આગામી ઉનાળામાં ભયંકર તાપની દહેશતને લઈ મોદી સરકારનું મંથન

વડાપ્રધાને ખાસ બેઠક યોજી, સંબંધિત વિભાગો પાસેથી પૂર્વ તૈયારીઓની વિગતો લઈને જરૂરી આદેશો જારી કર્યા

વડાપ્રધાન નરેન્દ્ર મોદીએ દેશના અનેક રાજ્યોમાં આગામી ઉનાળાની ઋતુને લગતી તૈયારીઓની સમીક્ષા કરી હતી. સોમવારે તેમના સત્તાવાર નિવાસસ્થાને પીએમ મોદીએ બેઠકમાં હાજર અધિકારીઓ પાસેથી આગામી સિઝનની તૈયારીઓ અંગે અપડેટ લીધી હતી.  બેઠકમાં રવિ પાકના ઉત્પાદન પર હવામાનની અસર અને આગામી સિઝનના મુખ્ય પાકોના અંદાજિત ઉપજ અંગે ચર્ચા કરવામાં આવી હતી.

આ બેઠકમાં વડાપ્રધાનના અગ્ર સચિવ, કેબિનેટ સચિવ, ગૃહ સચિવ, આરોગ્ય સચિવ, કૃષિ સચિવ, પૃથ્વી વિજ્ઞાન સચિવ અને નેશનલ ડિઝાસ્ટર મેનેજમેન્ટ ઓથોરિટીના અધિકારીઓ હાજર હતા.

વડાપ્રધાન કાર્યાલયથી પ્રાપ્ત માહિતી અનુસાર, આ બેઠકમાં પીએમ મોદીને આગામી કેટલાક મહિનાઓ માટે હવામાનની આગાહી અને ચોમાસાની સંભાવના વિશે માહિતી આપવામાં આવી હતી.  તેઓને રવિ પાક પર હવામાનની અસર અને મુખ્ય પાકોની અંદાજિત ઉપજ વિશે પણ માહિતી આપવામાં આવી હતી.  સિંચાઈના પાણી પુરવઠા, ઘાસચારો અને પીવાના પાણીની દેખરેખ રાખવાના ચાલુ પ્રયાસોની પણ સમીક્ષા કરવામાં આવી હતી.

આ સિવાય પીએમ મોદીને ઈમરજન્સીની સ્થિતિમાં હોસ્પિટલોની સજ્જતા અને ઈન્ફ્રાસ્ટ્રક્ચર વિશે માહિતી આપવામાં આવી હતી.  અધિકારીઓએ વડાપ્રધાનને ઉનાળાની ઋતુ દરમિયાન સંભવિત આપત્તિઓ અને ઘટનાઓની તૈયારી માટે ચાલી રહેલા પ્રયાસો વિશે પણ અપડેટ કર્યું હતું.

લોકોને જાગૃત કરવા અપીલ કરી

પીએમ મોદીએ કહ્યું કે હવામાનને ધ્યાનમાં રાખીને દરેક જરૂરી તૈયારીઓ જેમ કે પ્રોફેશનલ ડોકટરો, નગરપાલિકા અને પંચાયત સત્તાવાળાઓ, ડિઝાસ્ટર રિસ્પોન્સ ટીમને અગાઉથી એલર્ટ કરી દેવી જોઈએ.  અતિશય ગરમીની સ્થિતિનો સામનો કરવા માટે, શાળાઓમાં બાળકોને મલ્ટીમીડિયા લેક્ચરની મદદથી જાગૃત કરવા જોઈએ.  વડાપ્રધાને કહ્યું કે ગરમ હવામાન માટે પ્રોટોકોલ તૈયાર કરવો જોઈએ.  રેડિયો જિંગલ્સ, ટૂંકી ફિલ્મો અને પેમ્ફલેટની મદદથી લોકો સુધી શું કરવું અને શું નહીં કરવું જોઈએ.

હવામાનની આગાહી સરળ રીતે જાહેર કરવાનો આદેશ

આ સિવાય પીએમ મોદીએ આઈએમડીને રોજેરોજ હવામાનની આગાહી એવી રીતે જારી કરવાનો નિર્દેશ આપ્યો કે કોઈ પણ તેને સરળતાથી સમજી શકે.  બેઠકમાં એવી પણ ચર્ચા કરવામાં આવી હતી કે ટીવી ચેનલ, રેડિયો જેવા માધ્યમો હવામાનની આગાહીને સરળ ભાષામાં સમજાવવા માટે થોડો સમય ફાળવી શકે છે જેથી લોકો તેનાથી બચવા માટે સાવચેતી રાખી શકે.

જંગલની આગને રોકવા માટે યોજના બનાવવાની સૂચના

પ્રધાનમંત્રીએ તમામ હોસ્પિટલોના વિગતવાર ફાયર ઓડિટની જરૂરિયાત પર ભાર મૂક્યો હતો અને કહ્યું હતું કે તમામ હોસ્પિટલોમાં અગ્નિશામકો દ્વારા મોક ફાયર ડ્રીલ હાથ ધરવામાં આવે.  જંગલમાં લાગેલી આગને પહોંચી વળવા માટે સંકલિત પ્રયાસોની જરૂરિયાત પણ જણાવવામાં આવી હતી.  તે ચર્ચા કરવામાં આવી હતી કે જંગલની આગને રોકવા અને તેનો સામનો કરવાના પ્રયાસોને સમર્થન આપવા માટે પ્રણાલીગત ફેરફારો કરવા જોઈએ.