એશિયાના સૌથી મોટા ધનકુબેર અદાણી હવે વિશ્ર્વના ત્રીજા સૌથી અમીર વ્યક્તિ બની ગયા
અદાણી ગ્રુપના ચેરમેન ગૌતમ અદાણીનું નામ આખી દુનિયામાં ગૂંજી રહ્યું છે. અદાણીને સામાજિક, રાજકીય અને આર્થિક ઇચ્છાશક્તિના સમન્વયે “ગૌતમ” બનાવી દીધા છે. તેઓ પહેલેથી જ ભારતમાં તેમજ એશિયાના સૌથી મોટા ધનકુબેર છે. હવે ગૌતમ અદાણીની નેટવર્થમાં વધુ વધારો થયો છે. બ્લૂમબર્ગ બિલિયોનેર્સ ઈન્ડેક્સ અનુસાર ગૌતમ અદાણી હવે વિશ્વના ત્રીજા સૌથી અમીર વ્યક્તિ બની ગયા છે. અદાણી આવું કરનાર પ્રથમ એશિયન બિઝનેસમેન છે.
બ્લૂમબર્ગ બિલિયોનેર્સ ઈન્ડેક્સ અનુસાર, અદાણીએ હવે લૂઈસ વિટનના સીઈઓ અને ચેરમેન બર્નાર્ડ આર્નોલ્ટને પાછળ છોડી દીધા છે. ઈન્ડેક્સ અનુસાર, અદાણીની નેટવર્થ હાલમાં વધીને 137 બિલિયન ડોલર થઈ ગઈ છે. હવે અદાણી ગ્રુપના ચેરમેનથી આગળ માત્ર ટેસ્લાના સીઈઓ એલોન મસ્ક અને એમેઝોનના સ્થાપક જેફ બેઝોસ જ આગળ છે.
બ્લૂમબર્ગ અનુસાર, મસ્કની નેટવર્થ હાલમાં 251 બિલિયન ડોલર છે, જ્યારે બેઝોસની હાલમાં 153 બિલિયન ડોલરની નેટવર્થ છે. નેટવર્થમાં વધારો કર્યા પછી પણ અદાણી હજુ પણ મસ્ક કરતાં ઘણી પાછળ છે. મસ્કની કુલ નેટવર્થ હાલમાં અદાણી કરતાં 114 બિલિયન ડોલર વધુ છે. જોકે, અદાણી અને બેઝોસ વચ્ચે બહુ ફરક નથી. બેઝોસ હવે અદાણી કરતાં માત્ર 16 બીલીયન ડોલર વધુના માલિક છે.
બીજી તરફ, ફોબ્ર્સની રિયલ ટાઈમ બિલિયોનેર્સ લિસ્ટમાં અદાણી હજુ પણ ચોથા સ્થાને છે. ફોબ્ર્સની યાદીમાં 255.1 બીલીયન ડોલરની સંપત્તિ સાથે એલોન મસ્ક વિશ્વના સૌથી ધનિક વ્યક્તિ છે. તે જ સમયે, બર્નાર્ડ આર્નોલ્ટ એન્ડ ફેમિલી 160.7 બિલિયન ડોલર સાથે આ યાદીમાં બીજા સ્થાને છે. જેફ બેઝોસ 154.3 બીલીયન ડોલર સાથે ત્રીજા સ્થાને છે. ફોબ્ર્સની યાદી અનુસાર, ગૌતમ અદાણી અને પરિવારની કુલ સંપત્તિ હાલમાં 145.6 બીલીયન ડોલર છે. આ યાદી અનુસાર અદાણી અને પરિવાર હવે બેઝોસથી 8.7 બિલિયન ડોલર પાછળ છે.
અદાણીની નેટવર્થ તાજેતરના સમયમાં ઝડપથી વધી છે. વિશ્વભરના શેરબજારોમાં વેચવાલીના સમયગાળા પછી પણ અદાણીની સંપત્તિમાં સતત વધારો થયો છે. બ્લૂમબર્ગ બિલિયોનેર્સ ઈન્ડેક્સ અનુસાર, અદાણી ટોપ-10 અમીર લોકોની યાદીમાં એકમાત્ર વ્યક્તિ છે જેમની સંપત્તિમાં છેલ્લા 24 કલાક દરમિયાન વધારો થયો છે. આ સમયગાળા દરમિયાન અદાણીની નેટવર્થમાં 1.2 બિલિયન ડોલરનો વધારો થયો છે. આ વર્ષ વિશે વાત કરીએ તો અદાણી માટે તે ખૂબ જ લકી સાબિત થયું છે.
જાન્યુઆરીથી અત્યાર સુધીમાં અદાણીની સંપત્તિમાં 60.9 બિલિયન ડોલરનો વધારો થયો છે. ફોબ્ર્સના રિયલ ટાઈમ ઈન્ડેક્સ અનુસાર, અદાણી પણ ટોપ-10માં એકમાત્ર એવા છે, જેમની સંપત્તિમાં છેલ્લા 24 કલાકમાં વધારો થયો છે. આ યાદી અનુસાર, અદાણીએ છેલ્લા 24 કલાકમાં 5.5 બિલિયન ડોલર અથવા 3.92 ટકાનો નફો કર્યો છે.
