Abtak Media Google News
  • એઆઇનું હનુમાન મોડેલ ચેટજીપીટીને આપશે ટક્કર
  • મોડેલ હેલ્થકેર, ગવર્નન્સ, ફાઈનાન્શિયલ સર્વિસિસ અને એજ્યુકેશનના ક્ષેત્રમાં 11 ભાષાઓમાં કરશે કામ

વિશ્વ આખું એઆઈ ક્ષેત્રે સતત આગળ વધી રહ્યું છે. તેમાં હવે રિલાયન્સે પણ ઝંપલાવ્યું છે.  અત્યારે ચેટજીપીટીએ આખી દુનિયામાં ચર્ચા જગાવી છે ત્યારે મુકેશ અંબાણી પણ ચેટ જીપીટીના જવાબમાં ભારતીય એઆઈ લોન્ચ કરવાના છે. આ માટે રિલાયન્સ ઈન્ડસ્ટ્રીઝ તેના એઆઈ ટૂલ ‘હનુમાન’ પર કામ કરી રહી છે જેને માર્ચ મહિનામાં  લોન્ચ કરવામાં આવશે. આગામી દિવસોમાં ચેટજીપીટી અને હનૂમાન વચ્ચે ટક્કર થવાની શક્યતા છે.

ભારતમાં સ્વદેશી આર્ટિફિશિયલ ઈન્ટેલિજન્સ વિકસાવવા માટે આ એક મોટું કદમ હશે. મુકેશ અંબાણીની કંપની રિલાયન્સ ઈન્ડસ્ટ્રીઝ અને ભારતની આઈઆઈટીના સહયોગથી ભારત જીપીટી ગ્રૂપ બનાવવામાં આવ્યું છે અને તે હવે ‘હનુમાન’લોન્ચ કરશે. હનૂમાન એ ચેટ જીપીટી ટાઈપની સર્વિસ હશે.

હનૂમાનને તૈયાર કરવા માટે ભારતની આઠ આઈઆઈટી, રિલાયન્સ જિયો ઈન્ફોકોમ અને કેન્દ્ર સરકારે હાથ મિલાવ્યા છે. તાજેતરમાં મુંબઈ ખાતે ટેક્નોલોજી કોન્ફરન્સ યોજાઈ હતી જેમાં આ મોડેલની આછી ઝલક આપવામાં આવી હતી. તેમાં એક મોટર સાઈકલ મિકેનિકે તમિલ ભાષામાં એઆઈ બોટ સાથે વાતચીત કરી હતી. એક બેન્કરે આ ટૂલ સાથે હિંદીમાં વાત કરી હતી જ્યારે હૈદરાબાદ સ્થિત એક ડેવલપરે આ ટૂલનો ઉપયોગ કરીને કોમ્પ્યુટક કોડ રાઈટ કર્યા હતા. આ મોડેલ ચાર ફિલ્ડમાં કામ કરશે અને તે 11 ભાષાઓમાં ઉપલબ્ધ હશે. તેના કારણે હેલ્થકેર, ગવર્નન્સ, ફાઈનાન્શિયલ સર્વિસિસ અને એજ્યુકેશનના ક્ષેત્રમાં આખું ચિત્ર બદલાઈ જાય તેવી શક્યતા છે.

આઈઆઈટી બોમ્બેના ડિપાર્ટમેન્ટ ઓફ કોમ્પ્યુટર સાયન્સ એન્ડ એન્જિનિયરિંગના ચેર ગણેશ રામાક્રિષ્નને કહ્યું કે આ મોડેલ સ્પીચ-ટુ-ટેક્સ્ટ કેપેબિલિટી પણ દર્શાવશે. તેથી તે વધારે યુઝર ફ્રેન્ડલી બનશે. આ ઉપરાંત બીજી કંપનીઓ પણ એઆઈ પર કામ કરી રહી છે. તેમાં અબજોપતિ વિનોદ ખોસલાના ફંડ અને લાઈટસ્પીડ વેન્ચર્સ પાર્ટનર્સ જેવા વેન્ચર કેપિટલ રોકાણકારો સામેલ છે. તેઓ સર્વમ અને કૃત્રિમ નામના સ્ટાર્ટઅપ પર કામ કરે છે. તેઓ પણ ભારત માટે ખાસ કસ્ટમાઈઝ્ડ ઓપન સોર્સ્ડ એઆઈ મોડેલ્સ પર કામ કરે તેવી શક્યતા છે.

રિલાયન્સ જિયો ચોક્કસ પ્રકારના ઉપયોગ માટે કસ્ટમાઈઝ્ડ મોડેલ પર કામ કરી રહી છે. ટેલિકોમથી લઈને રિટેલ સહિતના બિઝનેસમાં હાજરી ધરાવતી રિલાયન્સ ઈન્ડસ્ટ્રીઝ ઘણા સમયથી જિયો બ્રેઈન પર કામ કરે છે. જીઓ બ્રેઇન એ 45 કરોડથી વધારે સબસ્ક્રાઈબર્સના નેટવર્ક પર આર્ટિફિશિયલ ઈન્ટેલિજન્સનો ઉપયોગ કરવા માટેનું એક નેટવર્ક છે. ભારત જીપીટી એ ભારતમાં આ પ્રકારની પ્રથમ પ્રાઈવેટ-પબ્લિક પાર્ટનરશિપ છે અને દરેક ફિલ્ડના મોટા રોકાણકારો તેમાં સામેલ છે.

© 2011 - 2024 Abtak Media. Developed by ePaper Solution.