Abtak Media Google News
  • ગુજરાતની તમામ જેલોમાં પણ 100 દિવસ સુધી દરેક બંદીવાન ભાઇઓ-બહેનો અને જેલના સ્ટાફને યોગના લાભ અને યોગની સમજૂતી ઉપરાંત જીવનમાં સકારાત્મકતા લાવવા યોગના તાલીમ કાર્યક્રમોનું આયોજન કરાશે

રાજ્ય સરકાર દ્વારા ગુજરાતભરમાં 21મી, જૂને આંતરરાષ્ટ્રિય યોગ દિવસની ભવ્યાતિભવ્ય ઉજવણી કરાશે. જેના ભાગરુપે, ભારત-પાકિસ્તાનની બોર્ડર–નડાબેટ ખાતે લાખો નાગરીકો યોગાભ્યાસ કરીને “યોગોત્સવ”ની ભવ્યાતિભવ્ય ઉજવણી કરશે. આ ઉપરાંત ગુજરાત સરકાર દ્વારા યોગ દિવસ પૂર્વે આગામી 100 દિવસ સુધી રાજ્યભરમાં યોગ તાલીમના 100 જેટલા કાર્યક્રમો યોજાશે. ગુજરાતની તમામ જેલોમાં પણ 100 દિવસ સુધી દરેક બંદીવાન ભાઇઓ-બહેનો અને જેલના સ્ટાફને યોગના લાભ અને યોગની સમજૂતી ઉપરાંત જીવનમાં સકારાત્મકતા લાવવા યોગના તાલીમ કાર્યક્રમો પણ યોજાશે.

યોગ દિવસની ઉજવણી પૂર્વે ગાંધીનગર ખાતે રમત-ગમત રાજ્ય મંત્રી હર્ષ સંઘવીએ આંતરરાષ્ટ્રીય યોગ દિવસ માટે ‘100 Days to Go’ કાઉન્ટ ડાઉનની શરૂઆત કરાવી હતી અને જણાવ્યું હતું કે, ગત એક વર્ષ દરમિયાન ગુજરાતે યોગાભ્યાસને પ્રોત્સાહિત કરતા બે વર્લ્ડ રેકોર્ડ નોંધાવી વિશ્વભરમાં ભારતનું નામ રોશન કર્યું છે.

વર્ષ 2023માં યોગ દિવસે ગુજરાતમાં ઐતિહાસિક દ્રશ્યો જોવા મળ્યા હતા. રાજ્યમાં એક સાથે લાખો નાગરિકોએ યોગાભ્યાસ કરીને ગીનીઝ બુક ઓફ વર્લ્ડ રેકોર્ડમાં નોંધણી કરાવી હતી ત્યારબાદ વર્ષ 2024ની શરૂઆતમાં જ એક સાથે લાખો ગુજરાતીઓએ સૂર્ય નમસ્કાર કરીને વર્લ્ડ રેકોર્ડ નોંધાવ્યો છે. વડાપ્રધાન નરેન્દ્ર મોદીએ યુનાઇટેડ નેશન્સને કરેલ પ્રસ્તાવનો સ્વીકાર કરી, 21મી જૂનને આંતરરાષ્ટ્રીય યોગ દિવસ તરીકે ઉજવવાનો ઐતિહાસિક નિર્ણય લીધો હતો. પરિણામે આજે સમગ્ર વિશ્વ પ્રતિવર્ષ 21મી જૂનના રોજ આંતરરાષ્ટ્રીય યોગ દિવસની ઉજવણી કરે છે. દેશની ઋષિ પરંપરા “યોગ”ને ગુજરાતના ઘર-ઘર સુધી પહોંચાડવાની ગુજરાત સરકારે નેમ લીધી છે. રાજ્ય સરકારના યોગ બોર્ડ દ્વારા છેલ્લા એક વર્ષમાં 100થી વધુ યોગ કોચ અને 20,000થી વધુ યોગ ટ્રેનરો તૈયાર કર્યા છે.

© 2011 - 2024 Abtak Media. Developed by ePaper Solution.