લોનના નામે લોભામણી એપ્લિકેશનોથી સાવધાન
અધધધ 1520 ટકાનું ચામડાતોડ વ્યાજ વસુલાતું, લોકોનો ડેટા પણ ચોરાઈ જતો હોવાથી પોલીસે હાથ ધરી આકરી કાર્યવાહી
વ્યાજખોરો સામે કાર્યવાહી બાદ હવે ગુજરાત પોલીસે લોન આપતી 419 ચાઈનીઝ એપ્લિકેશન પર પ્રતિબંધ લાદી દીધો છે. આ એપ્સથી ચાઈનીઝ સ્કેમર્સ લોકોના મોબાઈલની પ્રાઈવેટ ઈન્ફર્મેશનની ચોરી કરી લેતા હતા. એટલું જ નહીં ઉંચા વ્યાજદરો સાથે તેઓ લોન આપતા હતા. જેમાં એક દિવસ પણ રૂપિયાની ચૂકવણીમાં મોડુ થાય તો મોટી રકમની પેનલ્ટી પણ ફટકારી દેતા હતા.
ડિજિટલ દુનિયામાં મોબાઈલની એક ક્લિકથી ઘરે બેઠા શાકભાજી, કરિયાણુ અને રેસ્ટોરાંમાંથી ફૂડ પણ આવી જાય છે. તેવામાં હવે કોવિડ-19 સમયથી મોબાઈલ જગતમાં એક નવો ટ્રેન્ડ શરૂ થયો હતો. જે હતો ઓનલાઈન લોન અથવા માઈક્રોલોન્સ. નાણાકીય કટોકટી દૂર કરવા માટે લોકો લોન લેતા હોય છે. પરંતુ શું તમે જાણો છો કે મોબાઈલમાં માત્ર એક ક્લિકથી તથા ઓનલાઈન ફોર્મ ભરી થોડા ડોક્યુમેન્ટ્સ આપી માઈક્રોલોન લઈ શકાય છે?
છેલ્લા 2 વર્ષમાં આ પ્રમાણેની લોન લેવાનો ટ્રેન્ડ વધ્યો છે. પરંતુ આ એક એવી જાળ છે જેમાં એકવાર ફસાયા તો વ્યાજ ભરતા રહી જશો. ચાઈનીસ એપ્લિકેશન દ્વારા અપાતી ઓનલાઈન લોન્સ સૌથી પહેલા ફોનના તમામ એક્સેસ માગે છે. ત્યારપછી જે વ્યક્તિએ લોન લીધી છે તેના પ્રાઈવેટ ડોક્યુમેન્ટ્સ, ડેટાની ચોરી કરી રૂપિયાની ઠગાઈ કરતા હોય છે. ગુજરાત પોલીસ પાસે અવાર નવાર સાયબર ફ્રોડના કેસ આવતા હતા. જેથી કરીને તેમણે એક ઝૂંબેશ ચલાવી અને એન્ડ્રોઈડ માર્કેટમાં ચાઈનીઝ એપ્સ કે જે લોન આપે છે તેની સામે મોટી કાર્યવાહી હાથ ધરી હતી.
2021ના અંતમાં આ પ્રમાણેની લોન એપ્લિકેશન ચર્ચામાં આવી હતી. કારણ કે આ સમયે કોરોના તેના પિક પર હતો જેથી કરીને નોકરી કરતા લોકોના પગાર કપાયા હતા અથવા કેટલાક લોકો પાસે નોકરી જ નહોતી. આ સમયે લોકોને રૂપિયાની જરૂર પડતી હતી. જેથી કરીને આવી એપ્લિકેશન દ્વારા ઘણા લોકોએ માઈક્રોલોન લીધી હતી.લોનની વાત કરીએ તો સૌથી પહેલા આ એપ્લિકેશન દ્વારા 15 હજાર રૂપિયાની લોન 1520 ટકાના વ્યાજ પર ઓફર કરવામાં આવે છે. તેવામાં જ્યારે વ્યક્તિ સમયસર આ લોનની ભરપાઈ કરી દે છે ત્યારે તેન 20 હજાર અને પછી 30 હજારની લોન આપતા હોય છે. આમ કહીને તેઓ વધુ મોટી રકમની લોન લેવા માટે ગ્રાહકોના વિશ્વાસ જીતતા હોય છે. આમ કરીને તેઓ વ્યાજ પણ વસૂલે અને ગ્રાહકોનો વિશ્વાસ પણ જીતે છે. પરંતુ એક લિમિટ પસાર થયા પછી શખસો કૌભાંડને આચરતા હોય છે.
