શ્રીલંકા તરફથી ભાનુકા રાજપક્ષાએ શાનદાર 71 રનોની અણનમ ઈનિંગ્સ રમી મેન ઓફ ધ મેચ બન્યો: પાકિસ્તાન 147માં ઓલઆઉટ
દુબઈ ઈન્ટરનેશલ સ્ટેડિયમમાં પાકિસ્તાન અને શ્રીલંકા વચ્ચે એશિયા કપ 2022ની રોમાંચક ફાઈનલ મેચ રમાઈ હતી. આ મેચમાં પાકિસ્તાને ટોસ જીતીને પ્રથમ બોલિંગનો નિર્ણય કર્યો હતો. શ્રીલંકા તરફથી ભાનુકા રાજપક્ષાએ શાનદાર 71 રનોની અણનમ ઈનિંગ્સ રમી હતી. શ્રીલંકાએ 20 ઓવરના અંતે 6 વિકેટ ગુમાવીને 170 રન બનાવ્યા હતા. પાકિસ્તાન તરફથી ઈનિંગ્સની ખરાબ શરૂઆત થઈ હતી. કેપ્ટન બાબર આઝમ 5 રન બનાવીને આઉટ થયો હતો. જો કે, ઓપનર મોહમ્મદ રિઝવાને 55 રનોની ઈનિંગ્સ રમી હતી. જો કે, શ્રીલંકાના બોલર્સની શાનદાર બોલિંગ આગળ પાકિસ્તાનના બેટર્સ ટકી શક્યા ન હતા. પાકિસ્તાનની ટીમ 147 રનો પર ઓલ આઉટ થઈ ગઈ હતી. શ્રીલંકાનો 23 રનોથી શાનદાર વિજય થયો હતો. શ્રીલંકા છઠ્ઠી વખત એશિયા કપ ચેમ્પિયન બન્યું હતું. શ્રીલંકા આ અગાઉ 1986, 1997, 2004, 2008 અને 2014માં એશિયા કપ ચેમ્પિયન બન્યું હતું.
ટોસ હારીને પ્રથમ બેટિંગ કરવા માટે ઉતરેલી શ્રીલંકાની ટીમની ખરાબ શરૂઆત થઈ હતી. ઓપનર કુશલ મેન્ડિસ 0 રન બનાવી પેવેલિયન પરત ફર્યો હતો, જ્યારે પથુમ નિસાંકા પણ માત્ર 8 રન બનાવી શક્યો હતો. ત્યારબાદ ત્રીજા ક્રમે ધનંજય ડી સિલ્વાએ 28 રનોની ઈનિંગ્સ રમી હતી, તો ગુનાથિલકા 1 રન બનાવી પરત ફર્યો હતો. આ સમયે શ્રીલંકાની ટીમ મુશ્કેલીમાં મુકાઈ હતી. પણ ત્યારબાદ ભાનુકા રાજપક્ષાએ શ્રીલંકા માટે શાનદાર ઈનિંગ્સ રમી હતી. રાજપક્ષાએ 45 બોલમાં 6 ચોગ્ગા અને 3 સિક્સની મદદથી 71 રનોની અણનમ ઈનિંગ્સ રમી હતી. આ ઉપરાંત કેપ્ટન શનાકા 2 રન બનાવી આઉટ થયો હતો. હસરંગાએ પણ 36 રનોની વિસ્ફોટક ઈનિંગ્સ રમી હતી. કરુણરત્ને 14 રન બનાવી આઉટ થયો હતો. શ્રીલંકાએ 20 ઓવરના અંતે 6 વિકેટ ગુમાવીને 170 રનોની ઈનિંગ્સ રમી હતી.
171 રનોના લક્ષ્યાંકનો પીછો કરવા ઉતરેલી પાકિસ્તાનની ટીમની ખરાબ શરૂઆત થઈ હતી. કેપ્ટન બાબર આઝમ 5 રન બનાવી પેવેલિયન પરત ફર્યો હતો. જ્યારે મોહમ્મદ રિઝવાને 55 રનોની શાનદાર ઈનિંગ્સ રમી હતી. પણ તેની ઈનિંગ્સ એળે ગઈ હતી. ફખર ઝમાન ગોલ્ડન ડકનો શિકાર બન્યો હતો. ઈફ્તિખાર અહેમદે 32 રન, તો મોહમ્મદ નવાઝે 6 રન બનાવી આઉટ થયો હતો. ખુશદીલ શાહ 2 રન, આસિફ અલી 0 રન, શાબાદ ખાન 8 રન બનાવી આઉટ થયો હતો. હસરંગાએ એક વિકેટમાં 3 વિકેટ ઝડપીને પાકિસ્તાનને ઘૂંટણિયે પાડી દીધું હતું. હરિસ રૌફે 13 રન, નસીમ શાહે 4 રન તો મોહમ્મદ હસનૈન 8 રન બનાવી આઉટ થયો હતો. પાકિસ્તાનની ટીમ 20 ઓવરના અંતે 147 રન બનાવી ઓલ આઉટ થઈ ગઈ હતી.
