કગીસો રબાડાએ ચાર વિકેટ ઝડપ્યા બાદ શિખર ધવનની અળધી સદીએ પંજાબને વિજય અપાવ્યો
ઝડપી બોલર કાગિસો રબાડાની ઘાતક બોલિંગ બાદ શિખર ધવનની અડધી સદી અને ભાનુકા રાજપક્સેની આક્રમક બેટિંગની મદદથી પંજાબ કિંગ્સે IPL ટી20 ક્રિકેટ ટુર્નામેન્ટની 15મી સિઝનમાં ગુજરાત ટાઈટન્સ સામે આઠ વિકેટે આસાન વિજય નોંધાવ્યો હતો. IPL-2022માં મુંબઈના ડીવાય પાટીલ સ્ટેડિયમમાં મંગળવારે રમાયેલી મેચમાં પંજાબ કિંગ્સને વિજય માટે વધારે મહેનત કરવી પડી ન હતી. પોઈન્ટ ટેબલમાં ટોચના સ્થાને રહેલી ગુજરાત ટાઈટન્સની ટીમે ટોસ જીતીને પ્રથમ બેટિંગનો નિર્ણય કર્યો હતો.
જોકે ટીમ મોટો સ્કોર નોંધાવી શકી ન હતી. સાઈ સુદર્શનની 65 રનની ઈનિંગ્સની મદદથી ગુજરાત ટાઈટન્સને 20 ઓવરમાં આઠ વિકેટે 143 રનનો સ્કોર નોંધાવ્યો હતો. પરંતુ શિખર ધવન અને રાજપક્સેની જોડીએ આ સ્કોરને વધારે આસાન બનાવી દીધો હતો. પંજાબે 16 ઓવરમાં બે વિકેટે 145 રન નોંધાવીને મેચ જીતી લીધી હતી. ધવન 62 રન નોંધાવીને નોટઆઉટ રહ્યો હતો. ગુજરાતનો આ બીજો પરાજય હતો અને હાલમાં ટીમ 16 પોઈન્ટ સાથે ટોચ પર છે.
પંજાબ કિંગ્સ સામે 144 રનનો લક્ષ્યાંક હતો જે ધવન અને રાજપક્સેની જોડીએ આસાન બનાવી દીધો હતો. ટીમે 10 રનના સ્કોર પર જોની બેરસ્ટોની વિકેટ ગુમાવી દીધી હતી. બાદમાં ઓપનર ધવને રાજપક્સે સાથે મળીને તાબડતોબ બેટિંગ કરી હતી. આ જોડીએ ગુજરાતના બોલર્સને હંફાવ્યા હતા અને વધારે સફળ થવા દીધા ન હતા. ગુજરાતના બોલર્સ એક પણ સમયે બંને બેટરને દબાણમાં લાવી શક્યા ન હતા.
આ જોડીએ 87 રનની ભાગીદારી નોંધાવી હતી. રાજપક્સે 28 બોલમાં પાંચ ચોગ્ગા અને એક સિક્સર સાથે40 રન નોંધાવીને આઉટ થયો હતો. ત્યારબાદ લિયામ લિવિંગસ્ટોને 10 જ બોલમાં 30 રન ફટકારીને ટીમના આસાન વિજયમાં મહત્વનું યોગદાન આપ્યું હતું. તેણે 10 બોલમાં બે ચોગ્ગા અને ત્રણ સિક્સર ફટકારી હતી અને અંત સુધી નોટઆઉટ રહ્યો હતો. જ્યારે ધવન 53 બોલમાં આઠ ચોગ્ગા અને એક સિક્સરની મદદથી 62 રન નોંધાવીને અણનમ રહ્યો હતો. ગુજરાત માટે મોહમ્મદ શમી અને લોકી ફર્ગ્યુસને એક-એક વિકેટ ઝડપી હતી.
ગુજરાત ટાઈટન્સે ટોસ જીતીને પ્રથમ બેટિંગનો નિર્ણય કર્યો હતો પંરતુ તેના બેટર્સનું પ્રદર્શન નિરાશાજનક રહ્યું હતું. ટીમ મોટો સ્કોર કરી શકી ન હતી. સાઈ સુદર્શને અડધી સદી ફટકારી હતી પરંતુ તે સિવાય કોઈ બેટર મોટી ઈનિંગ્સ રમી શક્યો ન હતો. ગુજરાતે 20 ઓવરમાં આઠ વિકેટે 143 રનનો સ્કોર નોંધાવ્યો હતો. ટીમે 17 રનના સ્કોર પર શુભમન ગિલની વિકેટ ગુમાવી દીધી હતી. તે નવ રન નોંધાવીને રન આઉટ થયો હતો. બાદમાં ઓપનર રિદ્ધિમાન સહા અને સાઈ સુદર્શને બાજી સંભાળવાનો પ્રયાસ કર્યો હતો. પંજાબ કિંગ્સ માટે કાગિસો રબાડાએ ચાર વિકેટ ઝડપી હતી. જ્યારે અર્શદીપ સિંહ, રિશિ ધવન અને લિવિંગસ્ટોને એક-એક વિકેટ ઝડપી હતી.