સાયબર ફ્રોડ દ્વારા એક ગ્રાહકના ખાનગી ડોક્યુમેન્ટ્સ લઈ લેવામાં આવે છે. ત્યારપછી તેના કોન્ટેક્ટ લિસ્ટમાં જેટલા પણ લોકો હશે તેને મોકલી બ્લેકમેલ કરવામાં આવે છે. એટલું જ નહીં જેવું તેમને એક વ્યક્તિના ફોનનું એક્સેસ મળી જાય છે કે તરત જ તેઓ કોન્ટેક્ટ લિસ્ટમાં હાજર તમામ વ્યક્તિઓને એસએમએસ દ્વારા એક લિંક મોકલે છે.ત્યારપછી શરૂ થાય છે આ ઓનલાઈન માઈક્રોલોનનું મોટુ છેતરપિંડીનું કૌભાંડ. પોલીસે જણાવ્યું કે અમે કાર્યવાહી કરી આવી એપ્લિકેશનને બંધ કરાવી દઈએ છીએ. છતા આવી એપ્લિકેશન ફરીથી બીજા નામ સાથે માર્કેટમાં આવી જાય છે.
એપથી છેતરપિંડી થયાની 932 ફરિયાદો મળી હતી
ગુજરાત પોલીસ પાસે આવી એપ્લિકેશનથી છેતરપિંડી થઈ હોય એવી 932 ફરિયાદો આવી ગઈ હતી. માર્ચ 2022 સુધીમાં જ આટલી ફરિયાદો આવતા પોલીસ સતર્ક થઈ ગઈ. ત્યારપછી દરેક ફરિયાદના રૂટ્સ સુધી જઈને પોલીસે એપ્લિકેશનની વિગતો મેળવી અને વધુ કાર્યવાહી શરૂ કરી દીધી હતી. તપાસ દરમિયાન પોલીસે આવી 885 એપ્લિકેશનની ઓળખ કરી દીધી અને યોગ્ય પગલાં ભરી 419 એપ્લિકેશનને એન્ડ્રોઈડ માર્કેટમાંથી રિમૂવ કરી દીધી છે.
ચીન અને હોન્ગ કોન્ગથી ચાલતું હતું કૌભાંડ
ઓનલાઈન લોન એપ્લિકેશન દ્વારા લોકોને છેતરતી ગેંગમાં મોટાભાગે નેપાળ અને ચીનના શખસો સામેલ હતા. આ લોકો ચીન અને હોન્ગ કોન્ગથી સમગ્ર કૌભાંડ ચલાવતા હતા. આ સાયબરક્રૂક્સ સૌથી પહેલા લોકોને લોન લેવા માટે વિગતો આપતા હતા. ત્યારપછી જ્યારે વ્યક્તિ લોન લેવા રાજી થઈ જાય તો તેમને મોબાઈલ એપ્લિકેશન ડાઉનલોડ કરવા જણાવતા હતા. માઈક્રોલેન લેવા માટે તેઓ ગ્રાહકોના મોબઈલ ફોનના તમામ એક્સેસ માગી લેતા હતા. જેમકે કોન્ટેક્ટ્સ, ઈમેજીસ, વીડિયોઝ તથા અન્ય તમામ ડિજિટલ કન્ટેન્ટ વગેરે.
લોન મળે કે ન મળે ખાનગી ડેટા ચોરાઈ જતા હતા
ઓનલાઈન લોન આપવાના નામે ખાનગી ડેટા પચાવી પાડતી આ એપ્સ દરેક વ્યક્તિને લોન નહોતી આપતી. તેઓ પહેલા વ્યક્તિના મોબાઈલ ફોનનું એક્સેસ લઈ લેતા હતા ત્યારપછી ફોનમાં ફોટોઝ, વીડિયોઝ અને અન્ય ડેટા – ડોક્યુમેન્ટ્સ પર નજર કરતા હતા. આ દરેક ડોક્યુમેન્ટ્સ પરથી જો એમને લાગે કે હવે આ ગ્રાહક સાથે વધારે છેતરપિંડી થઈ શકે છે અથવા તેના ફોનને હેક કરી બેન્ક એકાઉન્ટ ખાલી થઈ શકે છે તો તે વ્યક્તિને લોન આપી દેતા હતા. આ અંગે સાયબર ક્રાઈમની ટીમે વિગતવાર તપાસ શરૂ કરી હતી.