પેટ્રોલિયમ મંત્રી હરદીપ પુરીએ ઓઇલ કંપનીઓને ભાવ ઘટાડવા કરી અપીલ
અબતક, નવી દિલ્હી : વિશ્વના મોટાભાગના દેશોમાં ડીઝલ પેટ્રોલથી મોંઘુ છે. પણ ભારતમાં ડિઝલનો ઉપયોગ બહુવિધ હોય વર્ષોથી સરકારે ડીઝલના ભાવને નીચા રાખવા કમર કસી છે. પણ હવે ડીઝલ ઉપરનું ભારણ ઘટાડવા પેટ્રોલના ભાવ ઘટે તેવી શક્યતા સેવાઇ રહી છે.
છેલ્લા ઘણા સમયથી પેટ્રોલ અને ડીઝલના ભાવમાં કોઈ ફેરફાર થયો નથી. દેશના મોટાભાગના ભાગોમાં પેટ્રોલની કિંમત 100 રૂપિયા પ્રતિ લિટરની આસપાસ વેચાઈ રહી છે, જ્યારે ડીઝલની કિંમત પણ મોટાભાગની જગ્યાએ 90 રૂપિયા પ્રતિ લિટરને પાર પહોંચી ગઈ છે. લોકોને આશા છે કે ટૂંક સમયમાં જ પેટ્રોલ અને ડીઝલના ભાવમાં ઘટાડો થશે. જ્યારે પેટ્રોલિયમ મંત્રી હરદીપ સિંહ પુરીને આ અંગે સવાલ કરવામાં આવ્યો તો તેમણે તેલ કંપનીઓને અપીલ કરી. જો તેલ કંપનીઓ પેટ્રોલિયમ મંત્રીની વાત માની લે તો ટૂંક સમયમાં તમને સારા સમાચાર મળી શકે છે.
પેટ્રોલિયમ મંત્રી હરદીપ પુરીએ રવિવારે એક પ્રશ્નના જવાબમાં કહ્યું હતું કે તેઓ જાહેર તેલ કંપનીઓને અપીલ કરે છે કે તેઓ પેટ્રોલ અને ડીઝલના ભાવમાં ઘટાડો કરે જો તેમની ખોટની ભરપાઈ કરવામાં આવી હોય. આંતરરાષ્ટ્રીય બજારમાં કાચા તેલની કિંમતોને જોતા તેમને પેટ્રોલ અને ડીઝલના ભાવ ઘટાડવાની અપીલ કરવામાં આવી છે. તેમણે કહ્યું કે હું આશા રાખું છું કે એકવાર નુકસાન ભરપાઈ થઈ જશે પછી ભાવમાં ઘટાડો થશે. તેમણે કહ્યું કે રશિયા અને યુક્રેન વચ્ચેના યુદ્ધ પછી પણ તેલ કંપનીઓએ ભાવ સ્થિર રાખ્યા હતા. છૂટક ભાવમાં કોઈ વધારો નથી. તેમણે કહ્યું કે તેઓ આશા રાખે છે કે ઓઈલ કંપનીઓ પોતે આ અંગે નિર્ણય લેશે.
આગામી દિવસોમાં નવ રાજ્યોમાં વિધાનસભાની ચૂંટણી યોજાવા જઈ રહી છે. આગામી વર્ષે લોકસભાની ચૂંટણી પણ યોજાવાની છે. આવી સ્થિતિમાં પેટ્રોલ અને ડીઝલના વધેલા ભાવથી રાહત મળવાની આશા વધી છે. પેટ્રોલિયમ મંત્રીએ તેલ કંપનીઓને પણ અપીલ કરી છે. વૈશ્વિક બજારમાં તેલના ભાવ નિયંત્રણમાં છે. તેમણે કહ્યું કે કેન્દ્ર સરકારે પહેલા જ એક્સાઈઝ ડ્યુટી ઘટાડી દીધી છે. જોકે કેટલાક રાજ્યોમાં વેટમાં ઘટાડો કરવામાં આવ્યો નથી, જેના કારણે તે રાજ્યોમાં લોકોને મોંઘા તેલ ખરીદવું પડે છે.
