સતત ત્રણ મેચમાં નિષ્ફળ રહેલી સનરાઈઝર્સની ઓપનિંગ જોડી ખરા સમયે રંગ લઈ આવશે?

• ડુ ઓર ડાઈ: ચેપોકમાં ટોસ નિર્ણાયક બનશે?
• મેદાન પર પ્રથમ દાવનો સરેરાશ જીતનો સ્કોર 180 રનથી ઉપર છે આ સ્થળ પર છેલ્લી દસ મેચોમાં પાવર પ્લેમાં સરેરાશ રન રેટ 8.5 રહ્યો

ઈન્ડિયન પ્રીમિયર લીગ 2024 ની ક્વોલિફાયર 2, શુક્રવાર, મે 24 ના રોજ ચેન્નાઈના ચિદમ્બરમ સ્ટેડિયમ ખાતે સનરાઈઝર્સ હૈદરાબાદ  અને રાજસ્થાન રોયલ્સ વચ્ચે રમાશે. આ મેચ જીતનારી ટીમ 26 મેના રોજ કોલકાતા નાઈટ રાઈડર્સ સાથે ફાઈનલ રમશે જ્યારે હારનાર ટીમ બહાર થઈ જશે. સનરાઇઝર્સ હૈદરાબાદ તેમના પ્રથમ પ્રયાસમાં ફાઇનલમાં પ્રવેશવામાં નિષ્ફળ રહી હતી. હૈદરાબાદને ક્વોલિફાયર 1માં કોલકાતા નાઈટ રાઈડર્સ સામે કારમી હારનો સામનો કરવો પડ્યો હતો. કોલકાતા નાઈટ રાઈડર્સ પહેલા જ આઈપીએલ 2024ની ફાઈનલમાં પહોંચી ગઈ છે. દરમિયાન રાજસ્થાન રોયલ્સે એલિમિનેટરમાં રોયલ ચેલેન્જર્સ બેંગ્લોરનો 6 મેચનો અજેય સિલસિલો તોડી નાખ્યો હતો.

આજના બીજા ક્વોલિફાયર મેચમાં તો અત્યંત નિર્ણાયક બનશે. બીજી તરફ સૌથી મોટી વાત એ છે કે સતત ત્રણ મેચમાં નિષ્ફળ ગયેલ હૈદરાબાદની ઓપનિંગ જોડી ખરા સમયે રંગ લાવશે કે કેમ તે જોવાનું રહ્યું કારણ કે ટ્રેવિસ હેડ અને અભિષેક શર્મા ઉપર હૈદરાબાદ ટીમનો નિર્ભર છે જો તેઓ સસ્તામાં આઉટ થશે તો આપોઆપ હૈદરાબાદ ઉપર પ્રેશર આવી જશે સામે રાજસ્થાનની બોલિંગ પણ ખૂબ મજબૂત છે. આ મેદાન પર રમાયેલી છેલ્લી 10 મેચોમાં પ્રથમ બેટિંગ કરનારી ટીમો કરતાં બીજા ક્રમે બેટિંગ કરનારી ટીમોને વધુ સફળતા મળી હતી. આ મેદાન પર પ્રથમ દાવનો સરેરાશ જીતનો સ્કોર 180 રનથી ઉપર છે. આ સ્થળ પર છેલ્લી દસ મેચોમાં પાવરપ્લેમાં સરેરાશ રન રેટ 8.5 રહ્યો છે, જ્યારે ડેથ ઓવરોમાં સરેરાશ રન રેટ 9.48 રહ્યો છે. ચિદમ્બરમ સ્ટેડિયમની પીચ બેવડી પ્રકૃતિની હોવાની અપેક્ષા છે. ચેપોક સ્ટેડિયમના રેકોર્ડ પર નજર કરીએ તો જેમ જેમ રમત આગળ વધે છે તેમ અહીં વિકેટ સ્પિનરોને મદદ કરવાનું શરૂ કરે છે. આ કારણે લાંબા શોટ મારનારા ખેલાડીઓ માટે મુશ્કેલ બની જાય છે.ફાઈનલમાં પહોંચવા માટે સનરાઈઝર્સ હૈદરાબાદે રવિચંદ્રન અશ્વિન અને યુઝવેન્દ્ર ચહલનો કોયડો ઉકેલવો પડશે. જો કે, આ મેદાન આઇપીએલ 2024માં હાઈ સ્કોરિંગ મેચોનું સાક્ષી રહ્યું હતું. ઘણા પ્રસંગોએ 200 થી વધુ રન બનાવ્યા હતા.