2022-23માં વિશ્વ આખું મંદીના ઓછાયામાં ભલે હોય પણ ભારતે ’નિકાસ’માં હરણફાળ ભરી છે. આ સમયમાં ભારતનો વિદેશી વ્યાપાર 12 ટકા વધીને રૂ. 130 લાખ કરોડને આંબશે. જે જીડીપીના 48 ટકા હશે.
આર્થિક અસ્થિરતા હોવા છતાં, ભારતનો વિદેશી વેપાર ચાલુ નાણાકીય વર્ષમાં એટલે કે 2023-24માં 1.6 ટ્રિલિયન ડોલર એટલે કે 130 લાખ કરોડને પાર થઈ જશે. ગ્લોબલ ટ્રેડ રિસર્ચ ઇનિશિયેટિવ એ એક રિપોર્ટમાં જણાવ્યું છે કે, 2022-23 માટે 1.6 ટ્રિલિયન ડોલર દેશની જીડીપી 3.4 ટ્રિલિયનના લગભગ 48 ટકા હશે.
ઇકોનોમિક રિસર્ચ ઇન્સ્ટિટ્યૂટના સહ-સ્થાપક અજય શ્રીવાસ્તવે જણાવ્યું હતું કે ઊંચો વેપાર-જીડીપી ગુણોત્તર પણ બિઝનેસમાં વધુ નિખાલસતા દર્શાવે છે. માલની નિકાસની સરખામણીમાં સેવાઓની નિકાસના ઊંચા વૃદ્ધિ દરે દેશની નિકાસની એકંદર કામગીરીમાં સુધારો કર્યો છે, એમ તેમણે જણાવ્યું હતું. છેલ્લા નાણાકીય વર્ષમાં ભારતની કુલ નિકાસ (સામાન અને સેવાઓ) 755 બિલિયન ડોલર હોવાનો અંદાજ છે. જે 2021-22ની સરખામણીમાં લગભગ 11.6% વધુ હશે. ચાલુ નાણાકીય વર્ષમાં ભારતની વેપારી નિકાસ 5 ટકા વધીને 442 બિલિયન ડોલર અને સેવાઓની નિકાસ 22.6 ટકા વધીને 311.9 બિલિયન ડોલર થવાની ધારણા છે. 2021-22માં વિદેશી વેપાર 1.43 ટ્રિલિયન ડોલર હતો.
વિદેશી વ્યાપાર 12% વધીને રૂ.130 લાખ કરોડને આંબશે, જે જીડીપીના 48% હશે
પેટ્રોલ-ડીઝલની માંગમાં મોટો ઉછાળો
કૃષિ ક્ષેત્રની મજબૂત માંગ અને પરિવહનમાં તેજીના કારણે માર્ચમાં દેશમાં ઇંધણની માંગમાં વધારો થયો હતો. માર્ચમાં પેટ્રોલનું વેચાણ 5.1 ટકા વધીને 2.65 મિલિયન ટન થયું હતું, એમ ઉદ્યોગના પ્રારંભિક ડેટા અનુસાર. માસિક ધોરણે વેચાણમાં 3.4 ટકાનો વધારો થયો છે. આ સમયગાળા દરમિયાન ડીઝલની માંગ 2.1 ટકા વધીને 6.81 મિલિયન ટન થઈ છે. માસિક ધોરણે માંગમાં 4.5 ટકાનો વધારો થયો છે. ઉડ્ડયન ઇંધણની માંગ 25.7 ટકા વધીને 6,14,000 ટન સુધી પહોંચી છે. જોકે, એલપીજીનું વેચાણ 3 ટકા ઘટીને 2.37 મિલિયન ટન થયું છે.
વીજળીનો વપરાશ ઘટીને 127.52 અબજ યુનિટ થયો છે
માર્ચ 2023માં દેશમાં વીજળીનો વપરાશ 0.74 ટકા ઘટીને 127.52 અબજ યુનિટ થયો છે. 31 મહિનામાં આ પ્રથમ વખત છે જ્યારે વપરાશમાં ઘટાડો થયો છે. વીજ વપરાશમાં ઘટાડો થવાનું મુખ્ય કારણ દેશમાં વેસ્ટર્ન ડિસ્ટર્બન્સના કારણે ભારે વરસાદ અને માર્ચમાં નીચું તાપમાન છે. અગાઉ ઓગસ્ટ 2020માં વપરાશમાં ઘટાડો જોવા મળ્યો હતો.
