બ્રિજભૂષણ વિરુદ્ધ નોંધાયેલી ફરિયાદ જીત તરફનું અમારું પહેલું પગલું : ભોગ બનનાર કુસ્તીબાજોનું નિવેદન
રેસલિંગ ફેડરેશન ઓફ ઈન્ડિયાના વડા બ્રિજભૂષણ શરણ સિંહ વિરુદ્ધ શુક્રવારે એફઆઈઆર દાખલ કરાઈ છે. દિલ્હી પોલીસના આ નિર્ણયને જંતર-મંતર પર વિરોધ કરી રહેલા કુસ્તીબાજો દ્વારા “જીત તરફનું પહેલું પગલું” ગણાવ્યું હતું. જોકે, કુસ્તીબાજએ કહ્યું કે જ્યાં સુધી ભારતીય જનતા પાર્ટીના સાંસદને તેમના તમામ પદ પરથી હટાવવામાં ન આવે ત્યાં સુધી તેઓ તેમનો વિરોધ ચાલુ રાખશે.
દિલ્હી પોલીસ તરફથી હાજર થયેલા સોલિસિટર જનરલ તુષાર મહેતાએ ચીફ જસ્ટિસ ડીવાય ચંદ્રચુડ અને જસ્ટિસ પીએસ નરસિમ્હાની સુપ્રીમ કોર્ટની બેંચને જણાવ્યું હતું કે શુક્રવારે એફઆઈઆર નોંધવામાં આવશે. કુસ્તીબાજો કે જેમણે ડબ્લ્યુએફઆઈ ચીફ પર જાતીય સતામણી અને ધમકીનો આરોપ મૂક્યો છે, તેઓએ 23 એપ્રિલે તેમનું આંદોલન ફરી શરૂ કર્યું ત્યારથી બ્રિજભૂષણ શરણ સિંહ સામે એફઆઈઆર નોંધવાની માગ કરી રહ્યા છે.
સાક્ષી મલિકે જંતર-મંતર ખાતે પત્રકારોને જણાવ્યું હતું કે, “આ જીત તરફનું પહેલું પગલું છે, પરંતુ અમારો વિરોધ ચાલુ રહેશે.” કુસ્તીબાજ વિનેશ ફોગાટે કહ્યું કે દિલ્હી પોલીસે એફઆઈઆર નોંધવામાં છ દિવસનો સમય લીધો અને તેને તપાસ એજન્સી પર વિશ્વાસ નથી. વિશ્વ ચેમ્પિયનશિપ મેડલ વિજેતા વિનેશે કહ્યું, તે (પોલીસે) નબળી એફઆઈઆર નોંધી શકે છે. અમે જોઈશું, અવલોકન કરીશું અને પછી નિર્ણય લઈશું (વિરોધ સમાપ્ત કરવા પર). તે (બ્રિજ ભૂષણ) જેલના સળિયા પાછળ હોવા જોઈએ અને હાલના તમામ પદો પરથી હટાવી દેવા જોઈએ, નહીં તો તે તપાસ પર અસર કરવાનો પ્રયાસ કરશે.
સુનાવણી દરમિયાન કુસ્તીબાજો તરફથી વરિષ્ઠ વકીલે કોર્ટમાં કહ્યું- મહિલા કુસ્તીબાજોને સુરક્ષા પૂરી પાડવામાં આવે અને નિવૃત્ત ન્યાયાધીશોએ કેસની દેખરેખ રાખવી જોઈએ. આ અરજી પર કોર્ટે દિલ્હી પોલીસને સુરક્ષા આપવાનો આદેશ આપ્યો છે. કોર્ટે પોલીસને આગામી શુક્રવાર સુધીમાં તેમના દ્વારા લેવામાં આવેલા દરેક પગલાંની વિગતો આપતું સોગંદનામું દાખલ કરવા પણ કહ્યું છે.
