ફકત 9 દિવસમાં જ આચરી લેવાયું કૌભાંડ: પોલીસે 9 શખ્સોની કરી ધરપકડ,ચીની નાગરિક ફરાર
રાજ્યમાં એક મોટી છેતરપિંડીનો બનાવું સામે આવ્યો છે જેમાં એક ચાઇનીઝ નાગરિકે ગુજરાતમાં તેના સાગરીતો સાથે મળીને ફૂટબોલ સટ્ટા એપ્લિકેશનના નામે ફકત 9 જ દિવસમાં આશરે 1200 લોકોના રૂ. 1400 કરોડ ઉસેડી લીધાનો અહેવાલ સામે આવતા ખળભળાટ મચવા પામ્યો છે.
પ્રાપ્ત વિગત અનુસાર વૂં ઉયાન બે નામનો ચાઇનીઝ નાગરિક વર્ષ 2020 થી 2022 દરમિયાન સતત ગુજરાત પ્રવાસે આવ્યો હતો. જેણે કથિત રીતે પાટણ અને બનાસકાંઠા જિલ્લામાં ફૂટબોલ સટ્ટાનું કૌભાંડ આચર્યું હતું. જે કૌભાંડનો ભેદ ઉકેલવા પોલીસે એક એસઆઈટીની પણ રચના કર્યાનું સામે આવ્યું છે.
સીઆઈડી(ક્રાઈમ)ના અધિકારીઓએ જણાવ્યું હતું કે જૂન 2022માં તેમને છેતરપિંડી વિશે જાણ થઈ હતી. જ્યારે તેમને જાણવા મળ્યું હતું કે કેટલાક કોન્મેન “દાની ડેટા” એપ્લિકેશન દ્વારા ગુજરાત અને ઉત્તર પ્રદેશમાં લોકોને નિશાન બનાવી રહ્યા છે. આગ્રા પોલીસે તપાસ શરૂ કરી અને સીઆઈડી (ક્રાઈમ)ની ટીમે ઉત્તર ગુજરાતમાં કેટલાંક લોકો સાથે જોડાયેલી કડીઓ શોધી કાઢી છે.
અમારી તપાસ દરમિયાન અમને જાણવા મળ્યું કે ચાઇનીઝ નાગરિક 2020 અને 2022 ની વચ્ચે ભારતમાં હતો. તેણે પાટણ અને બનાસકાંઠામાં સમય વિતાવ્યો હતો જ્યાં તે અસંખ્ય સ્થાનિકોને મળ્યો અને તેમને ઉંચા વળતરની લાલચ આપી રોકાણ કરાવ્યું હતું. ત્યારબાદ તેણે અને ગુજરાતમાં તેના સાથીઓએ એપ લોન્ચ કરી હતી. તેણે અનેક લોકોને સટ્ટો રમી ઊંચું વળતર મેળવવા લલચાવ્યા હતા.
સરેરાશ ઉયાનબે રોજના 200 કરોડ રૂપિયાની છેતરપિંડી આચરવામાં સફળ રહ્યાનું સામે આવ્યું છે. મુખ્યત્વે ફૂટબોલમાં સટ્ટો રમીને ઊંચું વળતર મેળવવાની લાલચમાં 15 થી 75 વર્ષની વયના લોકો શિકાર બન્યાનું સામે આવ્યું છે. આશરે 9 દિવસ એપ્લિકેશન ચાલ્યા બાદ એકાએક બંધ થઇ જતાં લોકોને સમજાયું કે તેમની સાથે છેતરપિંડી આચરી લેવામાં આવી છે.
સીઆઈડી (ક્રાઈમ) સાયબર સેલે ત્યારપછી આ કેસ સાથે જોડાયેલા નવ વ્યક્તિઓની ધરપકડ કરી હતી, જેમણે હવાલા નેટવર્ક દ્વારા શેલ કંપનીઓની સ્થાપના કરીને અને તેમાં નાણાં ખસેડવા માટે ઉયાનબેને કથિત રીતે મદદ કરી હતી.
જો કે, ગુજરાત પોલીસે ઓગસ્ટ 2022 માં પાટણમાં આઈટી એક્ટ હેઠળ છેતરપિંડી અને ઉલ્લંઘન માટે એફઆઈઆર દાખલ કર્યા પછી એક્શનમાં આવી ત્યાં સુધીમાં આ વિસ્તરિત ષડયંત્રનો ઓરકેસ્ટ્રેટર અદ્રશ્ય થઈ ગયો હતો અને ચીન પરત ફરવા માટે ભારતની બહાર નીકળી ગયો હતો.
