ગ્વાદર પોર્ટ ચાઇના-પાકિસ્તાન ઇકોનોમિક કોરિડોરનો મહત્વપૂર્ણ ભાગ, અહીં ચીની નાગરિકો પણ કામ કરતા હોય હુમલાને પગલે પાકિસ્તાન સરકાર લાલઘૂમ
બલૂચિસ્તાનના ગ્વાદર પોર્ટ પર આતંકી હુમલો થયો છે. અહેવાલો અનુસાર, બંદૂકો અને વિસ્ફોટકોથી સજ્જ અજાણ્યા હુમલાખોરો અચાનક પાકિસ્તાનના ગ્વાદર પોર્ટ ઓથોરિટી સંકુલમાં ઘૂસી ગયા અને પછી અંધાધૂંધ ગોળીબાર શરૂ કરી દીધો. હુમલાખોરો પોર્ટની અંદર સ્થિત બિલ્ડિંગમાં ઘૂસ્યા હતા. સ્થાનિક સુરક્ષાકર્મીઓએ વિસ્તારને ઘેરી લીધો હતો અને જવાબી કાર્યવાહી શરૂ કરી હતી. અહેવાલ મુજબ પોલીસ અને સુરક્ષા દળોએ આઠ સશસ્ત્ર હુમલાખોરોને ઠાર માર્યા છે.
સંકુલની અંદરથી જોરદાર વિસ્ફોટો અને ભારે ગોળીબારથી આસપાસનો વિસ્તાર હચમચી ગયો હતો. જીપીએ પાકિસ્તાનના ત્રીજા સૌથી મોટા બંદર ગ્વાદર પોર્ટના બાંધકામ સ્થળને હોસ્ટ કરવા ઉપરાંત વિવિધ સરકારી સંસ્થાઓ માટે હબ તરીકે સેવા આપે છે. આ હુમલો ગ્વાદર બંદર પર થયો હતો, જ્યાં ચીનના એન્જિનિયરો હાલમાં વ્યાપક બાંધકામ કાર્યમાં વ્યસ્ત છે. આ બંદર મહત્ત્વાકાંક્ષી ચાઇના-પાકિસ્તાન ઇકોનોમિક કોરિડોરનો એક ભાગ છે, જે બેઇજિંગના બેલ્ટ એન્ડ રોડ ઇનિશિયેટિવનું કેન્દ્ર છે.
અહીં મોટી સંખ્યામાં ચીની કર્મચારીઓ પણ કામ કરી રહ્યા છે. પાકિસ્તાનમાં ઘણા આતંકવાદી જૂથો દ્વારા ચીનના લક્ષ્યાંકો પર પહેલાથી જ હુમલા કરવામાં આવ્યા છે. ઑગસ્ટ 2023 માં, બંદૂકધારીઓએ ગ્વાદરમાં ચીની કામદારોના કાફલા પર હુમલો કર્યો અને અલગતાવાદી બલૂચિસ્તાન લિબરેશન આર્મીએ હુમલાની જવાબદારી સ્વીકારી. આ ઘટના બાદ ચીનના જવાનોની સુરક્ષા પણ ખતરામાં આવી ગઈ છે.
તમને જણાવી દઈએ કે ચીન-પાકિસ્તાન ઈકોનોમિક કોરિડોર પ્રોજેક્ટમાં ગ્વાદર પોર્ટ ખૂબ જ મહત્વપૂર્ણ છે. અરબી સમુદ્રમાં ચીનની પહોંચ માટે આ ખૂબ જ મહત્વપૂર્ણ બંદર છે. ગયા વર્ષે ડિસેમ્બરમાં, પાકિસ્તાન અને ચીને ગ્વાદર પોર્ટને સીપીઇસી હેઠળ લાવવા પર સહમતિ દર્શાવી હતી. બંને દેશોએ સંયુક્ત રીતે એક કરાર કર્યો હતો કે તેઓ સીપીઇસી હેઠળ ગ્વાદર પોર્ટની સંપૂર્ણ ક્ષમતાનો ઉપયોગ કરશે, જેનો ફાયદો પાકિસ્તાન અને ચીન બંનેને થશે. સીપીઇસી પ્રોજેક્ટ પાકિસ્તાનના બલૂચિસ્તાનમાં ગ્વાદર પોર્ટને ચીનના શિનજિયાંગ પ્રાંત સાથે જોડે છે.
આ ચીનની મહત્વાકાંક્ષી બિલિયન-ડોલર બેલ્ટ એન્ડ રોડ ઇનિશિયેટિવનો મોટો પ્રોજેક્ટ છે. ચીન અને પાકિસ્તાન વચ્ચે સીપીઇસી પ્રોજેક્ટ વર્ષ 2013માં શરૂ થયો હતો. આ અંતર્ગત ચીન પાકિસ્તાનમાં અનેક ઈન્ફ્રાસ્ટ્રક્ચર પ્રોજેક્ટ્સમાં રોકાણ કરી રહ્યું છે. ચીને સીપીઇસીની શરૂઆતમાં કહ્યું હતું કે તે આ પ્રોજેક્ટમાં 46 બિલિયન ડોલરનું રોકાણ કરશે, પરંતુ 2017 સુધીમાં, પ્રોજેક્ટની કિંમત વધીને 62 બિલિયન ડોલરથઈ ગઈ. ભારત શરૂઆતથી જ સીપીઈસીનો વિરોધ કરી રહ્યું છે કારણ કે આ પ્રોજેક્ટ પાકિસ્તાન અધિકૃત કાશ્મીરમાંથી પસાર થાય છે. ભારત આ ક્ષેત્રમાં કોઈપણ પ્રકારના વિદેશી રોકાણને અસ્વીકાર્ય માને છે.
સરહદ પારથી આતંકવાદીની કોઈ પણ કાર્યવાહી સહન નહિ કરીએ: શહેબાઝ શરીફ
પાકિસ્તાન અને અફઘાનિસ્તાન વચ્ચે સતત તણાવના અહેવાલો આવી રહ્યા છે. આ દરમિયાન પાકિસ્તાનના વડાપ્રધાન શહેબાઝ શરીફે કહ્યું છે કે તેમની સરકાર સરહદ પારથી આતંકવાદીઓની કોઈપણ કાર્યવાહીને સહન કરશે નહીં. વડા પ્રધાને કહ્યું કે પાકિસ્તાન તેના તમામ પડોશીઓ સાથે શાંતિથી રહેવા માંગે છે અને તેમને વિનંતી કરી કે તેઓ પાકિસ્તાન સાથે મળીને આતંકવાદ વિરુદ્ધ યોજના ઘડે અને “તેને ખતમ કરવા માટે નિષ્ઠાપૂર્વક કામ કરે.” અમારા પડોશી ભાઈઓ સાથે શાંતિપૂર્ણ વાતાવરણ ઇચ્છીએ છીએ. વેપાર કરવા ઈચ્છીએ છીએ અને સંબંધોને વિસ્તારવા ઈચ્છીએ છીએ પરંતુ કમનસીબે જો કોઈ પાડોશીની જમીનનો ઉપયોગ આતંકવાદ માટે થશે તો તેને સાંખી લેવામાં આવશે નહીં.
