- દે ધના ધન !!!
- સામાન્ય ચૂંટણી એપ્રિલ – મે મહિનામાં યોજાવાની શક્યતા : આઇપીએલનું શેડ્યૂલ હજુ સુધી જાહેર થયું નથી
ઇન્ડિયન પ્રીમિયર લીગની આગામી સિઝન 22 માર્ચથી શરૂ થશે અને લોકસભાની ચૂંટણી હોવા છતાં, તે સંપૂર્ણ રીતે દેશમાં યોજવામાં આવશે. આઈપીએલના પ્રમુખ અરુણ ધૂમલે પીટીઆઈ-ભાષાને આ માહિતી આપી હતી. સામાન્ય ચૂંટણી એપ્રિલ અને મે મહિનામાં યોજાવાની શક્યતા છે અને તેથી જ આઇપીએલ 17મી સિઝનનું શેડ્યૂલ હજુ સુધી જાહેર કરવામાં આવ્યું નથી. અરુણ ધૂમલે જણાવ્યું હતું કે શરૂઆતમાં ફક્ત આ લીગના પ્રથમ 15 દિવસના શેડ્યૂલની જાહેરાત કરવામાં આવશે. સામાન્ય ચૂંટણીની તારીખોની જાહેરાત બાદ બાકીની મેચોના સમયપત્રકની જાહેરાત કરવામાં આવશે.
આગામી મહિનાની શરૂઆતમાં લોકસભાની ચૂંટણીની તારીખો જાહેર થવાની શક્યતા છે. ધૂમલે કહ્યું, ‘અમે 22 માર્ચથી ટૂર્નામેન્ટ શરૂ કરવાની યોજના બનાવી રહ્યા છીએ. અમે સરકારી એજન્સીઓ સાથે મળીને કામ કરી રહ્યા છીએ. અમે પ્રારંભિક પ્રોગ્રામ રિલીઝ કરનાર પ્રથમ હોઈશું. સમગ્ર ટુર્નામેન્ટનું આયોજન ભારતમાં કરવામાં આવશે. તમને જણાવી દઈએ કે આ પહેલા 2009માં સામાન્ય ચૂંટણી દરમિયાન આઈપીએલની આખી સીઝનનું આયોજન દક્ષિણ આફ્રિકામાં કરવામાં આવ્યું હતું, જ્યારે 2014માં તેની કેટલીક મેચોનું આયોજન યુએઈમાં કરવામાં આવ્યું હતું. આ પછી, 2019 સામાન્ય ચૂંટણીઓ દરમિયાન, આ લીગનું સમગ્ર દેશમાં આયોજન કરવામાં આવ્યું હતું.
જૂનમાં યોજાનારા ટી 20 વર્લ્ડ કપને ધ્યાનમાં રાખીને આઇપીએલ ની ફાઈનલ 26 મેના રોજ યોજવામાં આવી શકે છે. ભારતીય ટીમ 5 જૂને ન્યૂયોર્કમાં આયર્લેન્ડ સામે ટી 20 વર્લ્ડ કપમાં પોતાના અભિયાનની શરૂઆત કરશે. આ ટુર્નામેન્ટ 1 જૂને અમેરિકા અને કેનેડા વચ્ચેની મેચથી શરૂ થશે. સામાન્ય રીતે આઇપીએલ શરૂઆતની મેચ પાછલા વર્ષના વિજેતા અને ઉપવિજેતા વચ્ચે હોય છે. આવી સ્થિતિમાં તેની પ્રારંભિક મેચ ચેન્નાઈ સુપર કિંગ્સ અને ગુજરાત ટાઇટન્સ વચ્ચે રમાય તેવી શક્યતા છે.
10 ટીમો વચ્ચે જંગ ખેલાશે
આઇપીએલ 2024 સિઝનમાં 10 ટીમો ખિતાબ માટે લડશે. મુંબઈ ઈન્ડિયન્સ, ચેન્નાઈ સુપર કિંગ્સ, કોલકાતા નાઈટ રાઈડર્સ, રોયલ ચેલેન્જર્સ બેંગ્લોર, રાજસ્થાન રોયલ્સ, પંજાબ કિંગ્સ, સનરાઈઝર્સ હૈદરાબાદ, દિલ્હી કેપિટલ્સ, ગુજરાત ટાઇટન્સ અને લખનૌ સુપર જાયન્ટ્સ. મુંબઈ અને ચેન્નાઈ એવી ટીમ છે જેણે ટૂર્નામેન્ટમાં સૌથી વધુ ટ્રોફી જીતી છે. બંને 5-5 વખત ટાઈટલ જીતી ચૂક્યા છે. ચેન્નાઈ ડિફેન્ડિંગ ચેમ્પિયન છે. ધોનીની આગેવાનીમાં ચેનાઇએ 2023ની ફાઇનલમાં ગુજરાતને હરાવીને પાંચમું ટાઇટલ જીત્યું હતું.
