Abtak Media Google News
  • શર્મા લીડરશિપના ગુણથી ભરપૂર
  • રોહિત એકમાત્ર એવો સુકાની કે જે અન્ય માટે પણ વિચારે છે

રોહિત શર્માની કપ્તાની હેઠળ, ભારતીય ટીમે તાજેતરમાં ઇંગ્લેન્ડ સામે 5 મેચની હોમ ટેસ્ટ શ્રેણી 4-1થી જીતી હતી. આ શ્રેણીની ત્રીજી ટેસ્ટ મેચ દરમિયાન સ્ટાર સ્પિનર રવિચંદ્રન અશ્વિન બીજા દિવસે જ પોતાના ઘરે પરત ફર્યો હતો. પાછળથી માહિતી મળી કે તેની માતાની તબિયત ખરાબ છે.જોકે, અશ્વિન એક દિવસ બાદ જ મેચમાં રમવા પરત ફર્યો હતો. પરંતુ અશ્વિને હવે આ સમગ્ર મામલે મોટો ખુલાસો કર્યો છે. તેણે તેની યુટ્યુબ ચેનલ પર જણાવ્યું છે કે કેવી રીતે તે તેની માતાની તબિયત વિશે સાંભળીને રડવા લાગ્યો હતો.

આ પછી કેપ્ટન રોહિત શર્મા અને કોચ રાહુલ દ્રવિડ તેના રૂમમાં આવ્યા અને તેને ઘરે જવા કહ્યું. અશ્વિને જણાવ્યું કે તે સમયે રાજકોટથી કોઈ ફ્લાઈટ નહોતી. આવી સ્થિતિમાં રોહિતે જે પણ કર્યું તેણે બધાનું દિલ જીતી લીધું. રોહિતે ચાર્ટર પ્લેન બુક કરાવવાનો પૂરો પ્રયાસ કર્યો. તમને જણાવી દઈએ કે અશ્વિને ત્રીજી ટેસ્ટમાં જ પોતાના ટેસ્ટ કરિયરની 500 વિકેટ પૂરી કરી હતી. આ પછી જ જ્યારે અશ્વિનને ખબર પડી કે તેની માતા બીમાર છે તો તે ઘરે જવા માંગતો હતો. તેણે ડોક્ટરને પૂછ્યું કે માતા કેવી છે અને શું તે બેભાન છે? જવાબ મળ્યો કે તે જોવાની સ્થિતિમાં નથી. આવી સ્થિતિમાં અશ્વિનની આંખોમાં આંસુ હતા.અશ્વિને જણાવ્યું કે તેણે રાજકોટથી ચેન્નાઈની ફ્લાઈટ શોધવાનું શરૂ કર્યું, પરંતુ તેને કોઈ ફ્લાઈટ મળી નહીં. રાજકોટ એરપોર્ટ સાંજે 6 વાગ્યે બંધ થાય છે. હવે શું કરવું તે તેમને સમજાતું ન હતું. તે જ સમયે રોહિત અને દ્રવિડ તેના રૂમમાં આવ્યા.

અશ્વિને કહ્યું, ‘રોહિત અને રાહુલ ભાઈ મારા રૂમમાં આવ્યા. રોહિતે કહ્યું કે વિચારવાનું બંધ કરો અને પરિવાર પાસે જાઓ. તે મારા માટે ચાર્ટર ફ્લાઇટની વ્યવસ્થા કરવાનો પ્રયાસ કરી રહ્યો હતો. આ પછી કમલેશને રોહિતનો ફોન આવ્યો અને તેણે મારા વિશે પૂછ્યું અને હું ઠીક છું કે કેમ. સ્ટાર સ્પિનરે આગળ કહ્યું, ‘આ મુશ્કેલ સમયમાં તેને મારી સાથે રહેવા માટે પણ કહ્યું. ત્યારે રાતના સાડા નવ વાગ્યા હતા. હું આશ્ચર્યચકિત થઈ ગયો હતો. હું કલ્પના પણ કરી શકતો નથી. મેં વિચાર્યું કે જો હું કેપ્ટન હોત તો મેં મારા ખેલાડીને ઘરે જવાનું કહ્યું હોત પણ શું મેં લોકોને તેની સંભાળ રાખવા માટે બોલાવ્યા હોત? ખબર નથી. મેં તે દિવસે રોહિત શર્મામાં એક જબરદસ્ત સુકાની જોયો.અશ્વિને કહ્યું કે તે ઘણા કેપ્ટનના નેતૃત્વમાં રમ્યો છે પરંતુ રોહિતમાં કંઈક અલગ છે. તેનું હૃદય સ્વચ્છ છે. તેણે ધોનીની બરાબરી પાંચ આઇપીએલ ટ્રોફી જીતી છે. તે સરળ નથી. ધોની પણ મદદ કરે છે પરંતુ રોહિત એક ડગલું આગળ વધે છે.

© 2011 - 2024 Abtak Media. Developed by ePaper Solution.