કુસ્તીબાજોના ભારે વિરોધ બાદ મોદી સરકારે મોટો નિર્ણય લીધો છે. રેસલિંગ એસોસિએશને જ સસ્પેન્ડ કરી દીધું છે. આ ઉપરાંત રેસલિંગ એસોસિએશનના નવા પ્રમુખ સંજય સિંહની માન્યતા પણ રદ્દ કરવામાં આવી છે. સંજય સિંહના નેતૃત્વમાં ભારતીય રેસલિંગ ફેડરેશનના નવા સંગઠનને રમત મંત્રાલયે સસ્પેન્ડ કરી દીધું છે. 24 ડિસેમ્બર, રવિવારના રોજ તેના નિર્ણયની જાહેરાત કરતા મંત્રાલયે જણાવ્યું હતું કે WFI સંસ્થાએ હાલના નિયમો અને નિયમોની સંપૂર્ણ અવગણના કરી છે.
રમત મંત્રાલયે જણાવ્યું છે કે રાષ્ટ્રીય સ્પર્ધાઓની જાહેરાત ઉતાવળમાં કરવામાં આવી હતી અને યોગ્ય પ્રક્રિયાનું પાલન કરવામાં આવ્યું ન હતું.
મંત્રાલયે વધુમાં જણાવ્યું કે નવા ચૂંટાયેલા બોડીના પ્રમુખ – સંજય કુમાર સિંહે – 21 ડિસેમ્બરે જાહેરાત કરી હતી કે જુનિયર રાષ્ટ્રીય સ્પર્ધાઓ આ વર્ષના અંત પહેલા શરૂ થશે. મંત્રાલયે સમજાવ્યું કે આ નિયમોની વિરુદ્ધ છે અને ઓછામાં ઓછા 15 દિવસની નોટિસની જરૂર છે જેથી કુસ્તીબાજો તૈયારી કરી શકે.
ઓલિમ્પિક મેડલ વિજેતા સાક્ષી મલિકની નિવૃત્તિ અને બજરંગ પુનિયાને પદ્મશ્રી પુરસ્કાર પરત લીધા બાદ રમત મંત્રાલયે આ મોટો નિર્ણય લીધો છે. આ સાથે રમત મંત્રાલયે રેસલિંગ એસોસિએશનના તમામ આગામી કાર્યક્રમો પણ રદ્દ કરી દીધા છે. રમતગમત મંત્રાલયે પોતાના આદેશમાં કહ્યું છે કે નવા એસોસિએશને નિયમો વિરુદ્ધ આગામી ટુર્નામેન્ટ અને ઈવેન્ટ્સની જાહેરાત કરી છે.
તાજેતરમાં રેસલિંગ એસોસિએશને જુનિયર નેશનલ ચેમ્પિયનશિપની જાહેરાત કરી હતી, જેમાં આ ટુર્નામેન્ટ 28 ડિસેમ્બરથી યુપીના ગોંડામાં શરૂ થવાની હતી. કુસ્તી છોડી ચૂકેલી સાક્ષી મલિકે આ અંગે સવાલો ઉઠાવ્યા હતા. તેણે કહ્યું હતું કે, ‘મેં કુસ્તી છોડી દીધી છે પરંતુ હું ગઈકાલે રાતથી જ ચિંતિત છું. જે જુનિયર મહિલા કુસ્તીબાજો મને ફોન કરીને કહી રહ્યા છે કે 28મીથી જુનિયર રાષ્ટ્રીય કુસ્તી યોજાવા જઈ રહી છે અને તે નવા કુસ્તી મહાસંઘનું શું કરવું? ગોંડાના નંદની નગરમાં તેઓનું આયોજન કર્યું છે?
