ઘર ખરીદનારાઓ માટે રાહતના સમાચાર
રિઝર્વ બેંકે બેન્કોને બધી લોન રેપો રેટ સાથે જોડવાનો નિર્દેશ આપ્યો
સતત અપીલ બાદ હવે, ભારતીય રિઝર્વ બેંક (આરબીઆઈ)એ બેંકોને બધી લોન રેપો રેટ સાથે જોડવાનો નિર્દેશ આપ્યો છે. આરબીઆઈએ બધી બેંકોને ૧ ઓક્ટોબર રેપો રેટની સાથે હોમ લોન, ઓટો લોન, પર્સનલ લોન અને એમએસએમઈ સેક્ટરની બધી પ્રકારની લોનને જોડવા માટે કહ્યું છે. હકીકતમાં છેલ્લા કેટલાક મહિનાથી કેન્દ્રીય બેંક સતત બધી સરકારી અને પ્રાઈવેટ બેંકોને રેપો રેટ સાથે બેંક લોનને જોડવા માટે કહી રહી હતી, પરંતુ ઘણી બેંકો આરબીઆઈની અપીલને નજરઅંદાજ કરી રહી છે. તે પછી હવે કેન્દ્રીય બેંકને ડેડલાઈનની સાથે નિર્દેશ આપવો પડ્યો છે. તે ઉપરાંત આરબીઆઈને રેપો જેવી બહારના બેંચમાર્ક અંતર્ગત વ્યાજ દરોમાં ૩ મહિનામાં ઓછામાં ઓછો એક વખત ફેરફાર કરવા કહ્યું છે.
ગ્રાહકોની સતત ફરિયાદ રહી છે કે, આરબીઆઈ દ્વારા રેપો રેટમાં ઘટાડા છતાં બેંક વ્યાજ દર ઓછા નથી કરી રહી. એ વાતને લઈને રિઝર્વ બેંક પણ નારાજ હતી. ઉલ્લેખનીય છે કે, રિઝર્વ બેંક ૨૦૧૯માં રેપો રેટમાં કુલ ૪ વખત મળીને ૧.૧૦ ટકાનો ઘટાડો કરી ચૂકી છે. આ નાણાંકીય વર્ષમાં એપ્રિલ બાદથી અત્યાર સુધી કેન્દ્રીય બેંક ૦.૮૫ ટકા સુધીનો ઘટાડો કરી ચૂકી છે. રેપો રેટને વ્યાજ દર સાથે લિન્કિંગની વ્યવસ્થા લાગુ થવાનો સીધો ફાયદો ગ્રાહકોને મળશે. કેમકે, હવે ભવિષ્યમાં જ્યારે-જ્યારે રિઝર્વ બેંક રેપો રેટમાં ઘટાડો કરશે, ત્યારે-ત્યારે બેંકો માટે પણ વ્યાજ દરમાં ઘટાડો કરવો ફરજિયાત થઈ જશે. તેની અસર એ થશે કે તમારી હોમ લોન, ઓટો લોન સહિતની અન્ય લોનની ઈએમઆઈ ઘટી જશે. એટલું જ નહીં, રેપો રેટ સાથે લોનના લિન્કિંગની વ્યવસ્થા લાગુ થયા બાદ સિસ્ટમ પહેલા કરતા વધુ પારદર્શી બનશે. તેનાથી લોન લેનારી વ્યક્તિને વ્યાજ દર વિશે જાણ થશે. બેંક શું નફો લઈ રહી છે, તેની પણ જાણકારી રહેશે. તે ઉપરાંત ગ્રાહક બેંકોના લોનના વ્યાજ દરોની સરખામણી પણ કરી શકશે.
ગત દિવસોમાં રિઝર્વ બેંક ઓફ ઈન્ડિયાના ગવર્નર શક્તિકાંત દાસે બધી બેંકોને વ્યાજ દરને રેપો રેટ સાથે લિંક કરવાની અપીલ કરી હતી. પરંતુ, આરબીઆઈ ગવર્નરની અપીલ બાદ પણ કેટલીક બેંકોએ જ તેના પર અમલ કર્યો. મહત્વની વાત એ છે કે, જેમણે રેપો રેટ સાથે વ્યાજ દરોને જોડવાનો નિર્ણય કર્યો, તે બધી સરકારી બેંકો છે. આરબીઆઈ ગવર્નરની સલાહ સૌથી પહેલા ભારતીય સ્ટેટ બેંક (એસબીઆઈ)એ માની હતી. એસબીઆઈની જેમ જ જાહેર ક્ષેત્રની બેંક ઓફ બરોડા અને યુનિયન બેંકે પણ લોને રેપો રેટ સાથે લિંક કરવાનો નિર્ણય કર્યો. પરંતુ કેટલીક ખાનગી બેંકો તેને લઈને ગંભીર નહોંતી દેખાઈ રહી.
