એક જ મહિનામાં ટ્રાન્ઝેક્શનની સંખ્યા અધધધ 890 કરોડને પાર
દેશમાં એપ્રિલ મહિનામાં રૂ. 14.07 લાખ કરોડના યુપીઆઈ ટ્રાન્ઝેક્સન થયા છે. જે ટ્રાન્ઝેક્શનની સંખ્યા અધધધ 890 કરોડ થાય છે. આમ ભારતમાં હાલ ડિજિટલાઇઝેશન ધૂમ મચાવી રહ્યું છે.
નેશનલ પેમેન્ટ્સ કોર્પોરેશન ઓફ ઈન્ડિયાના ડેટા અનુસાર, એપ્રિલના છેલ્લા 3 દિવસમાં લગભગ 1.37 લાખ કરોડ રૂપિયાના 100 કરોડ ટ્રાન્ઝેક્શન થયા છે. એપ્રિલ 2022 ની તુલનામાં, છેલ્લા મહિનામાં વ્યવહારોમાં વોલ્યુમની દ્રષ્ટિએ 59 ટકા અને મૂલ્યની દ્રષ્ટિએ 44 ટકાનો વધારો થયો છે. એપ્રિલ 2022 માં, 558 કરોડથી વધુ વ્યવહારો થયા, જેની કિંમત 9.8 લાખ કરોડ રૂપિયા હતી. માર્ચમાં ઉછાળો આવ્યા બાદ એપ્રિલમાં પણ યુપીઆઈ દ્વારા વ્યવહારોની ગતિ ચાલુ રહી હતી.
વર્ષના અંતે વ્યવહારો, ખાસ કરીને રોકાણ સંબંધિત પ્રવૃત્તિઓ, નાની ખરીદીઓ અને ઓનલાઈન ચૂકવણીએ આમાં મુખ્ય ભૂમિકા ભજવી હતી. ફેબ્રુઆરીમાં રૂ. 12.35 લાખ કરોડના 750 કરોડ વ્યવહારો થયા હતા.
ઈમીડિએટ પેમેન્ટ સર્વિસીસ દ્વારા થતા વ્યવહારો એપ્રિલમાં નજીવા ઘટાડા સાથે રૂ. 49.6 કરોડ અને મૂલ્યમાં રૂ. 5.21 લાખ કરોડ દર્શાવે છે. તેની સરખામણીમાં માર્ચ 2023માં 5.46 લાખ કરોડ રૂપિયાના 49.7 કરોડ વ્યવહારો થયા હતા.
એપ્રિલમાં ફાસ્ટેગ ટ્રાન્ઝેક્શન્સમાં વોલ્યુમ મુજબ 0.47 ટકાનો નજીવો ઘટાડો થયો છે અને તે 305 મિલિયન પર પહોંચી ગયો છે. માર્ચ 2023માં તે 30.63 કરોડ થઈ ગયો છે. જોકે, મૂલ્યની દ્રષ્ટિએ તે 2 ટકા વધીને રૂ. 5,149 કરોડ થઈ ગયું છે. આધાર સક્ષમ પેમેન્ટ સિસ્ટમ આ મહિનામાં 7 ટકા ઘટીને 10.2 કરોડ થઈ છે જે માર્ચ 2023 માં 10.97 કરોડ હતી. મૂલ્યની દ્રષ્ટિએ, તે માર્ચમાં રૂ. 30,541 કરોડની સરખામણીએ એપ્રિલમાં 3 ટકા ઘટીને રૂ. 29,640 કરોડ થયો હતો.
