ભારત vs ઝિમ્બાબ્વે T20 વર્લ્ડ કપ 2022: મેલબોર્નમાં રમાયેલી મેચમાં ભારતે ઝિમ્બાબ્વેને હરાવીને સેમિફાઇનલમાં જગ્યા બનાવી લીધી છે. T20 વર્લ્ડ કપ 2022ની 42મી મેચમાં ટીમ ઈન્ડિયાએ 71 રનથી જીત મેળવી હતી. પ્રથમ બેટિંગ કરતા ભારતે 187 રનનો ટાર્ગેટ આપ્યો હતો. જવાબમાં ઝિમ્બાબ્વેની ટીમ 115 રનના સ્કોર પર ઓલઆઉટ થઈ ગઈ હતી. ભારત માટે સૂર્યકુમાર યાદવે યાદગાર ઇનિંગ રમી હતી. જ્યારે રવિચંદ્રન અશ્વિન અને મોહમ્મદ શમીએ શાનદાર બોલિંગ બતાવી હતી. શમી અને હાર્દિક પંડ્યાએ 2-2 વિકેટ લીધી હતી.
ટીમ ઈન્ડિયાએ આપેલા લક્ષ્યનો પીછો કરતા ઝિમ્બાબ્વેની ટીમ 17.2 ઓવરમાં 115 રનમાં ઓલઆઉટ થઈ ગઈ હતી. ઝિમ્બાબ્વે તરફથી રેયાન બર્લે સૌથી વધુ 35 રન બનાવ્યા હતા. તેણે 22 બોલમાં 5 ફોર અને 1 સિક્સર ફટકારી હતી. સિકંદર રઝાએ 24 બોલમાં 34 રન બનાવ્યા હતા. તેણે 3 ચોગ્ગા ફટકાર્યા હતા. કેપ્ટન ક્રેગ ઈરવિન પણ ખાસ કરી શક્યો ન હતો. તે 15 બોલમાં 13 રન બનાવીને આઉટ થયો હતો. ઓપનર વેસ્લી મધવેરે ખાતું પણ ખોલાવી શક્યો નહોતો. તેને ભુવનેશ્વર કુમારે આઉટ કર્યો હતો. ચકબવા પણ શૂન્ય પર આઉટ થયો હતો.
ભારતીય બોલરોનું શાનદાર પ્રદર્શન
ટીમ ઈન્ડિયા માટે રવિચંદ્રન અશ્વિને સારી બોલિંગ કરી હતી. તેણે 4 ઓવરમાં 22 રન આપીને 3 વિકેટ લીધી હતી. મોહમ્મદ શમીએ 2 ઓવરમાં 14 રન આપીને 2 વિકેટ લીધી હતી. હાર્દિક પંડ્યાએ 3 ઓવરમાં 16 રન આપીને 2 વિકેટ લીધી હતી. અર્શદીપ સિંહે અસરકારક બોલિંગ કરી હતી. તેણે 2 ઓવરમાં 9 રન આપીને એક વિકેટ લીધી હતી. ભુવનેશ્વર કુમારે 3 ઓવરમાં 11 રન આપીને એક વિકેટ લીધી હતી. ભુવીએ મેડન ઓવર પણ લીધી હતી. અક્ષર પટેલને પણ સફળતા મળી.
ઝિમ્બાબ્વેના બોલરો સૂર્યા સામે નિષ્ફળ રહ્યા હતા.
પ્રથમ બેટિંગ કરતા ભારતે 20 ઓવરમાં 5 વિકેટ ગુમાવીને 186 રન બનાવ્યા હતા. આ દરમિયાન સૂર્યકુમાર યાદવે તોફાની ઇનિંગ રમી હતી. તેણે 25 બોલમાં અણનમ 61 રન બનાવ્યા હતા. સૂર્યાએ આ ઇનિંગ દરમિયાન 6 ફોર અને 4 સિક્સર ફટકારી હતી. આ પહેલા ઓપનર કેએલ રાહુલે પણ અડધી સદી ફટકારી હતી. તેણે 35 બોલમાં 51 રન બનાવ્યા હતા. તેની ઇનિંગમાં 3 ચોગ્ગા અને 3 છગ્ગાનો સમાવેશ થાય છે. વિરાટ કોહલી 26 રન બનાવીને આઉટ થયો, તેણે 2 ચોગ્ગા ફટકાર્યા. રોહિત શર્મા 15 રન બનાવીને પેવેલિયન પરત ફર્યો હતો. હાર્દિક પંડ્યાએ 18 બોલમાં 18 રન બનાવ્યા હતા.
