્યો હતો. જોકે, ત્યારબાદ જર્મનીની ટીમ ગોલ નોંધાવવાની તક બનાવવામાં નિષ્ફળ રહી હતી. આ દરમિયાન ઘણી વખત જર્મનીના ખેલાડીઓ જાપાનના ગોલ પોસ્ટમાં દબાણ બનાવવાનો પ્રયાસ કર્યો હતો. જોકે, જર્મનીના ખેલાડીઓનો પ્રયાસ નિષ્ફળ રહ્યા હતા.

પ્રથમ હાફમાં એક ગોલની સરસાઈ સાથે જર્મનીની ટીમ જ્યારે પરત ફરી તો તેની રણનીતિ બીજા હાફમાં સતત આક્રમક રમત સાથે ગોલ કરવાની હતી જેથી કરીને જાપાન પર દબાણ બનાવી શકાય. જર્મનીના ખેલાડીઓ આ પ્રયાસમાં સફળ થતાં જોવા મળી રહ્યા હતા પરંતુ જાપાની ગોલકીપરની ચપળતાના કારણે તેના પ્રયાસો નિષ્ફળ રહ્યા હતા. જ્યારે 70મી મિનિટ બાદ જાપાની ટીમે પોતાની રમત બદલી હોય તેમ આક્રમણ શરૂ કરી દીધું હતું અને પ્રથમ ગોલ નોંધાવીને સ્કોર સરભર કરી દીધી હતી. બાદમાં 83મી મિનિટે વધુ એક ગોલ નોંધાવીને જાપાને 2-1થી સરસાઈ મેળવી લીધી હતી. બાદમાં જાપાને જર્મનીને એક પણ તક આપી ન હતી અને મેચ જીતી લીધી હતી.

બે દિવસમાં બે એશિયન ટીમોએ અપસેટ સર્જ્યો

ફિફા વર્લ્ડ કપમાં સળંગ બીજા દિવસે એશિયન ટીમે અપસેટ સર્જ્યો હતો. જાપાને જર્મનીને હરાવી તેના આગલા દિવસે મંગળવારે સાઉદી અરબે ધમાકેદાર પ્રદર્શન કરતાં લાયનલ મેસ્સીની કેપ્ટનસીવાળી આર્જેન્ટિનાની ટીમને 2-1થી પરાજય આપીને સનસનાટી મચાવી દીધી હતી. આ મેચમાં પણ પ્રથમ હાફમાં ગોલ નોંધાવીને આર્જેન્ટિનાની ટીમ 1-0થી આગળ હતી. જોકે, બાદમાં સાઉદી અરબની ટીમે દમદાર પ્રદર્શન કરતાં મેચની બાજી પલટી દીધી હતી અને 2-1થી વિજય નોંધાવ્યો હતો.