કાર્ડનો ક્લોન: મિનિટોમાં કરોડો ઉસેડી લીધા!!!

બેંક ખાતામાં પૈસા રાખવા હવે કેટલા સલામત ?

અમદાવાદના વેપારીનું સિમ કાર્ડ બંધ કરી ગઠિયાઓએ બેંક ખાતામાંથી રૂ.2.39 કરોડ ઉપાડી લીધા

અમદાવાદ શહેરના બોડકદેવ વિસ્તારમાં ધંધો ચલાવતા એક વેપારીએ બુધવારે સ્કેમર્સે તેના મોબાઈલ ફોનનું સિમ કાર્ડ ક્લોન કરીને ત્રણ કલાકમાં બેંક ખાતામાંથી 2.39 કરોડ રૂપિયા ઉપાડી લીધા હોવાની ફરિયાદ સાયબર ક્રાઈમ પોલીસ સમક્ષ નોંધાવી હતી.

34 વર્ષનો અલ્કેશ ગંગાણી મકરબામાં આવેલી અલ-બુર્જ સોસાયટીમાં રહે છે અને બોડકદેવ સ્થિત ઓફિસમાં ઉન અને દોરાંના એક્સપોર્ટનું કામ કરે છે. ગંગાણી તેના કરંટ અકાઉન્ટમાં બેકિંગ ટ્રાન્ઝેક્શન માટે તેનો ફોનનો ઉપયોગ કરતો હતો. રવિવારે સાંજે આશરે 5.45 કલાકે, ગંગાણીના ફોનમાંથી નેટવર્ક જતું રહ્યું હતું. તેણે તરત જ ટેલિકોમ સર્વિસ પ્રોવાઈડરને ફોન કર્યો હતો. કસ્ટમર કેર એક્ઝિક્યુટિવે ગંગાણીને કોઈએ તેનું સિમ કાર્ડ ડિએક્ટિવ કરી દીધું હોવાનું જણાવ્યું હતું. ગંગાણી તરત જ ટેલિકોમ પ્રોવાઈડરના આઉટલેટ પર ગયો હતો અને કેટલાક ડોક્યુમેન્ટ વેરિફાઈ કરાવ્યા હતા. તેને ત્યાં નવું કાર્ડ આપવામાં આવ્યું હતું, જે રવિવારે રાતે આશરે 8.45 કલાકે એક્ટિવ થયું હતું.

28 ટ્રાન્ઝેક્શનથી ખાતામાંથી પૈસા ઉપડ્યા

સોમવારે સવારે, ગંગાણીના બિઝનેસ પાર્ટનર હેતલ પટેલના પતિ વિશાલ પટેલ, જે બોપલમાં રહે છે, તેણે ગંગાણીને ફોન કર્યો હતો અને તેમની કંપની ખાતામાંથી શંકાસ્પદ રીતે મોટી સંખ્યામાં ટ્રાન્ઝેક્શન થયા હોવાનું જણાવ્યું હતું. ગંગાણીએ તેને ખાતામાં પૈસા ઉપડ્યા હોવાના મેસેજ કે કોઈ પણ પ્રકારનો ઓટીપી ન આવ્યો હોવાનું કહ્યું હતું. તે તેની બેંકમાં ગયો હતો અને 28 જેટલા ટ્રાન્ઝેક્શનથી તેના ખાતામાંથી 2.39 કરોડ રૂપિયા ઉપડ્યા હોવાનું જાણવા મળ્યું હતું.

એક ટ્રાન્ઝેક્શન ફ્રીઝ કરી રૂ.10 લાખ પરત મેળવ્યા

ગંગાણીએ કહ્યું હતું કે, તેણે તે એક ટ્રાન્ઝેક્શન ફ્રીઝ કરી શક્યો હતો અને તેના ખાતામાં 10 લાખ રૂપિયા પરત મેળવ્યા હતા. સાયબર ક્રાઈમ પોલીસે આઈપીસીની કલમ હેઠળ છેતરપિંડી અને ગુનાહિત કાવતરાનો કેસ નોંધ્યો હતો. સ્કેમર્સની ઓળખ હજી સુધી થઈ નથી. સાયબર ક્રાઈમ પોલીસના સૂત્રોએ જણાવ્યું હતું કે, સ્કેમર્સને ગંગાણીના ઈમેઈલનો એક્સેસ મેળવી લીધો હતો અને તેનો ઉપયોગ ટ્રાન્ઝેક્શન માટે કર્યો હતો. તે સમયે ગંગાણીનું કાર્ડ ડિએક્ટિવેટ થઈ જતાં તેને કોઈ એલર્ટ મેસેજ મળ્યા નહોતા.

સ્કેમર્સ પહેલા બધા ડોક્યુમેન્ટ મેળવે છે, બાદમાં નવું સિમ કઢાવીને ફ્રોડ કરે છે

સાયબર ક્રિમિનલ જે-તે વ્યક્તિના બેંક અકાઉન્ટ, એડ્રેસ, પાન નંબર જન્મ તારીખ અને મોબાઈલ નંબર મેળવી લે છે. સ્કેમર્સ ફેક પાન કાર્ડ મેળલે છે અને તેનો ઉપયોગ પીડિતના નામ પરથી નવું સિમ કાર્ડ ઈશ્યૂ કરાવવા માટે કરે છે. એકવાર નવું સિમ કાર્ડ મળી જાય એટલે પીડિતનું જૂનું સિમ ડિએક્ટિવેટ થઈ જાય છે. તેના ખાતામાંથી પૈસા ટ્રાન્સફર થયા હોવા વિશે મેસેજ ન મળે તેની તે ખાતરી કરે છે. આવા કેસમાં, પીડિતનો મોબાઈલ ફોન ડિસકનેક્ટ થઈ જાય છે કારણ કે, સાયબર ક્રિમિનલ નવું સિમ વાપરી રહ્યા હોય છે. છેતરપિંડી થઈ હોવાની જાણ પીડિતને મોડેથી થાય છે.